کراچی میں شدید بارشوں کے بعد وزیراعلی سندھ نے شہریوں سے گھروں سے باہر نا نکلنے کی اپیل کی ہے۔
تفصیلات کے مطابق کراچی شہر میں ریکارڈ بارشوں کے بعد وزیراعلی سندھ مراد علی شاہ نے شہر کے مختلف علاقوں کا دورہ کیا اور کہاکہ محکمہ موسمیات نے 5 بجے کے بعد شہر میں تیز بارش کی پیش گوئی کی ہے،آج چھٹی کا دن ہے لہذا شہری بلا ضرورت گھروں سے باہر نا نکلیں۔
انہوں نے مزید کہا کہ شہر کی صورتحال کیلئے وزراء کی ڈیوٹیاں لگادی ہیں ، میں خود بھی نگرانی کررہا ہوں، کراچی کے علاوہ حیدرآباد ، جامشورو اور بدین سمیت سندھ کے تمام شہروں کی مانیٹرنگ کررہے ہیں۔
وزیراعلی سندھ نے کہا کہ اس وقت شہر کے تمام نالے فعال ہیں، متعلقہ عملہ سڑکوں پر موجود ہے، شہری بھی بلا ضرورت باہر نا نکلیں تاکہ کسی بھی نا خوشگوار واقعہ سے بچا جاسکے۔
انہوں نے کہا کہ ہماری دعا ہے ملک کا کوئی بھی شہر نا ڈوبے، باتیں کرنے والوں کو بس مائیک نظر آتے ہیں اور وہ شروع ہوجاتے ہیں، سوشل میڈیا پر آج کل ہر کوئی ٹاپ کاصحافی بنا ہوا ہے۔
دوسری جانب بارش کے پیش نظر سندھ حکومت نے کل کو سندھ بھر میں عام تعطیل کا اعلان کر دیا۔ شرجیل میمن نے کہا کہ کل پرائیویٹ سیکٹر بھی اپنے آفسز بند رکھیں۔
