اعتزاز احسن کے خلاف کیپٹن صفدر کی درخواست اسلام آباد ہائیکورٹ نے خارج کردی
کیپٹن صفدر کے وکیل کا کہنا تھا کہ اعتزاز احسن نے جنرل باجوہ پر الزامات لگائے۔
اس موقع پر کیپٹن صفدر روسٹرم پر آگئے۔ ان کا کہنا تھا کہ اعتزاز احسن نے کہا کہ باجوہ نے ظلم کیا میڈیا،سوشل میڈیا نے اعتزاز احسن کے بیان کو بہت کوریج دی،
کیپٹن ریٹائرڈ صفدر نے چیف جسٹس اسلام آباد ہائی کورٹ جسٹس اطہرمن اللہ سے سوال کیا کہ اگر طلال چوہدری، دانیال عزیز اور نہال ہاشمی کو توہین عدالت پر سزا دے سکتی ہے تو اعتزاز احسن کو بلا کر وضاحت طلب کیوں نہیں کر سکتی؟
کیپٹن ریٹائرڈ صفدر کامزید کہنا تھا کہ جنرل باجوہ نیوٹرل ہیں،ان کا کام ڈیفنس کا ہے، وہ عدالتوں پر اثر انداز نہیں ہو سکتے،نیوٹرل آرمی چیف جنرل باجوہ اس عدالت پر کیسے دباو ڈال سکتے ہیں؟
انہوں نے مزید کہا کہ سیاسی جلسوں میں اب یہی کہا جائے گا کہ ہمیں جنرل باجوہ نے بری کرایا ،بہت سے چینلز نے اعتزاز احسن کے بیانات پر بات کی، بول نیوز نے اس پر مسلسل پروگرام کیے۔
چیف جسٹس اسلام آباد ہائی کورٹ جسٹس اطہرمن اللہ نے کہا کہ یہ عدالت کسی سے غیر ضروری وضاحت طلب نہیں کرے گی،اگر پاکستان بار کونسل یا کسی بھی بار کو اس عدالت پر شک ہے تو بتائیں۔
اس موقع پر چیف جسٹس نے سوال کیا کہ کیا کسی کو اسلام آباد ہائی کورٹ کی جانبداری پر کوئی شک ہے؟اگر نہیں تو کسی کے غیر ذمہ دارانہ بیان پر توجہ کیوں دیں؟ ہمارے فیصلے فیصلہ کریں گے کہ لوگوں کا اس عدالت پر کتنا اعتماد ہے؟
You are using an out of date browser. It may not display this or other websites correctly.
You should upgrade or use an alternative browser.
You should upgrade or use an alternative browser.
خبریں
Filters
Show only:
Loading…
رواں سال انسانی سمگلنگ میں ملوث 791 سمگلرز گرفتار جبکہ اس حوالے سے ملک بھر میں 2446 کیسز درج کیے جا چکے ہیں۔
تفصیلات کے مطابق 2 دنوں کے وقفے کے بعد قومی اسمبلی اور سینیٹ کا اجلاس آج دوبارہ ہوا جہاں وقفہ سوالات کے علاوہ توجہ دلائو نوٹس پیش کیےگئے اور ملک میں حالیہ سیلاب کے باعث ہونے والے نقصانات سے متعلق بحث بھی کی گئی۔ قومی اسمبلی اجلاس کے دوران وفاقی وزیر مملکت برائے داخلہ عبدالرحمان کانجو نے بتایا کہ رواں سال پاکستان میں انسانی سمگلنگ میں ملوث 791 سمگلرز کو گرفتار کیا جا چکا ہے جبکہ اس حوالے سے ملک بھر میں 2446 کیسز درج کیے جا چکے ہیں۔
دریں اثنا رہنما متحدہ قومی موومنٹ (ایم کیو ایم) کشور زہرہ نے نشتر ہسپتال کی چھت سے ملنے والی لاشوں پر تشویش کا اظہار کیا اور کہا کہ ڈی این اے ٹیسٹ کروا کر بتایا جائے کہ یہ لاشیں کن کی ہے؟ ہمارے لوگ بھی لاپتہ ہوئے ہیں، کہیں یہ لاشیں ان کی تو نہیں؟ جس پر وفاقی وزیر مملکت برائے داخلہ عبدالرحمان کانجو نے کہا کہ لاشوں کا ڈی این اے ہونا ضروری ہے تا کہ معلوم ہو کہ لاشیں کس کی ہیں؟ ہم اس کی رپورٹ منگوائیں گے۔
قومی اسمبلی اجلاس کے دوران وفاقی وزیر مملکت برائے داخلہ عبدالرحمان کانجو نے بتایا کہ تربیلا ڈیم سے اسلام آباد اور راولپنڈی کے شہریوں کو پانی فراہم کرنے کے منصوبے پر کام کیا جا رہا ہے، منصوبہ پر کام فرنٹیئر ورکس آرگنائزیشن (ایف ڈبلیو او) کر رہی ہے جو منصوبے کو آئندہ 4 سال میں مکمل کر لے گی۔ ان کا کہنا تھا کہ وفاقی دارالحکومت اسلام آباد کے تمام فلٹریشن پلانٹس اور ٹیوب ویلز کو جلد سے جلد شمسی توانائی پر منتقل کر دیا جائے گا جس پر کام جاری ہے۔
یاد رہے کہ ہر سال غیرقانونی طور پر بیرون ملک جانے کی کوشش کرنے والوں میں پنجاب، خیبرپختونخوا ، آزاد کشمیر کے علاوہ افغانستان کے لوگ شامل ہوتے ہیں جس کی بڑی وجہ پاکستان میں انتہائی کم معاضے اور بہتر روزگار کی تلاش شامل ہے جس فائدہ انسانی سمگلر اٹھاتے ہیں۔
لاہور کے علاقے شیرا کوٹ میں ادھار لینے والے سے اپنے پیسے واپس مانگنا دکاندار کا جرم بن گیا، 750 روپے کے تقاضے پر ملزم نے گھونسے مار مار کر شہری کا قتل کر دیا۔
تفصیلات کے مطابق ے مطابق پان کارنر مالک اقبال نے ملزم عثمان خان سے اپنی رقم کی واپسی کا مطالبہ کیا جس پر اقبال اور عثمان میں تلخ کلامی ہوئی جس سے بات ہاتھا پائی تک چلی گئی، عثمان نے گھونسے مار مار کر اقبال کو جان سے مار دیا۔
ایس پی اقبال ٹاؤن ڈاکٹر عمارہ شیرازی کے نوٹس لینے پر پولیس نے قتل کے ملزم عثمان خان کو گرفتار کرلیا۔ بائیس سالہ مقتول محمد اقبال نے شیراکوٹ کے علاقہ میں جنرل اسٹور بنا رکھا تھا جبکہ ملزم عثمان خان قریب ہی دکان پر سیلز مین کا کام کرتا تھا۔
قاتل نے مقتول کے 750 روپے دینا تھے جس کے تقاضے پر ملزم عثمان آپے سے باہر ہوگیا۔ ایس ایچ او شیراکوٹ سید تیمور کے مطابق مقتول کے بھائی شکیل کی مدعیت میں مقدمہ درج کرکے ملزم کو حوالات میں بند کر دیا ہے۔
