ایف بی آر (فیڈرل بورڈ آف ریونیو) کے سابق چیئرمین شبر زیدی کا کہنا ہے کہ ہمدرد یونیورسٹی میں دیئے گئے میرے بیان کو غلط رپورٹ کیا جا رہا ہے۔
انہوں نے کہا کہ ہاں میں نے اس مسلسل کرنٹ اکاونٹ اور مالیاتی خسارے کے ساتھ دیوالیہ پن اور پریشانی کے مسائل کی نشاندہی کی تھی۔
سماجی رابطے کی ویب سائٹ ٹوئٹر پر اپنے بیان میں سابق چیئرمین ایف بی آر شبر زیدی نے کہا کہ آدھے گھنٹے کی پریزنٹیشن تھی۔ صرف تین منٹ کا کلپ چلا کر اپنا مطلب پہنانے کی کوشش کی جا رہی ہے، میں نے صرف یہ بتایا تھا کہ موجودہ کرنٹ اکاؤنٹ اور مالی خسارے کے معاملات دیوالیہ جیسی تشویش ناک صورت حال ظاہر کر رہے ہیں۔
انہوں نے مزید کہا کہ میں نے جو کہا وہ ایک بنیاد اور یقین کے ساتھ تھا۔ میں صرف یہ کہنا چاہتا ہوں کہ پوری تقریر سننی چاہیے۔
یاد رہے کہ وزیراعظم عمران خان کی حکومت میں 10 مئی 2019 سے 8 اپریل 2020 تک چیئرمین ایف بی آر کے عہدے پر فائز رہنے والے شبر زیدی نے ہمدرد یونیورسٹی کی ایک تقریب میں کہا تھا کہ پاکستان دیوالیہ ہو چکا ہے، یہ غلط بات ہے کہ ملک بڑا اچھا چل رہا ہے۔
وائرل ہونے والے کلپ میں انہوں نے کہا کہ جب آپ یہ طے کرلیں کہ ہم دیوالیہ ہوچکے ہیں اور اس سے آگے ہمیں چلنا ہے، یہ زیادہ بہتر ہے بہ نسبت اس کے کہ آپ کہیں کہ ملک اچھا چل رہا ہے، میں یہ کردوں گا، میں وہ کردوں گا، یہ سب لوگوں کو دھوکا دینے والی باتیں ہیں۔
