عالمی بینک 2,160 میگاواٹ کے داسو ہائیڈرو پاور پراجیکٹ کیلیے ایک ارب ڈالر کا قرض فراہم کرے گا، اس میگا پراجیکٹ کی تعمیر پاکستان میں سستی بجلی کی فراہمی کیلیے انتہائی ضروری ہے۔
حکومتی ذرائع کے مطابق عالمی بینک کا بورڈ آف ڈائریکٹر جون میں اس قرض کی منظوری دے گا، مئی کے تیسرے ہفتے میں اس کی منظوری دینے کا کہا گیا تھا۔
عالمی بینک کی منصوبے سے متعلق دستاویزات میں کہا گیا کہ وہ ری کسنٹرکشن اینڈ ڈیولپمنٹ کیلیے اپنے انٹرنیشنل بینک اور انٹرنیشنل ڈیولپمنٹ ایسوسی ایشن کے ذریعے مزید ایک ارب ڈالر فراہم کرے گا، یہ عالمی بینک کی جانب سے تیسری بڑی فنانسنگ ہے۔
عالمی بینک ابتدائی کاموں کیلیے 588.4 ملین ڈالر اور ٹرانسمیشن لائنوں کی تنصیب کیلیے 700 ملین ڈالر کی منظوری دے چکا ہے, پاکستان کو سستی بجلی کے حصول کی اشد ضرورت ہے، درآمدی ایندھن سے بننے والی بجلی انتہائی مہنگی پڑتی ہے، جس کی وجہ سے پاکستان کو شدید بحران کا سامنا ہے، اور گھریلوں صارفین سمیت فیکٹریز، مساجد اور اسپتال وغیرہ نے نیشنل گرڈ سے جان چھڑا کر سولر سسٹم لگانا شروع کردیا ہے، جس سے باقی بچ رہنے والے صارفین پر بوجھ مزید بڑھ جائے گا۔
عالمی بینک کے نئے تخمینے کے مطابق منصوبے کی لاگت 13 فیصد اضافے کے ساتھ 4.3 ارب ڈالر سے بڑھ کر 4.9 ارب ڈالر ہوگئی ہے، اس منصوبے کو مکمل کرنے کا پہلا ہدف دسمبر 2021 مقرر کیا گیا تھا، نواز شریف حکومت نے 2013 میں دیامیر بھاشا ڈیم پر داسو ہائیڈرو پاور پراجیکٹ کو ترجیح دی تھی
2018 سے پہلے اس کے پہلے مرحلے کا افتتاح کرنے کے خواہش مند تھے، لیکن منصوبہ تعطل کا شکار ہوتا گیا، تاہم اب عالمی بینک نے اس کی تکمیل کی مدت 2028 مقرر کی ہے,عالمی بینک کا کہنا ہے کہ اس منصوبے کے ذریعے پاکستان کو درآمدی ایندھن کی مد میں سالانہ 1.8 ارب ڈالر کی بچت ہوگی، کاربن ڈائی آکسائیڈ کے اخراج میں 5 ملین ٹن کمی ہوگی۔
گزشتہ ہفتے حکومت نے داسو ہائیڈرو پاور پراجیکٹ کا پہلا مرحلہ موخر کر دیا، منصوبہ وزیر اعظم شہباز شریف کو بھیجنے کا فیصلہ کرلیا گیا تاکہ حقائق یا معلومات پر مبنی فیصلہ کیا جاسکے, حکومت نے داسو ہائیڈرو پاور پراجیکٹ کے لئے 486.093ارب روپے کی لاگت سے 218.5 ارب روپے کے غیرملکی زرمبادلہ کے حصے سمیت پوزیشن پیپر کو موخر کردیا ہے اور حتمی فیصلہ کرنے کے لیے اس منصوبے کو وزیر اعظم شہباز شریف کو بھیجنے کا فیصلہ کرلیا۔
پلاننگ کمیشن کی سینٹرل ڈویلپمنٹ ورکنگ پارٹی کا اجلاس پیر کو ڈپٹی چیئرمین پلاننگ کمیشن محمد جہانزیب خان کی صدارت میں ہوا جس میں داسو پراجیکٹ کی بھاری لاگت کو مدنظر رکھتے ہوئے پوزیشن پیپر منظور نہیں ہوسکا کیونکہ اس منصوبے کی منظوری کی صورت میں دیگر منصوبوں کی فنانسنگ متاثر ہوگی۔
