آپ اور متحدہ کے سپورٹرز کی اکثریت (بہت بڑی اکثریت)، خصوصا نوجوان طبقہ، یہ سمجھتا ہے کہ متحدہ کو ہرگز ہرگز پیپلز پارٹی کے ساتھ ہاتھ نہیں ملانا چاہیے۔
اصولی بنیادوں پر آپ کی یہ بات بالکل درست ہے اور ایک فیصد اس سے انحراف نہیں ہو سکتا۔
عملی بنیادوں پر مگر اسکے سنگین نتائج نکلیں گے اور یہ بات آپ کے ذہن میں صاف ہونی چاہیے۔
۔۱۔ اس وقت زرداری صاحب پورے کراچی کے سیاہ و سفید کے مالک ہیں اور تمام ابلیسی قوتوں کو متحدہ کے خلاف اپنے ساتھ ملا چکے ہیں۔
۔۲۔ پیپلز پارٹی سے کھلے تصادم کی صورت میں نہ صرف یہ کہ کراچی میں کھل کر خونریزی شروع ہو جائے گی اور لیاری اور سہراب گوٹھ اور کٹی پہاڑیوں سے کھل کر فائرنگ ہو رہی ہو گی، بلکہ پولیس اور رینجرز کا بھی کچھ پتا نہ ہو گا بلکہ ہو سکتا ہے کہ رینجرز اور پولیس والے 1992 کی طرف فقط اور فقط پھر سے مہاجروں کے خلاف آپریشن کر رہے ہوں اور حقیقی کے قاتل دہشتگرد انکی گودوں میں بیٹھے ہوں۔
۔۳۔ جماعت اسلامی منٹ نہیں لگائے گی اور وہ بھی متحدہ دشمنی میں زرداری کی ہمرکاب ہو گی۔ شاہی سید اور ذولفقار مرزا تو پہلے سے ہی بھائی بھائی بنے بیٹھے اور پر تول رہے ہیں کہ معصوم مہاجروں کی بوٹیوں کو نوچ کر چبا سکیں۔
۔۴۔ کوئی میڈیا آپ کی مدد کو آئے گا اور نہ کوئی ججز۔
اچھا چلیں متحدہ اہلیان کراچی سے یہ سب قربانیاں طلب کر لیتی ہے۔ مگر کیا اسکا کوئی مثبت نتیجہ برآمد ہو سکے گا؟
جواب ہے نہیں۔ اتنی قربانیاں دینے کے بعد بھی متحدہ مخالفین کا پروپیگنڈہ اتنا مضبوط ہے کہ وہ کراچی میں ہونے والے اس کشت و خون کا سارا الزام زرداری سے ہٹا کر دوبارہ متحدہ پر ڈال دیں گے۔ 1992 اور اسکی پوری دھائی سے یہ لوگ یہی کچھ کرتے آ رہے ہیں جہاں آج تک انکے منہ سے "ریاستی دہشتگردی" کے متعلق ایک احتجاجی لفظ نہیں نکلا، بلکہ تمام کشت و خون کو انہوں نے متحدہ کی جھولی میں ڈال دیا۔
ابھی پچھلی مہینے ہی چار دن کراچی میں گولیوں کی بارش ہوتی رہی، مگر ان لوگوں کو پھر بھی اندازہ نہیں ہو سکا کہ متحدہ کو انہوں نے ہاتھ پاوں باندھ کر اندرون سندھ کے وڈیروں کے سامنے پھینک دیا ہے۔ اور اس وقت بھی یہ لوگ اس قتل و خون کا الزام متحدہ کے سر لگا رہے تھے۔ تو ان لوگوں سے تو آپ انصاف کی کوئی توقع نہ رکھیں۔
متحدہ قیادت نے کئی بار واضح کیا ہے کہ وہ اپنی کریڈیبلیٹی کو قربان کر کے کراچی کی سٹیبیلیٹی کی خاطر پیپلز پارٹی سے بات کرنے کو تیار ہے۔ میں متحدہ قیادت پر پورا یقین رکھتی ہوں کہ وہ سچ کہہ رہی ہے اور حکومت میں انہوں نے آج تک کرپشن نہیں کی ہے اور نہ انہیں وزارتوں کا لالچ حکومت میں لا رہا ہے۔ لیکن اگر یوں پیپلز پارٹی سے ٹکراؤ کی سیاست کرنے کی بجائے تصفیہ کی سیاست برقرار رکھی جائے تو کراچی میں کم کشت و خون بہے گا۔
باقی ان مخالفین کی باتوں کو ردی کی ٹوکری کی نظر کیا کریں کہ انکی کوئی اہمیت نہیں کہ یہ فقط منافقتوں کا پلندہ ہیں۔ ہمیں ہر صورت یہ دیکھنا ہے کہ اہلیان کراچی کی بھلائی کس میں ہے اور کون سا قدم اٹھانے سے کراچی میں کشت و خون کو کم کیا جا سکتا ہے۔
ہم انسان ہیں۔ ہر چیز ہمارے بس میں نہیں۔
علی ابن ابی طالب نے فرمایا تھا کہ میں نے اپنے ارادوں کے ٹوٹنے سے اپنے رب کو پہچانا۔
رسول اللہ (ص) تین سال تک اسی مخالفت کی وجہ سے مجبور ہوئے کہ کھل کر اسلام کا پیغام نہ پھیلا سکیں بلکہ خفیہ رہنا پڑا۔
موسی علیہ السلام کی مادر کو انہیں سپرد دریا کرنا پڑ گیا کہ مجبوری انسان سے کیا کیا کام کرواتی ہے۔ کیا ہے کوئی ماں جو اپنے لخت جگر کو دریا کی موجوں کے حوالے کرے؟
پھر موسی علیہ السلام کتنہ ہی عرصہ فرعون کے ہاں کھل کر اللہ کی دعوت نہ دے سکے بلکہ اپنا ایمان چھپائے رہے۔
جناب لوط علیہ السلام کو مجبوری میں اپنی بیٹیاں ایسے کافروں کو دینے کی پیشکش کرنی پڑی جو کہ کافر ہونے کے ساتھ ساتھ لواطت جیسی برائی میں مبتلا تھے۔
آخری پیغام یہ ہی ہے کہ صبر رکھیں، صبر۔ اور دوسروں کو بھی صبر کی نصیحت کرتے رہیں۔ پتا نہیں یہ امتحان کتنا لمبا ہے۔ اللہ اہلیان کراچی کو اپنی حفظ و امان میں رکھے۔ امین۔
