امریکی محکمہ خارجہ کے عہدیدار نیل ڈبلیو ہاپ نے سابق وزیراعظم عمران خان کے سازشی دعوے پر تشویش کا اظہار کردیا، انہوں نے کہا کہ سابق وزیر اعظم عمران خان کے سازشی دعوے انتہائی پریشان کن ہیں۔
روزنامہ جنگ کے مطابق نیل ڈبلیو ہاپ نے کہا کہ عمران خان کے الزامات میں صداقت نہیں،ہم پاکستان میں ایک مضبوط،جمہوری سیٹ اپ کی حمایت کرتے ہیں، ہمیں اسکی ملکی سیاست میں کوئی دلچسپی نہیں ہے، ہمیں عالمی معاملات سے نمٹنے کیلئے پاکستان کیساتھ ملکر کام کرنا ہے، یہ ایک شراکت داری ہے جو ہمارے لیے ضروری ہے۔
اٹلانٹک سٹی، نیو جرسی میں پاکستانی معالجین کے کنونشن سے خطاب کرتے ہوئے ڈائریکٹر پاکستان ڈیسک نیل ڈبلیو ہاپ نے مزید کہا کہ ایک پاکستانی وفد 25 جولائی کو دونوں ممالک کے درمیان صحت کے حوالے سے اب تک کے سب سے بڑے مذاکرات کیلئے واشنگٹن کا دورہ کریگا۔
تقریب سے خطاب میں پاکستان کے سفیر مسعود خان نے کہا کہ امریکا اور پاکستان کے تعلقات پہلے ہی مستحکم ہوچکے ہیں اور مستقبل قریب میں یہ مزید بہتر ہونے کیلئے تیار ہیں،پاکستان میں ایک بڑا اور متحرک متوسط طبقہ ہے اور سرمایہ کاری کے بہترین مواقع فراہم کرتا ہے۔
امریکا میں پاکستان کے سابق سفیر جلیل عباس جیلانی نے کہا کہ پاک امریکا تعلقات ایک مشکل مرحلے سے گزر رہے ہیں،شراکت کو ٹریک پر رکھنے کیلئے اعلی سطح کے مذاکرات کی بحالی ضروری ہے۔
گزشتہ ہفتے پاکستانی سفیر مسعود خان کی امریکی صدر جوبائیڈن سے اہم ملاقات ہوئی،پاکستان اور امریکہ کے سفارتی تعلقات کی 75ویں سالگرہ کے موقع پر ہونے والی اس ملاقات میں امریکی صدر جو بائیڈن نے پاکستانی سفیر مسعود خان سے دونوں ملکوں کے درمیان تعلقات کو مضبوط و مستحکم بنانے کے عزم کا اظہار کیا تھا۔
پاکستانی سفیر مسعود خان نے وزیراعظم پاکستان شہباز شریف کا خیرسگالی کا پیغام امریکہ کے صدر کو دیا۔ واشنگٹن میں پاکستانی سفارتخانہ میںامریکی پاکستانیوں نے سفیر پاکستان مسعود خان سے قومی امور پر تبادلہ خیال کیا تھا۔
