مسلم لیگ ن کی سینئر نائب صدر اور چیف آرگنائزر مریم نواز شریف نے سوشل میڈیا ٹیم کو جارحانہ پالیسی اختیار کرنے کی ہدایات جاری کردی ہیں۔
خبررساں ادارے کی رپورٹ کے مطابق ماڈل ٹاؤن لاہور میں مسلم لیگ ن کی چیف آرگنائزر مریم نواز شریف کی زیر صدارت پارٹی کی سوشل میڈیا ٹیم کا اجلاس ہوا، اجلاس میں مریم نواز شریف نے سوشل میڈیا ٹیم کو ہر فورم اور پلیٹ فارم پر جارحانہ پالیسی اپنانے کی ہدایت کی۔
دوسری جانب وفاقی وزیراطلاعات اور ن لیگ کی ترجمان مریم اورنگزیب نے مریم نواز شریف کے ملک گیر تنظیمی دوروں کا شیڈول بھی جاری کردیا ہےجس کےمطابق مریم نوازشریف پارٹی کی تنظیم سازی کیلئے یکم فروری سے بہاولپور سے ملک گیر دوروں کا آغاز کریں گی۔
اس دوران مریم نواز شریف 5 فروری کو ملتان،9 فروری کو ایبٹ آباد اور 11 فروری کو اسلام آباد، 15 فروری کو ڈیرہ غازی خان،19 فروری کو راولپنڈی میں پارٹی کنونشن سے خطاب کریں گی۔
مسلم لیگ ن کی چیف آرگنائزر23 فروری کو سرگودھا پہنچیں گی جس کے بعد27 فروری کو ساہیوال ،3 مارچ کو گوجرانوالہ،7 مارچ کو شیخوپورہ،11 مارچ کو فیصل آباد،15 مارچ کو پشاور میں تنظیمی اجلاس کی صدارت کریں گی،لاہور ڈویژن میں 19 مارچ کو کنونشن اور 20 مارچ کو تنظیمی اجلاس ہوگا۔
ترجمان ن لیگ کے مطابق مریم نواز شریف 23 مارچ کو کوئٹہ اور 27 مارچ کو کراچی میں ورکرز کنونشنز سے خطاب کریں گی۔