ایس پی اقبال ٹاؤن ڈاکٹر عمارہ شیرازی نے پولیس ٹیم کو فوری مقدمے کے اندراج اور ملزم کی گرفتاری پر شاباش دی۔
الیکشن کمیشن آف پاکستان نے عمران خان سمیت پاکستان تحریک انصاف کے رہنماؤں کی جانب سے ضمنی انتخابات کے حوالے سے الزامات مسترد کردیئے ہیں۔
تفصیلات کے مطابق ترجمان الیکشن کمیشن نے چیئرمین پاکستان تحریک انصاف اور دیگر پارٹی رہنماؤں کی جانب سے ضمنی انتخابات کے حوالے سے عائد الزامات پرر دعمل دیدیا ہے۔
ترجمان الیکشن کمیشن کی جانب سے جاری کردہ بیان میں کہا گیا ہے کہ عمران خان، فواد چوہدری، فرخ ایوب اور عمر ایوب کی جانب سے الیکشن کمیشن پر عائد الزامات بے بنیاد ، گمراہ کن اور غیر حقیقی ہیں، الیکشن کمیشن پر اثر انداز ہونےکی کوشش کرنے والوں سے آئین و قانون کے مطابق نمٹا جائے گا۔
ترجمان الیکشن کمیشن نے کہا کہ ادارہ ملک میں صاف و شفاف اور غیر جانبدارانہ انتخابات منعقد کروانے کیلئے پرعزم ہے اور اللہ کا شکر ہے کہ ابھی تک ایسا ممکن بھی ہورہا ہے۔
واضح رہے ملک میں ضمنی انتخابات سے قبل رہنما تحریک انصاف فواد چوہدری نے ایک بیان میں کہا تھا کہ الیکشن کمیشن سے اس وقت زیادہ شکایات موصول ہورہی ہیں، الیکشن کمیشن کو جو زور لگانا ہے لگا لے سیٹیں تو عمران خان کی ہیں ہیں۔
تحریک انصاف کے رہنما اسد عمر کا کہنا ہے کہ اسحاق ڈار نے ہیر پھیر کے وہی پرانے کام شروع کر دیئے ہیں۔ انہوں نے کہا ضمنی انتخابات میں ووٹنگ کے دوران لڑائی جھگڑے اور مختلف علاقوں سے بے ضابطیگیوں کی بھی اطلاعات آ رہی ہیں، آج الیکشن کمیشن کا امتحان ہے۔
اسلام آبد میں پریس کانفرنس کرتے ہوئے تحریک انصاف کے رہنما اور سابق وفاقی وزیر اسد عمر کا کہنا تھا کہ کراچی کے ضمنی انتخابات میں سرکاری وسائل کو استعمال کیا جارہا ہے، رانا ثنااللہ نے وزیر ہونے کے باجود اپنے حلقوں میں انتخابی مہم چلائی، الیکشن کمیشن نے نوٹس لے لیا ہے، دیکھتے ہیں کیا ہوتا ہے۔
اسد عمر نے کہا اب دیکھنے والی بات یہ ہے کہ نوٹس ملیا، ککھ نہ ہلیا والی بات ہوتی ہے یا واقعی الیکشن کمیشن معاملے کو سنجیدگی سے دیکھتا ہے۔ انہوں نے کہا لوگ باہر نکلیں، اس وقت پولنگ اسٹیشن پر جائیں اور ووٹ کاسٹ کریں، آج شام کو نتائج آ رہے ہوں گے۔
اسد عمر نے دعویٰ کیا کہ عمران خان آئندہ دو تہائی اکثریت سے وزیراعظم منتخب ہوکر آئیں گے۔ پٹرول کی عالمی منڈی میں قیمتیں کم ہوئیں مگر یہاں شب خون مارا گیا، بجلی زیادہ موجود مگر قیمتیں جان بوجھ کر بڑھائی جا رہی ہیں۔ 44 ماہ میں تحریک انصاف کے دور میں 51 روپے ڈالر بڑھا تھا، موجود حکومت کے 6 ماہ کے دوران ہی اب تک ڈالر 40 روپے مہنگا ہو چکا ہے۔
انہوں نے کہا اعدادو شمار کے مطابق بجلی کی قیمتیں 45 فیصد کم ظاہر ہوئیں، اسحاق ڈار نے پرانے کام شروع کردیئے۔اس وقت معاشی صورتحال اور مہنگائی سے بڑھ کر ایٹمی اثاثوں کی بات ہو رہی ہے، ملک اس وقت بحران کا شکار اور شدید خطرات میں گھرا ہے۔
عوامی نیشنل پارٹی (اےاین پی) کے صدر اسفند یار ولی نے کہا ہے کہ جو اسمبلی نہیں جانا چاہتے وہ انتخاب میں حصہ کیوں لے رہے ہیں؟ عمران خان گھر میں آرام کریں۔
چارسدہ میں میڈیا سے گفتگو کرتے ہوئے اسفند یار ولی نے کہا کہ پہلے سے طے تھا کہ الیکشن کے دن نکلوں گا، بیماری کی وجہ سے فعال کردار ادا نہ کر سکا۔
ضمنی انتخاب میں عوام نے اپنا نمائندہ منتخب کرنا ہے، انہوں نے عمران خان کو مشورہ دیا کہ انہوں نے اسمبلی میں تو جانا نہیں پھر گھر میں آرام سے بیٹھنا چاہیے۔ انہوں نے عمران خان سے یہ بھی کہا کہ انہیں اسٹیبلشمنٹ کو سیاست میں نہیں گھسیٹنا چاہیے۔
واضح رہے کہ این اے 24 چارسدہ کے لیے عمران خان کے مقابلے میں عوامی نیشنل پارٹی (اے این پی) کے نوجوان صوبائی صدر اور جماعت کے سربراہ اسفند یار ولی خان کے بیٹے ایمل ولی خان پی ڈی ایم کے امیدوار ہیں۔
ایمل ولی خان کو پی ڈی ایم میں شامل دوسری سیاسی جماعتوں کی حمایت حاصل ہو گی جبکہ جماعت اسلامی نے مجیب اللہ کو اس حلقے سے اپنے امیدوار کی حیثیت سے انتخاب میں کھڑا کیا ہے۔
ایمل ولی خان نے 2018 کے عام انتخابات میں ضلع چارسدہ سے خیبر پختونخوا اسمبلی کے حلقے پی کے 58 سے پہلی مرتبہ اپنی انتخابی سیاست کا آغاز کیا تھا، پاکستان تحریک انصاف کے امیدوار سلطان محمد 28 ہزار سے زیادہ ووٹوں کے مقابلے میں 22 ہزار سے زیادہ ووٹ حاصل کر کے شکست سے دوچار ہوئے تھے۔
مبصرین کے خیال میں ماضی کی پارٹی پوزیشن اور ووٹوں کی گنتی سے لگتا ہے کہ اس حلقے میں جے یو آئی ف کا ایک بڑا ووٹ بینک موجود ہے۔ اگر مولانا فضل الرحمان کی جماعت ایمل ولی خان کو ووٹ دے تو وہ عمران خان کے مقابلے میں جیت بھی سکتے ہیں۔
آصف زرداری اور نوازشریف کے درمیان ٹیلیفونک رابطہ۔۔ شہبا ز شریف، مریم نوازشریف اور حمزہ شہباز کے مقدمے سے بری ہونے پر مبارکباد!
