خبررساں و تحقیقاتی ادارے ری پبلک پالیسی نے خود سے منسوب جعلی سروے نتائج کی حقیقت بتادی ہے، مذکورہ سروے نتائج سوشل میڈیا پر تیزی سے وائرل ہورہے تھے۔
تفصیلات کے مطابق ری پبلک پالیسی نے اپنے آفیشل ٹویٹر ہینڈل سے مسلم لیگ ن کے سابق رکن خیبر پختونخوا اسمبلی اختیار ولی کی جانب سے شیئر کردہ ایک سروے رپورٹ کو شیئر کیا، اس سروے رپورٹ پر ری پبلک پالیسی کا لوگو لگا ہوا تھا اور پیٹرن بھی وہی تھا جس پیٹرن پر ری پبلک پالیسی اپنے سرویز کے نتائج جاری کرتا ہے۔
اختیار ولی کی جانب سے شیئر کردہ پوسٹ میں مسلم لیگ ن کو آئندہ انتخابات میں سب سے زیادہ مقبولیت والی جماعت دکھایا گیا اور 71 فیصد افراد کی حمایت یافتہ جماعت قرار دیا گیا، اس کے بعد پی پی پی کو 22 جبکہ پی ٹی آئی کو صرف 8 فیصد افراد کی حمایت حاصل ہونے کا دعویٰ کیا گیا۔
ری پبلک پالیسی نے ن لیگی رہنما کی جانب سے شیئر کردہ اس سروے رپورٹ کو شیئر کرتے ہوئے کہا کہ اس جعلی سروے کا ریپبلک پالیسی سے کوئی تعلق نہیں۔ ریپبلک پالیسی نے الیکشن کیوجہ سے مارچ میں پنجاب اور اپریل میں خیبرپختونخواہ کا حلقہ جاتی سروے کیا تھا جن کی رپورٹس ہماری ویب سائٹس پر موجود ہیں۔
ری پبلک پالیسی نے حقیقی سرویز کے کچھ نتائج بھی شیئر کیے جس میں خیبر پختونخوا میں سیاسی لیڈران کی مقبولیت کے سروے میں عمران خان 64 فیصد ووٹوں کے ساتھ سرفہرست تھے، دوسری رپورٹ انتخابات کے ممکنہ تنائج سے متعلق تھی جس میں پی ٹی آئی نے115 میں سے91 نشستیں حاصل کیں۔
ری پبلک پالیسی نے اس کے بعد ایک اور بیان جاری کیا جس میں کہا گیا تھا کہ جعلی سروے رپورٹس ہمارے نام کے ساتھ متعدد اراکین اسمبلی کی جانب سے بھی شیئر کی جارہی ہیں، ہم اس حوالے سے قانونی کارروائی کا حق محفوظ رکھتے ہیں،ہمارے تمام سرویز کے نتائج ہماری ویب سائٹس پر موجود ہیں۔
- Featured Thumbs
- https://www.siasat.pk/data/files/s3/13rpenslsithssks.jpg
