مسلمانوں کے تیسرے مقدس ترین مقام مسجد اقصیٰ کے خطیب وامام جناب شیخ عکرمہ سعید الصبری نے چیئرمین پاکستان تحریک انصاف و سابق وزیراعظم عمران خان کو خط لکھ دیا۔
تفصیلات کے مطابق مسلمانوں کے تیسرے مقدس ترین مقام مسجد اقصیٰ کے خطیب و امام جناب شیخ عکرمہ سعید الصبری نے چیئرمین پاکستان تحریک انصاف و سابق وزیراعظم عمران خان کو خط لکھا ہے جس میں انہوں نے پاکستان کے سب سے بڑے صوبے پنجاب کے ضمنی انتخابات میں ان کی پارٹی تحریک انصاف کی کامیابی پر انہیں مبارکباد دی۔
یہ خط سماجی رابطوں کی ویب سائٹ ٹویٹر پر پاکستان تحریک انصاف کے آفیشل ٹوئٹر اکاؤنٹ (@PTIofficial) سے شیئر کیا گیا ہے، خط پر تاریخ 20 جولائی 2022 لکھی ہوئی ہے۔
مسجد اقصیٰ کے خطیب وامام جناب شیخ عکرمہ سعید الصبری نے چیئرمین پاکستان تحریک انصاف و سابق وزیراعظم عمران خان کو خط میں لکھا کہ محترم جناب عمران خان اللہ تعالیٰ آپ کی حفاظت اور حمایت کرے۔ مسجد اقصیٰ کی مبارک فضائوں سے آپ کو صوبہ پنجاب کے ضمنی انتخابات میں کامیابی پر مبادکباد پیش کرتا ہوں۔
انہوں نے مزید لکھا کہ میں دعاگو ہوں کہ اللہ تعالیٰ آپ کی حفاظت اور مدد فرمائے اور پاکستان کو سازشوں سے بچائے رکھے۔ اللہ تعالیٰ آپ کے قدم درست سمت میں چلائیں۔ ہم بیت المقدس میں ہیں لیکن ہمارے دل آپ کے اور پوری پاکستانی قوم کے ساتھ دھڑکتے ہیں۔
انہوں نے خط کے آخر میں قرآن پاک کی سورۃ التوبۃ کی آیت نمبر 105 بھی لکھی جس کا ترجمہ ہے کہ: اور فرما دیجئے! تم عمل کرو، اب اللہ اور اس کے رسول صلی اللہ علیہ وآلہ وسلم اور مسلمان تمہارے کام دیکھیں گے۔
اس آیت کی تشریح یہ ہے کہ: اللہ تعالیٰ نے ارشاد فرمایا ’’تم مستقبل کے لئے کوشش کرو کیونکہ تمہارے اعمال کا ایک ثمر دنیا میں ہے اور ایک ثمر آخرت میں ہے کہ دنیا میں اللہ تعالیٰ اوراس کے رسول صَلَّی اللہُ تَعَالٰی عَلَیْہِ وَاٰلِہٖ وَسَلَّمَ اور مسلمان تمہارے اعمال دیکھ رہے ہیں، اگر تم اللہ تعالیٰ اور اس کے حبیب صَلَّی اللہُ تَعَالٰی عَلَیْہِ وَاٰلِہٖ وَسَلَّمَ کی اطاعت کرو گے تو دنیا میں تمہاری بڑی تعریف ہو گی اور دنیا و آخرت میں تمہیں عظیم اجر ملے گا اور اگر تم اللہ تعالیٰ اور اس کے حبیب صَلَّی اللہُ تَعَالٰی عَلَیْہِ وَاٰلِہٖ وَسَلَّمَ کی نافرمانی کرو گے تو دنیا میں تمہاری مذمت ہو گی اور آخرت میں تمہیں شدید عذاب دیا جائے گا۔