تفصیلات کے سابق سابق وزیراعظم و قائد مسلم لیگ ن میاں محمد نوازشریف نے سابق صدر وقائد پاکستان پیپلزپارٹی آصف علی زرداری سے ٹیلیفون پر رابطہ کر کے خیریت دریافت کی، سابق صدر چند دن پہلے ہی ہسپتال سے گھر منتقل ہوئے تھے، میاں محمد نوازشریف نے سابق صدر کی جلد سے جلد صحت یابی کے لیے اپنی نیک تمنائوں کا اظہار کیا کیا۔
اس موقع پر ملک کی مجموعی معاشی و سیاسی صورتحال پر بھی تبادلہ خیال کیا گیا جبکہ دونوں رہنماؤں نے کل کے روز کراچی اور ملک کے مختلف علاقوں میں ہونے والے ضمنی انتخابات کے حوالے سے مشاورت بھی کی۔
ٹیلیفونک رابطے کے دوران سابق وزیراعظم وچیئرمین پاکستان تحریک انصاف عمران خان کے اسلام آباد کی طرف لانگ مارچ پر بھی گفتگو زیربحث آئی۔
سابق صدر نے قائد مسلم لیگ ن میاں محمد نوازشریف کو وزیراعظم شہبازشریف، نائب صدر مسلم لیگ ن مریم نوازشریف اور سابق وزیراعلیٰ پنجاب حمزہ شہبا ز شریف کے مقدمے سے بری ہونے پر مبارکباد دی اس پر میاں محمد نوازشریف نے سابق صدر آصف علی زرداری کا شکریہ ادا کیا۔
یاد رہے کہ سابق صدر آصف علی زرداری کئی روز ہسپتال میں زیر علاج رہنے کے بعد چند روز قبل گھر منتقل ہوئے ہیں، انہیں 27 ستمبر کو صحت کی خرابی کے باعث کلفٹن کے نجی ہسپتال منتقل کیا گیا تھا جہاں ان کے پھیپھڑوں کا پروسیجر کرنے کے بعد طبیعت میں بہتری کے بعد گھر منتقل کر دیا گیا تھا اور سابق صدر کے ذاتی معالج وپی پی پی رہنما ڈاکٹر عاصم حسینن نے ہسپتال سے ان کی گھر روانگی کی تصویر بھی سماجی رابطوں کی ویب سائٹ ٹویٹر پر جاری کی تھی جس میں انہیں ہشاش بشاش دیکھا جا سکتا ہے۔
ڈاکٹرعاصم حسین کے اکاؤنٹ سے کچھ دیر بعد یہ تصویر ہٹا دی گئی تاہم یہ تصویر سوشل میڈیا پر وائرل ہو گئی تھی۔
امریکی صدر جوبائیڈن نے کوئی نئی بات نہیں کی، پاکستان کو محفوظ اور خوشحال دیکھنا چاہتے ہیں۔
تفصیلات کے مطابق وائٹ ہائوس کی پریس سکریٹری کیرین جین پیئر نے امریکی صدر جوبائیڈن کے ایک تقریب کے دوران پاکستان کے جوہری اثاثوں سے متعلق بیان کے حوالے سے پوچھے گئے سوال کا جواب دیتے ہوئے کہا کہ امریکی صدر جوبائیڈن نے کوئی نئی بات نہیں کی، وہ پہلے بھی ایسی تبصرے کر چکے ہیں۔
ان کا مزید کہنا تھا کہ صدر جوبائیڈن پاکستان کو محفوظ اور خوشحال دیکھنا چاہتے ہیں، یہ امریکی مفادات کیلئے انتہائی اہم ہے۔
ذرائع ابلاغ کے نمائندوں سے گفتگو کے دوران ان سے سوال کیا گیا تھا کہ ایک فنڈریزنگ تقریب کے دوران امریکی صدر جوبائیڈن نے جن خدشات کا ذکر کیا ہے، یہ خیال انہیں کہاں سے آیا؟ کیا انہوں نے اپنے مخصوص خدشات کا ذکر پاکستان کی سیاسی لیڈرشپ سے بھی کیا ہے؟
امریکی صدر جوبائیڈن نے کیلیفورنیا میں ایک تقریب سے خطاب کرتے ہوئے بدلتی ہوئی عالمی جغرافیائی صورتحال پر گفتگو کرتے ہوئے کہا تھا کہ پاکستان "دنیا کی خطرناک ترین قوموں" میں سے ایک ہو سکتا ہے، انہیں ایسا لگتا ہے کہ پاکستان کے ایٹمی اثاثے محفوظ نہیں ہیں۔ امریکی صدر کی جوبائیڈن کی طرف سے پاکستان کے ایٹمی اثاثوں کے خلاف الزامات تب سامنے آئے جب انہوں نے روس اور چین کے جارحانہ رویوں کے حوالے سے گفتگو کی جبکہ اس سے پہلے امریکی حکومت کی جانب سے پاکستان کے جوہری پروگرام کی سکیورٹی اور کنٹرول کو ہمیشہ موثر قرار دیا گیا ہے۔
جوبائیڈن کا تقریب میں خطاب کرتے ہوئے کہنا تھا کہ چینی ہم منصب شی جن پنگ کے ساتھ دنیا کے کسی بھی سربراہ مملکت کے مقابلے میں زیادہ وقت گزارا، میں سمجھتا ہوں کہ وہ کیا چاہتے ہیں لیکن ان کے بہت سے مسائل ہیں، اور روس میں جو کچھ ہو رہا ہے اسے کیسے سنبھالیں جبکہ میرے پاکستان کے پاس بھی جوہری ہتھیار ہیں جو میرے خیال میں شاید دنیا کی خطرناک ترین قوموں میں سے ایک ہے۔
خیبر پختونخوا اسمبلی میں اپوزیشن ارکان نے سیلاب زدگان کی مدد کیلئے تنخواہوں سے کٹوتی کی مخالفت کردی ہے۔
تفصیلات کے مطابق خیبر پختونخوا اسمبلی میں اپوزیشن ارکان کی جانب سے سیلاب زدگان کی مدد کیلئے تنخواہوں سے کٹوتی کے وزیر اعلی کے فیصلے کے خلاف صوبائی سیکرٹری خزانہ کو ایک مراسلہ ارسال کیا گیا ہے جس میں کہا گیا ہے کہ سیلاب زدگان کی مدد کیلئے اپوزیشن ارکان کی تنخواہوں میں سے کٹوتی نا کی جائے۔
