انسداد منشیات کیلئے اسلام آباد ایئرپورٹ پر موجود (اینٹی نارکوٹکس فورس) کے عملے کے غیر قانونی اقدامات اور رشوت طلبی اور وصولی پر ادارے نے انکوائری شروع کر دی ہے۔ وفاقی دارالحکومت اسلام آباد میں واقع ایئرپورٹ کی ایک ویڈیو وائرل ہوئی جس میں اہلکاروں کو رشوت لیتے دکھایا گیا۔
ذرائع ابلاغ کی رپورٹس کے مطابق سوشل میڈیا پر وائرل ویڈیو پر ایکشن لیتے ہوئے اے این ایف نے واقعہ میں ملوث تینوں اہلکاروں کو معطل کر دیا ہے۔ ان پر بیرون ملک جانے والے پاکستانی شہری سے رشوت مانگتے اور پھر غیر ملکی کرنسی وصول کرتے دیکھا جا سکتا ہے۔
ویڈیو میں ایک اہلکار کو اپنے ساتھیوں کے سامنے مسافر سے غیر ملکی کرنسی لیتے ہوئے دیکھا جا سکتا ہے، اہلکار کو یہ کہتے ہوئے بھی سنا جا سکتا ہے کہ سامان بہت زیادہ ہے، ایک شاپر لو اور دوسرا چھوڑ دو۔
ویڈیو میں سنا جاسکتا ہے کہ اہلکار کہتا ہے کہ اگر مسافر دوسرا شاپر ساتھ لیجانا چاہتا ہے تو کوئی خدمت کرے، اہلکار کو یہ کہتے ہوئے بھی سنا جا سکتا ہے کہ بیگ میں یورو، پاؤنڈ یا کوئی اور چیز نہیں ہے؟
مسافر اے این ایف اہلکار کو 2 غیر ملکی کرنسی نوٹ دیتا ہے جنہیں وہ اہلکار اپنے پاس رکھ لیتا ہے، مسافر اہلکار سے کہتا ہے کہ اسے کھانا لینا ہے جس پر اہلکار اسے کچھ رقم رکھنے دیتا ہے۔
تاہم معاملے جاری کی گئی اے این ایف کی پریس ریلیز میں کہا گیا ہے کہ اینٹی نارکوٹکس کنٹرول کے اہلکاروں کی غیر قانونی اقدام میں ملوث ہونے کی سوشل میڈیا پر وائرل ویڈیو کی انتہائی اعلیٰ سطح کی انکوائری کے ذریعے جانچ پڑتال کی جا رہی ہے تاکہ حقائق کا پتا لگایا جا سکے۔
بیان میں مزید کہا گیا ہے کہ انکوائری کو حتمی شکل دینے تک متعلقہ حکام کو معطل کر دیا گیا ہے۔
- Featured Thumbs
- https://www.siasat.pk/data/files/s3/5anfahlkaaar.jpg
