محسن داوڑ کا ارشد شریف قتل سے متعلق بیان، سوشل میڈیا پر راجا پرویز اشرف سے جواب دینے کا مطالبہ
نیشنل ڈیموکریٹک موومنٹ کے سربراہ محسن داوڑ نے ارشد شریف قتل کیس کی تحقیقات کے حوالے سے اہم انکشاف کردیا ہے جس کے بعد سوشل میڈیا پر سابق اسپیکر قومی اسمبلی راجا پرویز اشرف سے جواب دینے کا مطالبہ کیا جارہا ہے۔
تفصیلات کے مطابق سابق چیئرمین قائمہ کمیٹی برائےخارجہ محسن داوڑ نے ایک انٹرویو کےد وران انکشاف کیا کہ ارشد شریف قتل کیس کی بریفنگ کیلئے سابق اسپیکر قومی اسمبلی راجا پرویز اشرف اجلاس طلب کرنے کی منظوری نہیں دیتے تھے۔
انہوں نے کہا کہ ہم نے تین بار کمیٹی کا اجلاس طلب کیا مگر اسے تینوں بار ملتوی کردیا گیا، ہم اجلاس کی تاریخ طے کرتے تھے اور ہماری فائل گھومتی رہتی تھی، اس معاملے کی تحقیقات کیلئے قائم کردہ جے آئی ٹی کے سربراہ نے دیگر افسران کے بغیر بریفنگ لینے سے انکار کیا ، اگلے اجلاس میں دیگر افسران کے بجائے آئی جی خود پیش ہوئے۔
محسن داوڑ نے کہا کہ معاملہ زیر سماعت ہونے کا جواز بنا کر بریفنگ سے معذرت کرلی گئی، وزارت خارجہ نے بھی معاملے کو وزارت داخلہ کا قرار دے کر ہاتھ اٹھالیے۔
اسپیکر کی جانب سے اجلاس طلب کرنے میں رکاوٹ پیدا کرنے کی وجوہات سے متعلق سوال کے جواب میں محسن داوڑ کا کہنا تھا کہ لازمی بات ہے کہ ان پر کوئی دباؤ ہوگا جس کی وجہ سے وہ یہ اجلاس طلب کرنے کی اجازت نہیں دیتے تھے۔
محسن داوڑ کے اس انکشاف پر سوشل میڈیا صارفین ، صحافیوں و سول سوسائٹی کی جانب سے سابق اسپیکر قومی اسمبلی راجا پرویز اشرف سے وضاحت دینے کا مطالبہ کیا جارہا ہے۔
سینئر صحاف صدیق جان نے کہا کہ محسن داوڑ کا انکشاف اس بات کا ثبوت ہے کہ ن لیگ اور پیپلزپارٹی کو ارشد شریف کے قاتلوں کا علم تھا اور ان گھٹیا، غلیظ اور مکروہ جماعتوں نے ارشد شریف کے قاتلوں کو بے نقاب ہونے سے بچایا، ان بے غیرتوں پر لعنت ہو۔
صحافی و پروڈیوسر عدیل راجا نے کہا کہ آئی جی اسلام آباد اور اسپیکر قومی اسمبلی راجا پرویز اشرف نے کیسے ارشد شریف کے قاتلوں تک پہنچنے میں رکاوٹیں ڈالیں ، اس حوالے سے محسن داوڑ کے انکشاف سنیں اور ان دونوں کا مکروہ کردار دیکھیں، یہ غلیظ ترین کردار دنیا میں ہی سزا پائیں گے۔
صحافی کامران مغل نے کہا کہ ارشد شریف کے قاتلوں اورانصاف کی راہ میں حائل عناصر کے بارے میں جاننا ہے تو محسن داوڑ کی گفتگو سنیں،اللہ ہمارے بھائی ارشد شریف کے قاتلوں کو دنیا میں ہی نشان عبرت بنا، آمین۔
پاکستان تحریک انصاف کے مرکزی رہنما فرخ حبیب نے کہا کہ قومی راجا پرویز اشرف سے جواب مانگ رہی ہے کہ آپ نےارشد شریف کے قتل پر پارلیمانی کمیٹی کا اجلاس کیوں نہیں ہونے دیا،آپ کو ایسا کرنے سے کون روک رہا تھا۔