وفاقی وزیر دفاع خواجہ آصف نے مصورِ پاکستان علامہ محمد اقبال کی بہو اور پوتے کے گھر چھاپے پر معافی مانگ لی ہے۔
تفصیلات کے مطابق خواجہ آصف نے اس معاملے پر معافی قومی اسمبلی اجلاس میں خطاب کرتے ہوئے مانگی اور کہا کہ میں اس واقعہ کی مذمت کرتے ہوئے معافی مانگتا ہوں۔
انہوں نے مزید کہا کہ علامہ اقبال کے مرحوم بیٹے جسٹس جاوید اقبال کی اہلیہ جسٹس ناصرہ جاوید علامہ اقبال کی بہو ہیں، ہمیں ان کا اور ان کے بیٹے ولید اقبال کے بے حد احترام ہے، میں علامہ اقبال کی بہو اور پوتے کے گھر پر پولیس کے چھاپے کی مذمت کرتا ہوں۔
واضح رہے کہ پاکستان تحریک انصاف نے اپنی حکومت گرائے جانے اور موجودہ حکومت کے خاتمے کیلئے 25 مئی کو اسلام آباد کی طرف آزادی مارچ کا اعلان کیا ہے، وفاقی و پنجاب حکومت نے تحریک انصاف کے اس مارچ کو روکنے کا فیصلہ کیا ہے۔
حکومتی فیصلے کے بعد صوبے بھر میں تحریک انصاف کے رہنماؤں و کارکنان کے خلاف آپریشن شروع کردیا گیا ہے اور ان کی گرفتاریوں کیلئے چھاپے مارے جارہے ہیں، اسی دوران ایک چھاپہ علامہ اقبال کی بہو اور پوتے ولید اقبال کے گھر پر بھی مارا گیا تھا۔