مراسلے پر 51 اپوزیشن ارکان کی جانب سے دستخط کیے گئے جن کا تعلق جے یو آئی ف ، مسلم لیگ ن، پیپلزپارٹی، جماعت اسلام ، بی اے پی اور اے این پی سے ہے، اپوزیشن اراکان نے موقف اپنایا کہ حکومت متاثرین کی مدد خود کرے۔
صوبائی وزیر خزانہ تیمور سلیم جھگڑا کا کہنا تھا کہ ایسے وقت میں جب ہمارے لیے ایک ایک پیسہ ضروری ہے اگر اپوزیشن ارکان مدد کرنا نہیں چاہتے تو یہ شدید افسوسناک عمل ہے، یہ ان کی مرضی ہے، اگر اپوزیشن ارکان کو یہ تحفظات تھےکہ حکومت فنڈز دے کر سیاسی فائدہ اٹھا سکتی تھی تو وہ ہمارے پاس آتے ہم ان سے یہ پیسہ خرچ کروادیتے۔
انہو ں نے کہا کہ اس معاملے کو سیاست سے جوڑنے کی ضرورت نہیں ہے،اس وقت میں تمام سرکاری ملازمین، وفاقی کابینہ اس کارخیر میں حصہ ڈال رہے ہیں، یہ معاملہ پیسوں کا نہیں ہے، یہ رقم اتنی ضروری نہیں تھی، سیاسی نمائندگان کےرول ماڈل بننے کا معاملہ ہے، اپوزیشن ارکان سے کٹوتی کرکے 70سے 80 لاکھ روپے اکھٹے ہونا تھے ہم کوشش کریں گے یہ رقم خود جمع کرلیں گے۔
اپنے ایک دوسرے بیان میں تیمورجھگڑا کا کہنا تھا کہ وزیر اعلی، پوری کابینہ اور حکومتی اراکین کے پی کے اسمبلی نے اپنی ایک ایک مہینے کی تنخواہ سیلاب زدگان کی امداد کیلئے دیدی ہے، اسی طرح
گریڈ 1سے 16 تک کےسرکاری ملازمین نے 2 دن،گریڈ 17 اور اس سےاوپر کے افسران نے5 دن کی تنخواہیں دی ہیں،99فیصد لوگوں یہ اپنی خوشی سے کیا ہے، صرف 51 پی ڈی ایم اراکین صوبائی اسمبلی نے یہ سمجھا ہے کہ سیلا ب زدگان ان کی امداد کے اہل نہیں ہیں۔
وفاقی وزیر خرم دستگیر نے امریکی صدر جوبائیڈن کے پاکستان سے متعلق شکوک وشبہات کو غلط قرار دے دیا، گوجرانوالاہ میں ہریس کانفرنس کے دوران ایک سوال کے جواب میں خرم دشتگیر نے کہا کہ پاکستان کا کمانڈ اینڈ کنٹرول سسٹم بالکل محفوظ ہے۔
وفاقی وزیر خرم دستگیر نے امریکی صدرکے بیان کو بے بنیاد قرار دیتے ہوئے کہا کہ عالمی ایجنسیز درجنوں مرتبہ اس بات کی تصدیق کرچکی ہیں،پاکستان کے ایٹمی پروگرام پر ہر قسم کی مکمل پروٹیکشن بین الاقوامی طور پر موجود ہے۔
نجی ٹی وی سے گفتگو میں وزارت خارجہ کے سینئر افسر نے جوبائیڈن کے پاکستان کے ایٹمی پروگرام سے متعلق بیان پر کہا کہ یہ سمجھنا مشکل ہے صدر بائیڈن نے غیر ضروری ریمارکس کس تناظر میں دیے ہیں۔
انہوں نے مزید کہا کہ متعدد امریکی صدور اور امریکی حکومت نے پاکستان کے ایٹمی پروگرام کی سیکیورٹی اور کنٹرولز کو ہمیشہ مؤثر اور معیاری قرار دیا ہے۔
رہنما پاکستان تحریک انصاف فواد چوہدری نے کہا کہ بائیڈن پاکستان کے بارے میں غیر ذمہ دارانہ بیانات واپس لیں، غیر ذمہ دارانہ بیان یوں لگتا ہے صدر بائیڈن امریکی عوام میں گرتی ہوئی ساکھ سے توجہ ہٹانا چاہتےہیں،ہماری موجودہ لیڈرشپ کمزور ہوسکتی ہے لیکن عوام کمزورنہیں۔
امریکی صدر جو بائیڈن ڈیموکریٹک کانگریشنل کمپین کمیٹی میں خطاب کے دوران پاکستان کے ایٹمی پروگرام کو بے قاعدہ قرار دے دیا ہے،صدر جو بائیڈن نے پاکستان پر الزام لگاتے ہوئے کہا ہے کہ پاکستان کا ایٹمی پروگرام بے قاعدہ ہے،میراخیال ہے کہ پاکستان خطرناک ترین ممالک میں سےایک ہے۔
وزیر دفاع خواجہ آصف نے پیپلز پارٹی کے سینئر رہنما اور سابق وزیر دفاع اعتزاز احسن کے خلاف آرٹیکل 6 کے تحت کارروائی کا عندیہ دے دیا، پریس کانفرنس میں خواجہ آصف نے کہا کہ اعتزاز احسن کے خلاف آرٹیکل چھ کے تحت کارروائی ہوسکتی ہے۔
خواجہ آصف نے مزید کہا کہ ذوالفقار علی بھٹو کو چھوڑنے والا پہلا شخص اعتزاز احسن تھا اور اس کے بارے میں سابق صدر آصف زرداری کی رائے سے میں اچھی طرح واقف ہوں۔
وزیر دفاع نے کہا کہ پارٹی میں مقام بنانے کیلئے بیگم کے نام پر ایل پی جی کوٹے نہیں لینے ہوتے بلکہ قربانی دینی پڑتی ہے۔
پیپلز پارٹی نے سینیئر رہنما اعتزاز احسن کے پی ڈی ایم رہنماؤں کے خلاف بیانات سے لاتعلقی کا اظہار کرتے ہوئے نوٹس دینے کا فیصلہ کیا،اعتزاز احسن نے گزشتہ دنوں شریف فیملی کے کیسز میں بری ہونے پر بیان دیا تھا۔
