چیف جسٹس گلزار احمد نے اپنے آخری عدالتی دن میں فل کورٹ ریفرنس سے خطاب کرتے ہوئے کہا کہ ’بغیرکسی خوف اور دباؤ کے بحیثیت چیف جسٹس نہ صرف کیسز کے فیصلے کیے بلکہ انتظامی امور کی ذمہ داری بھی نبھائی۔‘
تفصیلات کے مطابق پاکستان سپریم کورٹ کے چیف جسٹس گلزار احمد نے منگل کو اپنے آخری عدالتی دن فل کورٹ ریفرنس سے خطاب کرتے ہوئے کہا کہ بغیرکسی خوف اور دباؤ کے بطور چیف جسٹس کے فرائض اداکیے، آئین میں چیک اینڈ بیلنس نظام موجودہے تاکہ ریاست کا ہر ستون بہترکام کرسکے۔
جسٹس گلزار کا کہنا تھا کہ جسٹس عائشہ ملک کی تعیناتی سے سپریم کورٹ میں تاریخ رقم ہوئی ہے، کورونا کے دوران بہت دباؤ تھا لیکن عدالت نے اپنا کام جاری رکھا، اسلام آباد میں ماڈل جیل کے قیام اور جیلوں میں سہولیات کی فراہمی کے لیے ہدایات دیں۔
انہوں نے بلند ترین سطح پر زیر التوا کیسز کی وجہ بتاتے ہوئے کہا کہ ’جیسے ہی چیف جسٹس کی ذمہ داری ملی کووڈ 19 کا معاملہ شروع ہو گیا۔ مجھے کام کے ساتھ ساتھ ججز اور سٹاف کی صحت کا بھی خیال رکھنا تھا۔‘
’نومبر 2011 میں سپریم کورٹ کا جج بنا جبکہ دسمبر 2019 میں بطور سپریم کورٹ کے چیف جسٹس کا حلف اٹھایا۔ ‘
اس موقع پر نامزد چیف جسٹس عمر عطا بندیال نے الوداعی ریفرنس سے خطاب کرتے ہوئے کہا کہ بطور ستائیسویں چیف جسٹس آف پاکستان جسٹس گلزار احمد کو دو چیلنجر کا سامنا رہا۔ پہلا بڑا چیلنج کرونا وبا تھی جس کی وجہ سے انصاف کی فراہمی میں مشکلات سامنے آئیں۔ کرونا وبا کے باعث مقدمات کی تعداد میں اضافہ ہوا۔
جسٹس عمر عطا بندیال نے کہا کہ سپریم کورٹ میں ججز کی تعیناتی کے معاملے پر چیف جسٹس گلزار احمد نے آزاد ججز کے نام تجویز کیے۔ پہلی خاتون جج کو سپریم کورٹ لانے کا اعزاز بھی چیف جسٹس گلزار احمد کو جاتا ہے۔ انہوں نے کہا کہ چیف جسٹس گلزار احمد نے سینٹ انتخابات اوپن بیلٹ سے کرانے کے صدارتی ریفرنس پر اہم فیصلہ دیا۔ الیکشن کمیشن آف پاکستان کو صاف اور شفاف انتخابات کے انعقاد کے لیے ٹیکنالوجی کے استعمال کا بھی حکم دیا گیا۔
جسٹس عمر عطا بندیال کا کہنا تھا کہ ججز اپنی اصلاح کرتے ہیں اسی لیے جسٹس فائزعیسٰی کیس میں اقلیت اکثریت میں بدلی، عدالتی فیصلے کے خلاف سوشل میڈیا پر طوفان مچایا گیا،سوشل میڈیا پر ججز کے خلاف ذاتی تنقید کی جا رہی ہے، جو غیر آئینی، غیر قانونی اور غیر اخلاقی ہے، بار ججز پر تنقید کے خلاف کردار اداکرے، اس سے پہلےکہ عدالت نوٹس لے۔
جسٹس عمر عطا بندیال کا کہنا تھا کہ تمام عدالتوں کو پرفارمنس آڈٹ کرنا ہوگا تاکہ کمزوریوں کی نشاندہی ہو سکے، تحقیقات اور پراسیکیوشن میں اصلاحات، مقدمات جلد نمٹانے کے لیے ضروری ہیں۔
ان کا کہنا تھا کہ غربت، بے روزگاری اور آبادی میں اضافے کے مسائل حل کرنے کے لیے تمام اسٹیک ہولڈرز کو مل بیٹھنا ہوگا،عدالت کی جہاں بھی ضرورت محسوس ہوئی اپنا کردار ادا کرے گی۔
