ایف بی آر کی جانب سے زمین کی قیمتوں میں ہوشربا اضافہ وزیراعظم کیخلاف سازش ہے، سردار طاہر محمود
نجی ٹی وی چینل کے پروگرام "نیاپاکستان" میں اینکر شہزاداقبال کے ایک سوال کے جواب میں ریئل اسٹیٹ فیڈریشن کے صدر سردار طاہر محمود نے کہا کہ ایف بی آر کی جانب سے زمین کی قیمتوں میں اس قدر اضافہ کر دیا گیا ہے جو کہ سیدھی وزیراعظم کے خلاف سازش کے مترادف ہے۔
اس پر شہزاد اقبال نے سوشل میڈیا پر کہا کہ ریئل اسٹیٹ فیڈریشن کے صدر سردار طاہر محمود نے ایف بی آر کی جانب سے زمین کی قیمتوں میں اضافے کو وزیراعظم عمران خان کے خلاف سازش قرار دے دیا۔
انہوں نے کہا کہ ریئل اسٹیٹ سیکٹر اب ایف بی آر کے ساتھ نہیں صرف وزیرخزانہ کے ساتھ بیٹھے گا۔
سردار طاہر محمود نے کہا کہ یہ فیصلہ واپس نہ ہوا تو ساری مشینری لے کر جی ٹی روڈ پر بیٹھیں گے۔ ایف بی آر نے کچھ علاقوں میں زمین کی سرکاری قیمت میں مضحکہ خیز اضافہ کردیا ہے۔
انہوں نے کہا کہ اسلام آباد کےعلاقے ایف 11 میں وہ اپارٹمنٹ جس کی مارکیٹ ویلیو دو سے ڈھائی کروڑ ہونی چاہیے. اس کی ایف بی آر ویلیو مارکیٹ سے 10 گنا زیادہ یعنی 30 کروڑ روپے سے زیادہ کر دی گئی ہے۔
شہزاد اقبال نے سوال پوچھا کہ کیا ریئل اسٹیٹ سیکٹر کو اعتراض صرف یہ ہے کہ ایف بی آر نے سرکاری ریٹ کو مارکیٹ ریٹ سے بھی زیادہ کردیا ہے یا خواہش یہ ہے کہ زمین کا ایف بی آر ریٹ، مارکیٹ ریٹ کے قریب نہیں لایا جائے؟
جس پر ریئل اسٹیٹ کے صدر سردار طاہر محمود نے کہا کہ مارکیٹ ویلیوایشن ریٹ سے ایف بی آر کا ریٹ10 فیصد کم ہونا چاہیے۔ انہوں نے کہا کہ ہر علاقے میں اس کا ریٹ مختلف ہوتا ہے مگر ایف بی آر کو چاہیے کہ جو کم از کم قیمت ہے اس سے بھی 10 فیصد کم ہی ریٹ رکھے۔
- Featured Thumbs
- https://www.siasat.pk/data/files/s3/fbr-real-estate-1-11.jpg
