2013 میں کوٹ لکھپت جیل میں قید کے دوران بھارتی جاسوس سربجیت سنگھ پر حملہ کرنے والا ملزم عامر تانبا کو گھر میں قتل کردیا گیا ہے۔
تفصیلات کے مطابق لاہور کے علاقے اسلام پورہ گنگا اسٹیریٹ میں نامعلوم ملزمان نے عامر تانبا کے گھر میں گھس کر فائرنگ کردی جس سے عامر تانبا شدید زخمی ہوگیا، عامر کو تشویش ناک حالت میں اسپتال منتقل کیا گیا جہاں وہ زخموں کی تاب نا لاتے ہوئے چل بسا۔
عامر تانبا کےاہلخانہ کے مطابق عامر کو قتل سے پہلے کافی عرصے سے دھمکیاں موصول ہورہی تھیں، پولیس نے واقعہ کی اطلاع ملتے ہی علاقے کو اپنے گھیرے میں لے کر حملہ آوروں کی تلاش شروع کردی ہے، واقعہ کا مقدمہ عامر کے بھائی کی مدعیت میں درج کرلیا گیا ہےجس کے مطابق عامر کو تین گولیاں ماری گئیں، 2حملہ آور موٹرسائیکل پر سوار ہوکر آئے ،ایک نے ہیلمٹ جبکہ دوسرے نے ماسک پہن رکھا ہے۔
خیال رہے کہ عامر تانبا نے 2013 میں ساتھی قیدیوں کے ساتھ مل کر لاہور اور فیصل آباد میں بم دھماکوں میں ملوث بھارتی جاسوس سربجیت سنگھ پر حملہ کیا تھا، سربجیت سنگھ اس حملے میں شدید زخمی ہوگیا تھا جس کے بعد اسے اسپتال منتقل کیا گیا مگر وہ زخموں کی تاب نا لاتے ہوئے ہلاک ہوگیا تھا۔
سربجیت سنگھ پر حملہ کرنے والے قیدیوں نے موقف اپنایا کہ معصوم پاکستانیوں کی جان لینے والے سربجیت سنگھ پر حملہ کیا، واقعہ کا مقدمہ عامر تانبا اور مدثر کے خلاف درج کیا گیا تھا تاہم سیشن کورٹ نے اس کیس میں دونوں ملزمان کو بری کردیا تھا۔