خبریں

M A Malik · Dec 24, 2021

عمر کوٹ میں خاتون پر تشدد کو مذہبی رنگ دینے والے بھارت کو منہ کی کھانا پڑگئی سندھ کے علاقے عمر کوٹ میں ایک خاتون پر تشدد کی وائرل ویڈیو پر بھارت کو مذہبی رنگ دینا مہنگا پڑگیا، متاثرہ خاتون نے سامنے آکر بھارتی میڈیا اور سیاستدانوں کی اصلیت دنیا کے سامنے عیاں کردی۔ نجی چینل اے آروائی نیوز کے مطابق گزشتہ دنوں سندھ کے ضلع میر پور خاص کے علاقے عمر کوٹ میں ایک افسوسناک واقعہ پیش آیا جس کی ویڈیو بھی منظر عام پر آئی، ویڈیو میں واضح طور پر دیکھا گیا کہ ایک مسلح شخص ایک خاتون کو زبردستی گاڑی میں بٹھانے کی کوشش کررہا ہے۔ ویڈیو کے سامنے آتے ہی یہ سوشل میڈیا پر وائرل ہوگئی تاہم اس سے متعلق کچھ مقامی لوگوں نے یہ تفصیلات شیئر کیں کہ خاتون کو اغوا کرنے کی کوشش کی جارہی تھی اور مزاحمت پر اسے بالوں سے پکڑ کر تشدد کا نشانہ بھی بنایا گیا۔ تاہم صورتحال اس وقت دلچسپ ہوگئی جب بھارتی سوشل میڈیا نے اس ویڈیو کو سوشل میڈیا سے اٹھاکر بنا تصدیق کہ ایک متنازعہ معاملہ بنانے کی کوشش کی اور اسے مذہبی رنگ دیتے ہوئے یہ پراپیگنڈہ شروع کردیا کہ متاثرہ خاتون کا تعلق ہندو مذہب سے ہے اور اسے زبردستی مذہب کی تبدیلی کیلئے تشدد کا نشانہ بنایا جارہا ہے۔ معاملے پر نہ صرف بھارتی میڈیا نے پراپیگنڈہ کیا بلکہ بھارتی سیاستدانوں نے بھی بڑھ چڑھ کر اس معاملے کو ہوا دینے کی کوشش کی مگر کسی نے بھی اس معاملے کی تحقیق کرنا ضروری نہ سمجھا۔ تاہم متاثرہ خاتون نے سامنے آکر بھارتی میڈیا اور بھارتی سیاستدانوں کے گھناؤنے چہروں کو دنیا کے سامنے بے نقاب کردیا اور واقعے کی تمام تر حقیقت کھول کر سامنے رکھ دی۔ متاثرہ خاتون نے بتایا کہ وہ ہندو مذہب سے تعلق رکھتی ہیں اور شوہر کے ظلم و زیادتیوں کے خلاف عدالت سے انصاف مانگنے آئی تھی، عدالت میں ان کی درخواست پر سماعت کے بعد جب خاتون واپس جانے لگیں تو ان کے شوہر نے اپنےساتھیوں کےساتھ مل کر انہیں تشدد کا نشانہ بنایا اور اغوا کرنے کی کوشش کی۔ پولیس نے واقعے کی اطلاع ملتے ہی فوری طور پر کارروائی کرتے ہوئے متاثرہ خاتون کو اغوا کاروں کے چنگل سے بازیاب کرکے ملزمان کو گرفتار کرکے ان کے خلاف مقدمہ درج کردیا ہے۔

