ارسلان خالد نے سوشل میڈیا پر ایک ٹوئٹ کے جواب میں صرف لفظ بھگوڑا کا استعمال کیا جس پر احسن اقبال فٹ سے سمجھ گئے کہ یہ تو نوازشریف کی بات کی جا رہی ہے۔
تفصیلات کے مطابق سماجی رابطے کی ویب سائٹ ٹوئٹر پر وفاقی وزیر احسن اقبال نے کسی کا نام لیے بغیر ایک ٹوئٹ کیا کہ پاکستان کا ایک ایسا لیڈر ہے جو کبھی کسی سرکاری ہسپتال میں بلڈ ٹیسٹ نہیں دے سکتا اور اسکی کیا وجہ ہو سکتی ہے؟ بوجھو تو جانیں.
جواب میں پنجاب کے وزیر انفارمیشن ٹیکنالوجی ارسلان خالد نے کہا کہ احسن صاحب کیونکہ وہ بھگوڑا ہے، لندن بیٹھا ہے اور زکام کا علاج بھی لندن سے کراتا ہے، جب پاکستان کے کسی ہسپتال جائے گا ہی نہیں تو بلڈ ٹیسٹ کیسے دے گا۔ اتنی وجہ کافی ہے یا اور بتاؤں؟
بظاہر اس ٹوئٹ کا جواب دیتے ہوئے ارسلان خالد نے بھی کسی کا نام نہیں لیا صرف لفظ "بھگوڑا استعمال کیا جس پر احسن اقبال نے ردعمل دیا کہ نواز شریف سروسز ہسپتال میں زیر علاج رہے اور کافی بلڈ ٹیسٹ ہوئے۔ کوئی اور ہے آپ کو بھی پتہ ہے۔
ارسلان خالد نے وضاحت دیتے ہوئے پھر کہا کہ احسن صاحب میں نے تو نواز شریف کا نام لیا ہی نہیں، میں نے تو بھگوڑا کہا آپ نواز شریف کو بھگوڑا کہتے ہیں؟