مجلس وحدت مسلمین کے رہنما علامہ راجہ ناصر عباس کا کہنا ہے کہ عمران خان اور تحریک انصاف کے دیگر رہنماؤں پر توہین رسالت جیسے سنگین الزامات ملکی سالمیت اور قومی امن کے لیے تباہ کن ثابت ہو سکتے ہیں۔
تفصیلات کے مطابق مسجدنبویﷺمیں حکومتی وفد کیخلاف نعرے بازی کے واقعے پر علامہ راجہ ناصر عباس کا ردعمل سامنے آگیا، انہوں نے اپنی ٹوئٹر پوسٹ میں کہا کہ عمران خان اور تحریک انصاف کے دیگر رہنماؤں پر توہین رسالت جیسے سنگین الزامات ملکی سالمیت اور قومی امن کے لیے تباہ کن ثابت ہو سکتے ہیں۔
انہوں نے کہا کہ ملک کو سیاسی انتقام کی بھینٹ نہ چڑھایا جائے، سیاسی اختلافات کو خانہ جنگی میں بدلنے کی کوشش ملک دشمن قوتوں کے عزائم کو تقویت دینا ہے۔
علامہ راجہ ناصر عباس دین و مذہب کے نام پر اپنے مخالفین کی تکفیر ، مقدسات کی توہین کا الزام لگانا ایک گھناؤنا جرم ہے،جس کی جتنی بھی مذمت کی جائے کم ہے، حکمران پاکستان کو لاقانونیت کی دلدل میں دھکیلنے سے باز رہیں۔
واضح رہے مسجد نبوی واقعہ پر فیصل آباد اٹک میں عمران خان سمیت150 افراد کے خلاف توہین مذہب کے مقدمات درج کیے گئے ہیں۔