انہوں نے نوازشریف بڑی آسانی سے ہر چیز سے نکل جاتےہیں، کسی نے سوچا تھا کہ پاکستان سے بھاگا نواز شریف بیٹی کو برابر میں بٹھا کر پریس کانفرنس کرے گا، کسی نے سو چا تھا اسی ایون فیلڈ اپارٹمنٹ سے اس طرح پریس کانفرنس کر کے منہ چڑائے گے۔
اعتزاز احسن نے یہ بھی کہا تھا کہ نوازشریف جوڈیشل اسٹرکچر میں بھی رخنہ ڈال رہے ہیں، سپریم کورٹ کے ججوں کی تقرری نہ ہونے کے پیچھے نواز شریف کا ہاتھ ہے۔
پیپلزپارٹی پنجاب نے بلاول بھٹوسے مطالبہ کیا کہ ن لیگی قیادت کے خلاف بیان پر اعتزاز احسن کی پارٹی رکنیت معطل کی جائے، اتوار کو پارٹی کے بانی رکن کے گھر کا گھیراؤ کرنے کا اعلان بھی کردیا گیا ہے۔
متحدہ قومی موومنٹ پاکستان پیپلزپارٹی کی جانب سے معاہدوں پر عمل درآمد نہ ہونے پر حکومت سے علیحدگی اور دیگر آپشنز پر غور کررہی ہے،ترجمان ایم کیوایم پاکستان کے مطابق کنوینر ایم کیو ایم پاکستان ڈاکٹر خالد مقبول صدیقی نے پارٹی کے تمام سینیٹرز، وزرا، ایم این ایز اور اراکین اسمبلی کو ہنگامی طور پر کراچی پہنچنے کی ہدایت جاری کردی ہے۔
ذرائع نے جیونیوز کو بتایا کہ ایم کیو ایم پاکستان اور پیپلزپارٹی کے درمیان معاہدے کے معاملے پر دو روز قبل دونوں جماعتوں کے درمیان ملاقات میں بلدیاتی قانون میں ترامیم پر اتفاق ہوا تھا اور گزشتہ روز اس حوالے سے دونوں جماعتوں کے درمیان مذاکرات میں کوئی اہم پیش رفت سامنے نہیں آئی ہے۔
ذرائع کے مطابق ایم کیو ایم پاکستان نے پیپلزپارٹی کے ساتھ کیے گئے معاہدوں پر عمل درآمد نہ ہونے پر شدید تشویش کا اظہار کرتے ہوئے حکومت سے نکلنے سمیت دیگر آپشنز پر غور فکر کا آغاز کردیا ہے،اتوار کو ایم کیو ایم پاکستان کے مرکز بہادرآباد میں ہنگامی اجلاس کا بھی امکان ہے۔
قومی اسمبلی کے آٹھ اور پنجاب اسمبلی کے تین حلقوں میں ضمنی الیکشن کل ہوں گے،انتخابی مواد آج پریذائیڈنگ افسران کے سپرد کیا جائے گا،الیکشن کمیشن نے سیکیورٹی کی ذمہ داریاں رینجرز اور پاک فوج کے حوالے کردی ہیں۔
وزیراعلیٰ پنجاب پرویز الٰہی نے پنجاب میں پانچ نئے اضلاع بنانے کی منظوری دے دی ہے، تونسہ شریف، مری، وزیرآباد، تلہ گنگ اور کوٹ ادو نئے اضلاع ہوں گے۔
چئیر مین تحریک انصاف عمران خان کی ہدایت پر تونسہ شریف ۔مری۔تلہ گنگ۔وزیر آباد اور کوڈ ادو کو ضلع بنانے کی منظوری دی گئی تھی
فیصلہ وزیراعلیٰ پنجاب چودھری پرویزالٰہی کی زیرصدارت اعلیٰ سطح کے اجلاس میں کیا گیا جس میں سابق وفاقی وزیر مونس الٰہی اورسابق وزیراعلیٰ سردار عثمان بزدار نے خصوصی شرکت کی۔
پرویز الہٰی کا کہنا تھا کہ وزیراعلیٰ پنجاب چودھری پرویزالہٰی کا کہنا تھا کہ انہوں نے 2005 میں تونسہ کو ضلع بنانے کا اعلان کیا تھا۔ اللہ تعالیٰ کا شکر ہے کہ اب تونسہ اور تلہ گنگ کو ضلع بنا نے کی منظوری بھی میں نے دی۔
وزیراعلیٰ پنجاب نے کہا تونسہ اور تلہ گنگ کے عوام سے کئے گئے وعدے پورے کئے جانے پر اللہ تعالیٰ کا شکر بجا لاتا ہوں۔ مری، وزیرآباد اور کوٹ ادو کو بھی ضلع بنانے کی منظوری دی ہے۔
یارہے کہ وزیراعلیٰ ضلع گوجرانوالہ، تونسہ شریف ڈیرہ غازی خان، مری ضلع راولپنڈی، تلہ گنگ ضلع چکوال اور کوٹ ادو ضلع مظفر گڑھ کی تحصیل ہے۔
مسلم لیگ ن کے رہنما طلال چودھری نے انتخابی مہم کے دوران مریم نواز کو جان سے مارنے کی دھمکی کی ویڈیو شیئر کردی۔
طلال چودھری نے ٹوئٹر پر فیصل آباد کے ضمنی انتخابات کی مہم کے دوران مریم نواز کو جان سے مارنے کی دھمکی دینے والے شخص کی ویڈیو شیئر کی ہے۔
لیگی رہنما کی جانب سے شیئر کی گئی ویڈیو میں ایک شخص عمران خان کی گرفتاری کی صورت میں مریم نواز کو قتل کرنے کے ارادے کا اظہار کر رہا ہے۔ جب کہ اس دوران سابق ڈپٹی اسپیکر قومی اسمبلی قاسم سوری بھی موجود ہیں۔
طلال چودھری نے ٹوئٹ کی “اس کی ذمہ داری عمران خان پر ہے جو خود فیصل آباد این اے 108 سے امیدوار ہے، شکست دیکھ کر اب دھمکیاں دی جا رہی ہیں۔ انہوں نے کہا الیکشن کمیشن اور پولیس ایکشن لے ورنہ اپنی قیادت کی حفاظت کے لیے ہر حد تک جا سکتے ہیں۔”
