روپے کے مقابلے میں ڈالر کی قدر میں ایک بار پھر اضافہ۔۔ سٹاک مارکیٹ میں تیزی
تفصیلات کے مطابق سعودی عرب سے ملنے والی 3 ارب ڈالر کی امداد بھی روپے کو مضبوط نہ کرسکی ۔گزشتہ روز روپے کی قدر بڑھنے کے بعد آج ایک بار پھر ڈالر مضبوط ہونا شروع ہوگیا اور ڈالر کی قدر میں 31 پیسے کا اضافہ ہوگیا۔
اسٹیٹ بنک کی جانب سے جاری کردہ اعدادوشمار کے مطابق آج ڈالر کی قیمت میں 31 پیسے کا اضافہ ہوا جس کے بعد ڈالر کی قیمت 176 روپے 48 پیسے سے بڑھ کر 176 روپے 79 پیسے ہوگئی۔
دوسری جانب آج سٹاک مارکیٹ میں تیزی دیکھنے کو ملی اور کاروباری دن کے اختتام پر 572 پوائنٹس کا اضافہ دیکھنے میں آیا جس کے بعد 100 انڈیکس 43,853 پر پہنچ گیا اور شئیرز کی مالیت میں 1.32 فیصد اضافہ ہوا۔
آج ایک وقت ایسا بھی آیا جب 100 انڈیکس 44 ہزار کی نفسیاتی حد بھی عبور کرگیا لیکن 44 ہزار کی نفسیاتی حد زیادہ دیر نہ قائم رہ سکی اور کاروباری دن کے اختتام پر سٹاک مارکیٹ 43,853 پر بند ہوئی۔