RashidAhmed · Dec 24, 2021

کراچی کے علاقہ شاہ لطیف ٹاؤن میں سیکیورٹی گارڈز اور ڈاکوؤں کے درمیان فائرنگ سے شدید زخمی اور بعد ازاں جاں بحق ہونے والی تین سال کی ننھی حرمین کے ساتھ کیا ہوا تھا؟ دل دہلا دینے والی فوٹیج منظرعام پر آگئی۔ نجی چینل اے آر وائی نیوز کے مطابق شاہ لطیف کے علاقے میں ننھی حرمین کے جاں بحق ہونے کے واقعے پر مختلف سوالات اٹھ گئے۔ موصول ہونیوالی فوٹیج میں مقابلے کے بعد ننھی حرمین کو زخمی حالت میں دیکھا جا سکتا ہے، حرمین کو جائے وقوع سے چند قدم دور اسپتال لے جایا گیا تھا۔ ویڈیو میں دیکھا جاسکتا ہے کہ ننھی حرمین کا بھائی شہباز اپنی بہن کوگود میں اٹھا کر اسپتال میں داخل ہوا، لیکن اسپتال کے عملے نے بچی کو طبی امداد دینے سے انکار کر دیا، جس پر شہباز ریسکیو اہل کار کے ساتھ واپس نکلا، واپسی پر ریسکیو اہل کار کو حرمین کوگود میں اٹھائے دیکھا جا سکتا ہے۔ ویڈیو میں قریب سے گزرنے والی رینجرز کی گاڑی کا ملزمان کا پیچھا کرتے بھی دیکھا جاسکتا ہے، دور جا کر رینجرز اہل کار زخمی ملزم کو گرفتار کر لیتے ہیں اور ملزم کی آنکھوں پر پٹی باندھی دیکھی جاسکتی ہے افسوسناک امر یہ ہے کہ زخمی ملزم کو اسی اسپتال لایا جاتا ہے جہاں چند منٹ قبل زخمی بچی کو لایا گیا تھا۔اس ہسپتال نے ملزم کو تو طبی امداد دیدی لیکن معصوم زخمی بچی کو نہیں دی۔ کراچی پولیس نے اس پر تفتیش کا اعلان کیا تھا لیکن کراچی پولیس کی نااہلی، ہسپتال عملے کی بے حسی 3 سالہ ننھی حرمین کی جان لے گئی جس کی تدفین کردی گئی ہے۔ واضح رہے کہ ننھی حرمین کی موت کے ساتھ کراچی میں لیڈی ایم ایل اوز کی شدید قلت کا مسئلہ بھی ابھر کر سامنے آ گیا ہے۔ خیال رہے کہ شاہ لطیف ٹاؤن میں منزل پمپ کے قریب موٹر سائیکل پر سوار ڈاکو منی مارٹ لوٹ کر بھاگ رہے تھے، اسی دوران مارٹ میں تعینات سکیورٹی گارڈز نے ان پر فائرنگ کی، جواب میں ڈاکو بھی فائرنگ کرتے رہے اور فائرنگ کے اس اندھے تبادلے کی زد میں ماموں کے ساتھ بیٹھی 3سال کی پھول جیسی حرمین آگئی، گولی اس کے نازک سر میں لگی ہے اور پار ہوگئی۔

Syeda Siddrah · Dec 24, 2021

پنجاب میں انسانیت سوز واقعہ پیش آیا، پنجاب میں خاندانی رنجش کی بنیاد پر دو خواتین کی لڑائی میں معصوم بچہ جاں بحق ہو گیا۔ تفصیلات کے مطابق یہ واقعہ فیصل آباد کے علاقے گیدڑی میں پیش آیا جہاں دو خواتین کی لڑائی نے 8 ‏ماہ کے بچے کی جان لے لی۔ سٹی پولیس کا کہنا ہے کہ 2 خواتین کے درمیان جھگڑا ہوا اور ‏نوبت ہاتھا پائی تک پہنچ گئی۔ ایک خاتون نے رشتےدار خاتون پر حملہ کیا تو دھکا دینے سے دوسری خاتون کا بیٹا ‏زمین پر گرِ کر جاں بحق ہو گیا۔ پولیس نے اطلاع ملنے پر جائے وقوعہ پر پہنچ کر ملزمہ کو حراست میں لےلیا ہے اور واقعہ کی تحقیقات شروع کر دی ہیں۔ پولیس کا کہنا ہے کہ ‏بچے کی لاش کو اسپتال منتقل کر دیا گیا ہے، ضروری کارروائی کے بعد ورثا کے حوالے کر دیا ‏جائے گا۔ دوسری جانب پھولنگر میں آٹھ سالہ گھریلو ملازمہ مالکان کے بہیمانہ تشدد سےجاں بحق ہو گئی، ملزمان مردہ حالت میں بچی کو گھر کے باہر پھینک کر فرار ہوگئے۔ پتوکی کی رہائشی 8 سالہ مصباح گوجرانوالہ میں گھریلو ملازمہ کے طور پر کام کرتی تھی جس کو مالکان نے بدترین تشدد کا نشانہ بنایا جس کے نتیجے میں بچی جاں بحق ہو گئی۔ بچی کے والدین کے مطابق بچی گوجرانوالہ میں محمد عثمان نامی شخص کےگھرکام کرتی تھی، مالکان تشدد کا نشانہ بنانے کے بعد مردہ حالت میں بچی کو گھر کے باہر پھینک کر فرار ہوگئے، مصباح کے جسم پرتشدد کے نشانات ہیں اور اسے قتل کیا گیا ہے۔

