وفاقی وزیر آبی وسائل خورشید شاہ نے کہا ہے کہ اگر موجودہ حکومت استحکام سے چلتی رہی تو 15 سال بعد پاکستان قرضہ دینے والا ملک بن جائے گا۔
تفصیلات کے مطابق وفاقی وزیر نے یہ بیان تربیلا ٹی فائیو توسیع پروگرام کی سائٹ پر میڈیا نمائندوں سے گفتگو کرتے ہوئے دیا اور کہا کہ شروع سے آج تک ملک میں استحکام نہیں رہا، 1947 سے آج تک کسی حکومت کی پالیسی مسلسل نہیں چل سکی۔
انہوں نےملک میں پانی کے مسائل اور ڈیمز کی تعمیر کے حوالے سے گفتگو کرتے ہوئے کہا کہ وفاقی کابینہ میں پانی کے معاملات پر بحث ہوئی، میں پانی کے حوالے سے تمام مسائل سامنے رکھوں گا،ماحولیاتی تبدیلیوں کی وجہ سے بہت زیادہ فرق پڑرہا ہے، خطرہ ہے کہیں صورتحال 2010 جیسی نا ہوجائے، ارسا سے بھی بات کروں گا صوبوں کو پانی کی ضرورت ہے۔
تربیلا ٹی فائیو توسیع سے متعلق گفتگو کرتے ہوئے انہوں نے کہا کہ اگر 2025 تک یہ منصوبہ مکمل ہوگیا تو یہ ہماری خوش قسمتی ہوگی، پانی کی صورتحال آنے والے دنوں میں بہتر ہوگی، کسی بھی ٹنل کو بند نہیں کیا ، ہم کہتے ہیں جتنا پانی آرہا ہے وہ آگے دیتے جائیں روکا نہ جائے۔
خورشید شاہ نے کہا کہ ڈیمز بنانا درست ہے مگر عملدرآمد بھی ہونا چاہئے، کالا باغ ڈیم کا منصوبہ سیاسی ہوچکا ہے، سندھ کو بھاشا ڈیم پر اعتراض نہیں ہے تو کالا باغ ڈیم پر اعتراض کی کوئی تو وجہ ہوگی نا،کھلی زمین پر پانی کی صورت میں سونا بہہ رہا ہے ۔
اس سے قبل خورشید شاہ نے عمران خان کے بیان کی مذمت کرتے ہوئے اسے سازش سے تعبیر کیا اور کہا کہ تین ٹکڑے پاکستان کےنہیں بلکہ عمران کی سیاست کے ہوں گے۔
خورشید شاہ نے کہا کہ عمران اقتدار کی خاطر ملک دشمنی پر اتر آئے ، آج سازشی عمران کھل کر سامنے آ گیا ہے، عمران کوپاکستان کےخلاف خوفناک ایجنڈے کے تحت باقاعدہ تیارکیاگیا، عمران اور اس کے پیچھے چھپا ایجنڈا دونوں ناکام ہوں گے ۔