پاکستان تحریک انصاف نے کارکنان کے خلاف تشدد اور کریک ڈاؤن کے باعث آئی جی پنجاب کے استعفیٰ کا مطالبہ کردیا ہے۔
تفصیلات کے مطابق پی ٹی آئی پنجاب کے عبوری صدر اور سیکرٹری جنرل حماد اظہر نے سماجی رابطے کی ویب سائٹ پر جاری کردہ اپنے بیان میں کہا ہے کہ آئی جی پنجاب کو فوری طور پر اپنے عہدے سے مستعفیٰ ہوجانا چاہیے۔
انہوں نے مزید کہا کہ آئی جی پنجاب کی نگرانی میں ہزاروں گھروں میں توڑ پھوڑ کی گئی، پولیس حراست میں متعدد افراد مارے گئے، سیکڑوں کو تشدد کا نشانہ بنایا گیا اور ہزاروں بے گناہوں کو جیلوں میں ڈالا گیا۔
حماد اظہر کے اس بیان کو شیئر کرتے ہوئے پی ٹی آئی کے اتحادی اور سابق وفاقی وزیر مونس الہیٰ نے بھی آئی جی پنجاب کے استعفیٰ کا مطالبہ کیا اور کہا کہ آئی جی پنجاب سے صرف استعفیٰ ہی نہیں لینا چاہیے بلکہ انہیں ان کے ساتھیوں سمیت ہر اقدام کیلئے ذمہ دار بھی ٹھہرانا چاہیے۔
خیال رہے کہ الیکشن کے بعد ملک بھر خصوصا پنجاب میں پولیس کی جانب سے پی ٹی آئی کارکنان اور عہدیداران کے خلاف کریک ڈاؤن کی ایک نئی لہر شروع کی گئی ہے جس میں سینکڑوں کی تعداد میں پی ٹی آئی کے کارکنان کو گرفتارکرکے جیلوں میں ڈال دیا گیا ہے۔