M A Malik · Dec 23, 2021

آٹھ سالہ گھریلو ملازمہ مالکان کے بہیمانہ تشدد سےجاں بحق ہو گئی، ملزمان مردہ حالت میں بچی کو گھر کے باہر پھینک کر فرار ہوگئے۔ تفصیلات کے مطابق پتوکی کی رہائشی 8 سالہ مصباح گوجرانوالہ میں گھریلو ملازمہ کے طور پر کام کرتی تھی جس کو مالکان نے بدترین تشدد کا نشانہ بنایا جس کے نتیجے میں بچی جاں بحق ہو گئی۔ بچی کے والدین کے مطابق بچی گوجرانوالہ میں محمد عثمان نامی شخص کےگھرکام کرتی تھی، مالکان تشدد کا نشانہ بنانے کے بعد مردہ حالت میں بچی کو گھر کے باہر پھینک کر فرار ہوگئے، مصباح کے جسم پرتشدد کے نشانات ہیں اور اسے قتل کیا گیا ہے۔ بچی کے والدین کی جانب سے ملزمان کے خلاف اندراج مقدمہ کی درخواست دی گئی۔ ترجمان پنجاب پولیس کے مطابق وزیراعلی پنجاب اور آئی جی پنجاب نے بچی کی ہلاکت کے واقعہ کا کل نوٹس لیا جس کے بعد فوری کارروائی کرتے ہوئے دو ملزمان کو گرفتار کر لیا گیا۔ پولیس کے مطابق واقعہ کی تحقیقات جاری ہیں۔

M A Malik · Dec 23, 2021

شاہ عبدالطیف یونیورسٹی خیرپور کی بس کو یرغمال بنا کر طالبہ کو اغوا کرنے کی کوشش ناکام خیرپور میں شاہ عبدالطیف یونیورسٹی کی بس کو یرغمال بنا کر اس میں سوار ایک طالبہ کو اغوا کرنے کی کوشش ناکام ہوگئی ہے، اس دوران7 طلبہ کے زخمی ہونے کی اطلاعات ہیں۔ خبررساں ادارے کی رپورٹ کے مطابق طلبہ کو رانی پور سے شاہ عبدالطیف یونیورسٹی لےجانے والی بس کو رانی پور قومی شاہراہ پر روہڑی کینال کے قریب 7 ملزمان نے اسلحہ کے زور پر روکااور اس میں سوار ہوکر ڈرائیور سمیت تمام افراد کو یر غمال بنالیا۔ ملزمان نے بس میں سوار ایک طالبہ کو اغوا کرنے کی کوشش کی جس پر بس میں موجود دیگر طلباء نے مزاحمت شروع کردی، ملزمان نے مزاحمت کرنے والے طلباء کو تشدد کا نشانہ بنایا جس میں 7 طلباء زخمی ہوگئے ہیں۔ تاہم طلباء کی جانب سے مزاحمت ختم نہ ہونے پر ملزمان فائرنگ کرتے ہوئے موقع سے فرار ہوگئے۔ واقعے کے بعد طلبا و طالبات کی بڑی تعداد نے رانی پور قومی شاہراہ پر دھرنا دے کر شاہراہ بلاک کردی جس کے بعد سول سوسائٹی اور انتظامیہ کی جانب سے سیکیورٹی کی یقین دہانی کے بعد طلبا ء نے احتجاج ختم کردیا۔ دوسری جانب پولیس نے ابتدائی تفتیش کے بعد کہا ہے کہ ملزمان نے بس کو اغوا کرنے یا کسی طالبہ کو اغوا کرنے کی کوشش نہیں کی ، بلکہ واقعہ طلبا کا آپس میں ایک جھگڑے کا تھا جس میں 2 طلبہ زخمی ہوگئے ، واقعے میں ملوث ملزم صفدر کی گرفتاری کیلئے چھاپے مارے جارہے ہیں۔