کھرے بیانات، پی پی کا اپنے بانی رکن اعتزازاحسن کیخلاف کارروائی کا فیصلہ
چند روز سے معروف قانون دان اور پی پی رہنما اعتزازاحسن کی جانب سے کھرے اور بے لاگ بیانات پر اب پیپلزپارٹی نے اپنے بانی رکن کے خلاف کارروائی کا فیصلہ کیا ہے۔
میڈیا رپورٹس کے مطابق پیپلزپارٹی نے اعتزاز احسن کی سینٹرل ایگزیکٹو کمیٹی اور پارٹی کی بنیادی رکنیت معطل کرنے کا فیصلہ کیا ہے جس کے لیے پنجاب کی ایگزیکٹو کمیٹی آج ہی سفارشات پارٹی کے جنرل سیکرٹری کو بھجوائے گی۔
ایگزیکٹوکمیٹی کے آج اجلاس میں اعتزاز احسن کےبیانات کےخلاف قرارداد منظورکی جائے گی، جس کے بعد انہیں پنجاب ایگزیکٹوکمیٹی کی طرف سے شوکاز نوٹس بھی بھجوایا جائےگا۔
واضح رہے کہ اعتزازاحسن کے خلاف کارروائی کا فیصلہ آصف زرداری کی ہدایت پر کیا گیا ہے۔ اس حوالے سے پی پی پنجاب کے قائم مقام صدر رانا فاروق سعید نے بدھ کو پریس کانفرنس میں کہا تھا کہ اعتزاز احسن یہ کہہ کر ملک میں جمہوریت کو پٹڑی سے اتارنے کی عمران خان کی سازش کا مکمل حصہ بن چکے ہیں کہ آرمی چیف نے شریف خاندان کو مقدمات میں سزا سے بچایا ہے۔
اسٹیٹ بینک آف پاکستان کے زرمبادلہ کے ذخائر 7 اکتوبر کو ختم ہونے والے ہفتے میں 30 کروڑ 30 لاکھ ڈالر گر کر 7 ارب 59 کروڑ 70 لاکھ پر تین سال کی کم ترین سطح تک آگئے۔
مرکزی بینک کا کہنا ہے کہ بیرونی قرضوں کی ادائیگیوں بشمول تجارتی قرضوں، سود اور یورو بانڈز کی ادائیگیوں کی وجہ سے ذخائر میں کمی واقع ہوئی۔ ہفتے کے دوران کمرشل بینکوں کے پاس رکھی گئی رقم تقریباً 3 کروڑ 90 لاکھ ڈالر کم ہو کر 5 ارب 64 کروڑ 90 لاکھ ڈالر رہ گئی۔
ملک کے مجموعی زرِ مبادلہ کے ذخائر اب 13 ارب 24 کروڑ 70 لاکھ ڈالر ہیں، جو گزشتہ ہفتے سے 34 کروڑ 20 لاکھ ڈالر کم ہیں۔ جبکہ مالی سال 19-2018 کے اختتام تک اسٹیٹ بینک کے پاس 7 ارب 29 کروڑ ڈالر کے ذخائر تھے، جو گزشتہ مالی سال کے اختتام پر 9 ارب 19 کروڑ ڈالر تھے۔
قبل ازیں یہ 2 مالی سال کے دوران 12 ارب 13 کروڑ اور 17 ارب 29 کروڑ ڈالر کی سطح تک بھی پہنچے تھے۔ ادھر گزشتہ روز انٹربینک مارکیٹ میں روپیہ 0.23 فیصد گر کر 218.38 ڈالر پر بند ہوا۔
اس سے پہلے مسلسل 13 کاروباری سیشنز میں روپے کی قدر بڑھی جو 22 ستمبر کو 239.71 سے تقریباً 22 روپے بڑھ کر 11 اکتوبر کو 217.79 سطح پر پہنچ گیا تھا۔ جبکہ اوپن مارکیٹ میں مقامی کرنسی ڈالر کے مقابلے میں 1.50 روپے اضافے سے 222 روپے پر ٹریڈ کر رہی تھی۔
ٹیکنالوجی سے نابلد ڈاکو اپنی کم علمی سے مشکل میں آ گئے، پہلے موبائل چوری کیا اور پھر اس سے سیلیفیاں بنائیں، بیرون ملک پہنچنے پر پھر تصاویر اور ویڈیوز بنائیں جوکہ مالک کے گوگل اکاؤنٹ میں پہنچ گئیں۔
تفصیلات کے مطابق 3 اگست کو ڈاکوؤں نے بہادرآباد میں ایک دکان پر ڈکیتی کی جہاں سے 2 موبائل، پرفیوم اور قیمتی گھڑیاں چرائی تھیں، اس وقت بھی ان کی شکل سی سی ٹی وی میں دکھائی دی تاہم وہ اتنی واضح نہ تھی۔
ڈاکو چوری کا موبائل فون لے کر قطر چلے گئے جہاں پہنچ کر سیلفیاں، دیگر تصاویر اور ویڈیوز بنائیں، کم عقل ڈاکوؤں کی تصاویر مالک کے گوگل اکاؤنٹ پر اپ لوڈ ہو گئیں جس میں دونوں کے چہروں کو واضح دیکھا جا سکتا ہے۔
موبائل کے مالک کا کہنا ہے کہ انہی چوروں نے دکان لوٹی تھی یہ پہلے پاکستان میں بھی تصاویر بناتے رہے ہیں اور پھر جہاز میں بیٹھ کر اور قطر پہنچ کر بھی ایئرپورٹ پر ویڈیوز بنائی ہیں۔
دکاندار کا کہنا ہے کہ اس نے ڈاکوؤں کی واضح تصاویر اور ویڈیوز بھی پولیس کو فراہم کر دی ہیں تاکہ تحقیقات کو آگے بڑھایا جا سکے۔
سوات میں امن وامان کی مخدوش صورتحال۔۔۔مولانا فضل الرحمن کاخیبر پختونخوا میں گورنر راج کا عندیہ۔۔۔صوبائی حکومت نے اپنی ذمہ داریاں نہ نبھائیں تو وفاق اپنا آئینی حق استعمال کرے گا۔۔۔مولانا فضل الرحمان
مولانا فضل الرحمان نے دعویٰ کیا ہے کہ ضمنی انتخابات میں قوم عمران خان کو بری طرح مسترد کرے گی، 16 اکتوبر عمران خان کا یوم احتساب اور خیبرپختوا حکومت میں آخری دن ہو گا۔انہوں نے اس موقع پر گورنرراج لگانے کا بھی عندیہ دیا
