پاکستان تحریک انصاف کی حکومت کے آخری ماہ میں برآمدات نے ملکی تاریخ کی بلند ترین سطح کو چھوتے ہوئے نیا ریکارڈ قائم کردیا ہے۔
تفصیلات کے مطابق مارچ 2022 میں ملکی برآمدات3 ارب ڈالر سے تجاوز کرگئی ہیں جو ملکی تاریخ میں اب تک سب سےزیادہ ہے، مارچ کا یہ مہینہ سابق وزیراعظم عمران خان کی حکومت کا آخری مہینہ تھا۔
معاشی سرگرمیوں پر نظر رکھنے والے ادارے اکانومی آف پاکستان کی جانب سے جاری کردہ اعدادوشمار کے مطابق عمران خان کی حکومت کے آخری مہینے میں معاشی کارکردگی نے کمال کردکھایا۔
اس مہینے میں ایکسپورٹس نے 3 بلین ڈالر سے تجاوز کرکے ملکی تاریخ میں ریکارڈ قائم کیا، بیرون ملک سے آنے والی ترسیلات زر 2 اعشاریہ 8 بلین ڈالر سے زائد رہیں، آئی ٹی شعبے کی ایکسپورٹس کا حجم259 ملین ڈالر رہا جبکہ جون 2018 کے مقابلے میں مارچ 2022 میں امپورٹس میں صفر اعشاریہ 5 بلین ڈالر کی کمی ریکارڈ کی گئی۔
اکانومی آف پاکستان کے مطابق یہی نہیں بلکہ بہت سی نئی صنعتیں ملک میں یا تو شروعات کرنے والی ہیں یا اپنے پہلے سے موجود پراجیکٹس میں توسیع کرنے جارہی ہیں، یہ رجحان ماضی میں بہت کم دیکھنے کو ملا ہے۔
صحافی و سیاسی مبصر عدنان عادل نے کہا کہ یہ اعدادوشمار عمران خان حکومت کی اچھی معاشی پالیسیوں کا نتیجہ ہیں، عمران خان کی حکومت سے قبل 8 سال تک ماہانہ برآمدات 2 ارب ڈالر سے نہیں بڑھیں تھیں۔