پاکستان تحریک انصاف کے منحرف رکن قومی اسمبلی راجہ ریاض نے بڑا دعویٰ کردیا، کہتے ہیں کہ وزیراعظم عمران خان کے انتہائی قابل بھروسہ وزیراعلی پنجاب ان کو چھوڑ کر جارہے ہیں۔
تفصیلات کے مطابق نجی نیوز کے پروگرام 'کیپیٹل ٹاک' میں گفتگو کرتے ہوئے پی ٹی آئی کے منحرف رکن راجہ ریاض کا کہنا تھاکہ میں قرآن پاک پر حلف اٹھا کر کہتا ہوں کہ ایک روپےکی بھی رشوت نہیں لی، تاہم اگر عمران خان میڈیا پر آ کر قرآن پاک اٹھا کر کہہ دیں کہ میں نے رشوت لی ہے تو میں انہیں معاف کردوں گا۔
راجہ ریاض نے انکشاف کیا کہ وزیراعظم عمران خان کے پاس کوئی کارڈ باقی نہیں رہا، 2 وفاقی وزراء سمیت پی ٹی آئی کے 11 افراد عمران خان کو چھوڑ رہے ہیں، اس کے علاوہ عثمان بزدار نے بھی سیاسی جماعتوں سے ٹکٹ کیلئے رابطےشروع کر دیئے ہیں اور کہیں مقابلے میں امیدوار کھڑا نہ کرنے کا کہہ رہے ہیں، عنقریب وہ بھی وزیراعظم کو چھوڑ رہے ہیں۔
انہوں نے اپنی بات جاری رکھتے ہوئے مزید بتایا کہ 2 وزیر آنا چاہ رہے ہیں تاہم ابھی گنجائش کی وجہ سے نہیں آئے لیکن جیسے ہی گنجائش بن گئی یا ہم میں کچھ لوگ راضی ہوگئے تو شاید وہ آ جائیں۔
ان کا مزید کہنا تھاکہ ہمارے پاس ارکان کی تعداد 27 ہوچکی ہے اور مولانا فضل الرحمان کے پاس بھی 2 سے 3 جبکہ ق لیگ کے پاس بھی 3 سے 4 افراد موجود ہیں، جلد ہی تحریک عدم اعتماد میں ارکان کی تعداد 200 تک پہنچ جائے گی۔
انہوں نے کہا کہ عثمان بزدار عمران خان کو چھوڑ کر بھاگنے والے ہیں کیونکہ عمران خان کے ساتھ ساتھ بزدار کو بھی این آر او کی ضرورت ہے۔