تفصیلات کے مطابق چارسدہ کے پڑانگ سٹیڈیم میں پاکستان ڈیموکریٹک موومنٹ (پی ڈی ایم) کا این اے 24 ضمنی انتخابات کے حوالے سے جلسہ منعقدہ کیا گیا جس میں سربراہ جمعیت علماء اسلام (جے یو آئی ف) نے خطاب کرتے ہوئے کہا کہ میں نے پچھلے دس برسوں میں عمرانی فتنہ کے خلاف فرنٹ لائن پر جنگ لڑی ہے اور یہ ایسا فتنہ ہے کہ جو مجنوں بھی ہے اور بے وقوف بھی اور جس کی پشت پناہی یہودی، قادیانی، امریکی اور بھارتی لابی کر رہی ہے۔
انہوں نے مزید کہا کہ اس فتنے کی تمام سازشوں کا مقصد پاکستان کا خاتمہ ہے جسے ہم ہر صورت ناکام بنائیں گے۔ ضمنی انتخابات میں قوم عمران خان کو بری طرح مسترد کرے گی، 16 اکتوبر عمران خان کا یوم احتساب اور خیبرپختوا حکومت میں آخری دن ہو گا۔ پی ڈی ایم امیدواروں کو انتخابات میں کامیابی کی پیشگی مبارکباد!
سربراہ جے یو آئی (ف) نے کہا کہ ہم عمران خان کو جانتے ہیں بلکہ لاس اینجلس سے ڈی چوک تک سب جانتے ہیں! اس کے خلاف جنگ قومی جذبے سے جیت کر دکھائیں گے، اسی سرزمین سے فرنگیوں کے خلاف اعلان جہاد کیا تھا اب اس فتنے کو بھی یہیں سے بھگائیں گے۔ انہوں نے کہا کہ جو شخص اپنے بچوں کو نہیں سنبھال سکتا وہ قوم کے بچے کیسے سنبھال سکتا ہے، اسے ریاست مدینہ کا نام لیتے ہوئے شرم آنی چاہیے۔
انہوں نے کہا کہ یہ شخص قوم، معیشت، پارلیمان اور جمہوریت سے مذاق کرتا رہا اور اب حقیقی آزادی کے نام پر فحاشی پھیلانا چاہتا ہے، اربوں ڈالروں کو شکست دی، یہ ملک اور اس کی معاشرت کو بچایا، اب اس کا جنازہ نکالیں گے، مینڈیٹ چوری نہیں ہونے دینگے۔ جس اسمبلی کو چھوڑ آیا اس کے لیے کس منہ سے پھر انتخابات لڑ رہا ہے۔
انکا مزید کہنا تھا کہ جو کچھ ہم نے کہا وہی اب عدالتوں، پارلیمان کے بعد صدر نے بھی تسلیم کر لیا ہے، یہ حواس باختہ ہو چکا، سی پیک کو امریکی اشارہ پر جام کیا۔
جلسے سے قائم مقام صدر اے این پی امیر حیدر ہوتی نے بھی خطاب کیا اور کہا کہ چارسدہ عمران خان کو مسترد کرے گا، ہم باچا خان اور ولی خان ے پیروکار اور ہمارا یقین پختونوں کی خدمت پر ہے۔
دریں اثنا گورنر راج کی خبروں پر ردعمل دیتے ہوئے معاون خصوصی برائے اطلاعات خیبرپختونخوا حکومت بیرسٹر محمد علی سیف کا کہنا تھا کہ امپورٹڈ حکومت صدر راج لگائے یا گورنر راج تحریک انصاف کے سونامی کو نہیں روک سکتا، یہ امپورٹڈ حکومت لانگ مارچ روکنے کے لیے اوچھے ہتھکنڈوں پر اتر آئی ہے لیکن جب اسلام آباد کی طرف رخ کرینگے تو سب کچھ بہا کر لے جائیں گے۔
تفصیلات کے مطابق رہنما پاکستان تحریک انصاف سینیٹر اعظم سواتی کا آج اسلام آباد کے پمز ہسپتال میں 4 رکنی میڈیکل بورڈ نے طبی معائنہ کیا۔ ان کا طبی معائنہ جوڈیشل مجسٹریٹ کے احکامات پر کیا گیا ہے۔ ہسپتال کی طرف سے تشکیل دیئے گئے میڈیکل بورڈ میں ڈاکٹر اسفند یار خان، ڈاکٹر فضل العزیز، ڈاکٹر لیاقت علی اور ڈاکٹر تاشفین شامل تھے جنہوں نے انہیں صحت مند قرار دے دیا ہے۔
پمز ہسپتال کی رپورٹ کے مطابق 74 سالہ سینیٹر اعظم سواتی 2016ء میں امراض قلب کے باعث ہسپتال داخل ہوئے، ان کے 3 سٹیٹ لگے ہوئے ہیں اور وہ دل کے مرض کی دوائیں استعمال کرتے ہیں، ان کا کیا گیا ایکسرے اور الٹراسائونڈ میں بھی کوئی خرابی سامنے نہیں آئی، اس وقت ان کو چھاتی میں کوئی درد نہیں۔رپورٹ میں بتایا گیا ہے کہ اعظم سواتی بلڈپریشر کے بھی مریض ہیںاور 2 میل روزانہ کی بنیاد پر واک کرتے ہیں۔
دوسری طرف پمز ہسپتال کی طرف سے جاری کی گئی رپورٹ میں تاریخ 17 اگست درج کی گئی ہے جس سے میڈیکل رپورٹ پر سنگین سوالات کھڑے ہو گئے ہیں۔ سینئر صحافی امانت گشکوری نے سماجی رابطوں کی ویب سائٹ ٹویٹر پر اعظم سواتی کی میڈیکل رپورٹ شیئر کرتے ہوئے لکھا کہ: یہ ہے اس ملک کا ہیلتھ سسٹم، ان ڈاکٹرز پر بندہ کیا یقین کرے جو میڈیکل رپورٹس بھی دو نمبر بناتے ہیں! پمز ہسپتال کی اعظم سواتی بارے میڈیکل رپورٹ کی کیا کریڈیبلٹی ہوگی جس میں تاریخ آج کی بجائے 17 اگست کی لکھی ہے، شہباز گل کو بھی میڈیکل کے لیے 17 اگست کو پمز لایا گیا تھا !!
