پارلیمنٹ مدر آف انسٹی ٹیوشنز جس سے آئین پاکستان نے جنم لیا ہے: وزیر داخلہ
وزیر داخلہ رانا ثناء اللہ نے نجی ٹی وی چینل 92 نیوز کے پروگرام بریکنگ ویوز ود مالک میں گفتگو کرتے ہوئے کہا کہ آج حکومتی اتحاد کے اجلاس میں بلاول بھٹو زرداری نے جو بات کی اس پر مشاورت ہوئی ہے۔
اجلاس میں اس حوالے سے اتفاق رائے پایا گیا کہ پارلیمنٹ کے منی بل کو مسترد کرنے کے بعد سپریم کورٹ آف پاکستان نے جو فیصلہ اب کیا ہے یہ پارلیمنٹ کے معاملات میں مداخلت کے مترادف ہے، اس حوالے سے استحاق کمیٹی رپورٹ مرتب کرے۔
رانا ثناء اللہ کا کہنا تھا کہ استحقاق کمیٹی کی رپورٹ کے نتیجے میں یہ فیصلہ ہو سکتا ہے کہ محترم ججز کو پارلیمنٹ بلا کر ان کا موقف سنا جائے کیونکہ قواعدوضوابط کے مطابق کوئی ممانعت نہیں ہے کہ ججز کو پارلیمنٹ نہیں بلایا جا سکتا۔
پارلیمنٹ استحقاق کی خلاف ورزی پر کسی کو بھی طلب کر سکتی ہے، اس حوالے سے عمومی رائے پائی جاتی ہے جس کا اظہار اجلاس کے علاوہ بلاول بھٹو زرداری نے اپنی تقریر میں بھی کیا ہے۔
پروگرام کے میزبان سینئر صحافی محمد مالک کی طرف سے سوال کیا گیا کہ "استحاق کمیٹی کے طلب کرنے پر بھی اگر سپریم کورٹ کے ججز نہیں آتے تو کیا آرٹیکل 245 کے تحت سول یا عسکری اداروں کے ذریعے انہیں بلائیں گے؟ " جس پر رانا ثناء اللہ کا کہنا تھا کہ آرٹیکل 245 کی ضرورت پیش نہیں آئے گی، اس کے بغیر ہی ان کو بلایا جا سکتا ہے۔
انہوں نے کہا کہ میرا نہیں خیال کہ پارلیمنٹ میں آنے کو ججز صاحبان اپنی توہین یا سزا تصور کریں گے، پارلیمنٹ مدر آف انسٹی ٹیوشنز جس سے آئین پاکستان نے جنم لیا ہے۔ پارلیمنٹ کے آئین ہی کی بنیاد پر محترم ججز صاحبان نے حلف اٹھایا ہوا ہے، اسی بنیاد پر سپریم کورٹ آف پاکستان قائم ہے۔
پارلیمنٹ میں ججز صاحبان کو بلایا جانا ان کیلئے اعزاز ہو گا، ان کیخلاف یہاں کوئی عدالت نہیں لگے گی۔
