آرمی چیف جنرل عاصم منیر نے پیر کو ملک کی 10 اہم کاروباری شخصیات سے ملاقات کی اور وزیر خزانہ اسحاق ڈار کی موجودگی میں انہیں یقین دہانی کرائی کہ پاکستان مشکل معاشی حالات سے کامیابی سے باہر نکل آئے گا‘ ڈیفالٹ کا خطرہ ٹل چکا ہے، ملک ترقی کرے گا اور ہم ایک خوشحال قوم بن کر ابھریں گے۔
ذرائع ابلاغ سے ملنے والی اطلاع کے مطابق وزیر خزانہ اسحاق ڈار نے یقین دہانی کرائی کہ بین الاقوامی مالیاتی فنڈ کے ساتھ اسٹاف سطح کا معاہدہ بھی جلد ہوجائے گا، جس کے بعد حکومت جون میں آئی ایم ایف کا یہ پروگرام مکمل کر کے آئندہ کی معاشی حکمت عملی کے حوالے سے اپنے آپشنز دیکھے گی۔
عسکری قیادت نے دوٹوک پغام دیا ہے کہ فوج کسی صورت سیاست میں مداخلت نہیں کرے گی، سیاست دان اپنے معاملات خود حل کریں عمران خان اور دوسری سیاسی قیادت کو مل بیٹھ کر سیاسی معاملات حل کرنا ہوں گے۔
اس ملاقات میں شامل ایک تاجر رہنما نے میڈیا کو بتایا کہ ملاقات میں ملک کی معاشی و سیاسی صورتحال بارے تفصیلی تبادلہ خیال ہوا ہے البتہ موضوع کا محور ملک کی معاشی صورتحال رہی اور ملکی معیشت میں بہتری بارے اعتماد کا اظہار کیا گیا۔
ملاقات میں معاشی بے چینی، بداعتمادی اور سیاسی عدم استحکام سمیت تمام ایشوز پر کھل کر بات ہوئی جبکہ وزیر خزانہ کی جانب سے تاجر برادری کو آئی ایم ایف کے ساتھ پروگرام ٹریک پر لانے کے ساتھ ساتھ دوست ممالک کے تعاون اور مستقبل کے متوقع معاشی منظر نامے پر بھی تفصیلی تبادلہ خیال ہوا۔
اسی تاجر رہنما کا کہنا تھا کہ ملک کی سیاسی و عسکری قیادت پر یقین ہے کہ حالات مشکل ضرور ہیں مگر امید ہے ان مشکل حالات سے نکل جائیں گے اور ملک بہتری کی طرف گامزن ہے جہاں تک سیاسی عدم استحکام اور سیاسی معاملات کا تعلق ہے تو فوج یہ فیصلہ کرچکی ہے کہ اب کسی طور پر سیاسی معاملات میں مداخلت نہیں کی جائے گی۔
ذرائع کے مطابق آرمی چیف نے بزنس کمیونٹی کو پیغام دیا کہ مسائل ضرور ہیں مگر پاکستان میں سب برا نہیں ہے، مل کر ملک کو مسائل سے نکالیں گے اور آخر تک لڑیں گے جبکہ وزیر خزانہ اسحاق ڈار نے بتایا کہ آئی ایم ایف کے ساتھ پروگرام کی وجہ سے شدید مشکلات درپیش رہی ہیں اب مشکل فیصلے کرکے آئی ایم ایف کے ساتھ اسٹاف سطح کے معاہدے کے قریب پہنچ گئے ہیں امید ہے کہ اسی ہفتے معاہدہ ہو جائے گا۔
وزیر خزانہ اسحاق ڈار اور آرمی چیف کی جانب سے تاجربرادری سے بھی کہا گیا ہے کہ وہ ملک کو درپیش معاشی صورتحال سے نکالنے میں اپنا بھرپورکردار ادا کریں مشکلات ضرور آتی ہیں لیکن ہر مشکل کے بعد آسانی بھی آتی ہے پاکستان نے ماضی میں بھی بڑی بڑی مشکلات کا سامنا کیا ہے اور ان مشکلات سے کامیاب ہوکر نکلا ہے انشاء اللہ ہم اس مشکل سے بھی نکل جائیں گے۔