یاد رہے کہ ایف آئی اے نے رہنما تحریک انصاف سینیٹر اعظم خان سواتی کو بدھ اور جمعرات کی درمیانی شب تین بجے ان کی رہائش گاہ سے گرفتار کر لیا جس کے بعد جمعرات کی صبح انہیں اسلام آباد کی عدالت میں پیش کیا گیا اور ان کے 7 روزہ جسمانی ریمانڈ کی استدعا کی گئی تھی۔اعظم سواتی کے وکیل بابر اعوان نے موقف اپنایا کہ ’صرف سیاسی بنیادوں پر انہیں گرفتار کیا گیا اور رات گئے بدترین تشدد بھی کیا گیا جس پر عدالت نے اعظم سواتی کا فوری طور پر پمز ہسپتال میں میڈیکل کرانے کا حکم جاری کیا تھا۔
نشتر ہسپتال ملتان میں لاوارث انسانی لاشوں کی برآمدگی سے خوف وہراس پھیل گیا جس کے بعد واقعے کی تحقیقات شروع کر دی گئی ہیں۔
تفصیلات کے مطابق نشتر ہسپتال کے ڈیڈ لائوس کی چھت سے 5 سو سے زائد لاوارث انسانی لاشوں کی باقیات برآمد ہوئی ہیں جس کے بعد میں ہسپتال میں شدید خوف وہراس پھیل گیا۔ سنگین غفلت کی نشاندہی چوہدری زمان گجر مشیروزیراعلیٰ پنجاب نے ہسپتال کے دورے کے دوران کی تھی جس کے بعد ہسپتال انتظامیہ نے تحقیقات شروع کر دی ہیں۔
ثاقب ظفر (ایڈیشنل چیف سیکرٹری جنوبی پنجاب) نے واقعے کا سخت نوٹس لیتے ہوئے انکوائری کمیٹی بنا دی ہے جو واقعے کی مکمل تحقیقات کرنے کے بعد 3 دن میں اپنی رپورٹ دے گی۔ 6رکنی انکوائری کمیٹی کی سربراہی مزمل بشیر (ایڈیشنل سیکرٹری سپیشلائزڈ ہیلتھ کیئر) کرینگے، انکوائری کمیٹی کا نوٹیفیکیشن بھی جاری کر دیا گیا ہے۔
دوسری طرف لاوارث انسانی لاشوں کی برآمدگی پر ہسپتال کے شعبہ اناٹومی کے سربراہ کا موقف سامنے آیا ہے کہ لاوارث انسانی لاشوں کو پیوری فیکیشن کے عمل سے گزارا جاتا ہے جس کیلئے انہیں چھت پر رکھا جاتا ہے۔
سربراہ شعبہ اناٹومی ڈاکٹر مریم اشرف نے تحریری طور پر وائس چانسلر نشتر میڈیکل یونیورسٹی کو تحریری طو ر پر بتایا کہ پولیس کی طرف سے پوسٹ مارٹم کیلئے لائی گئی لاوارث لاشوں کو فریز کرنا ناممکن ہوتا ہے جبکہ ان کو ٹیچنگ کے لیے بھی استعمال نہیں کیا جا سکتا۔ پیوری فیکیشن کے عمل کے بعد لاش کی ہڈیوں کو طلباء وطالبات کو سکھانے کیلئے استعمال کیا جاتا ہے اور ہڈیاں نکالنے کے بعد ہی لاشوں کی تدفین ایس او پیز کے مطابق کی جاتی ہے۔
وزیراعلیٰ پنجاب کے نوٹس لینے کے بعد نشتر میڈیکل یونیورسٹی کے قائم مقام وائس چانسلر پروفیسر ڈاکٹر مہناز خاکوانی نے بھی 3 رکنی انکوائری کمیٹی قائم کر دی ہے جس میں ڈاکٹر غلام مصطفیٰ، ڈاکٹر طارق پیرزادہ اور پروفیسر ڈاکٹر عباس نقوی شامل ہیں۔ نشترمیڈیکل یونیورسٹی کے ترجمان کے مطابق لاوارث انسانی لاشوں کو جالی سے بند کمروں میں چھت پر رکھا جاتا ہے جبکہ ٹیچنگ مقاصد کیلئے حاصل کی گئی ہڈیاں بھی قانون کارروائی کے بعد لی جاتی ہیں اور لاشوں کی تدفین متعلقہ پولیس سٹیشن کے ذریعے ہی کی جاتی ہے۔
یاد رہے کہ ہوم ڈیپارٹمنٹ کی طرف سے چند ماہ قبل سی پی او کو جاری کیے گئے مراسلے میں لاوارث لاشوں کی تدفین ایس ایچ او ملتان کینٹ کو ایس او پیز کے مطابق یقینی بنانے کا کہا گیا تھا۔
© Copyrights 2008 - 2025 Siasat.pk - All Rights Reserved. Privacy Policy | Disclaimer|
Official Siasat.pk Social Media Accounts