Rana Asim · Dec 23, 2021

حکومت کا کفایت شعاری سے بچت کا دعویٰ مگر گورنر ہاؤس خیبرپختونخوا کی حیران کن شاہ خرچیاں ایکسپریس نیوز کے مطابق مالی سال 22-2021 کی دستاویزات کے مطابق گزشتہ سال گورنر ہاؤس خیبرپختونخوا کا بجٹ 25 کروڑ 40 لاکھ روپے تھا، تاہم گورنر کے پی نے گزشتہ سال 25 کروڑ 75 لاکھ روپے زائد خرچ کئے۔ دستاویزات کے مطابق گورنر کے پی نے اپنے صوابدیدی فنڈ سے بھی ایک کروڑ روپے سے زائد خرچ کئے، اس مالی سال کے لئے گورنر ہاؤس کے خرچے کے لئے 30 کروڑ روپے سے زائد منظور کئے گئے ہیں جس میں 5 کروڑ روپے کا اضافہ ہوا ہے۔ گورنر ہاؤس کے یوٹیلیٹی بلز پر تقریباً 4 کروڑ سے زائد خرچ ہوا۔ اس سال گورنر ہاؤس کے بجلی کے بل کی ادائیگی کے لئے 3 کروڑ روپے سے زائد کا بجٹ منظور کیا گیا، گزشتہ سال بجلی کے بل میں 2 کروڑ 62 لاکھ روپے جمع کرائے گئے۔ اسی طرح گیس بل کے لئے پچھلے سال 60 لاکھ روپے رکھے گئے خرچ 87 لاکھ روپے ہوئے، اس سال گیس بل کی ادائیگی کے لئے 90 لاکھ روپے رکھے گئے ہیں، گزشتہ سال ٹیلی فون کے بلوں کی ادائیگی پر 27 لاکھ 75 ہزار روپے خرچ ہوئے تھے، اس سال مزید 28 لاکھ روپے ٹیلی فون بل کی مد میں بجٹ منظور ہوا ہے۔ گورنر خیبرپختون خوا کے سفری اخراجات میں پیٹرول اور ہوائی سفر پر گزشتہ سال تقریباً 60 لاکھ روپے کا خرچہ آیا تھا جو بجٹ سے 15 لاکھ روپے زائد تھا، جب کہ اس سال بھی گورنر ہاؤس کو تیل اور ہوائی جہاز کے لئے مزید 60 لاکھ روپے منظور کئے گئے ہیں، گورنر کے عملے نے سفری اخراجات پر 90 لاکھ روپے خرچ کئے۔ اس کے علاوہ گورنر خیبرپختونخوا نے گزشتہ سال اپنی تفریح اور تحائف پر ایک کروڑ 50 لاکھ روپے خرچ کئے، اور اس سال بھی ان کا اتنا ہی خرچ کرنے کا ارادہ ہے۔ رواں سال گورنر ہاؤس کے ملازمین کے الاؤنسز کے لئے اعداد وشمار کے بغیر (لم سم) 4 کروڑ روپے کی رقم گورنر ہاؤس کے بجٹ میں مختص کی گئی ہے۔ دستاویز کے مطابق ملازمین کو پہلے سے ملنے والے دو درجن الاؤنسز اس4 کروڑ روپے کے علاوہ ہیں، گزشتہ مالی سال میں گورنر ہاؤس کے ملازمین کے یونیفارم پر تقریباً 10 لاکھ روپے سالانہ خرچہ آیا، اور اس سال بھی ملازمین کے یونیفارم پر مزید 11 لاکھ خرچ ہوں گے، گزشتہ سال ملازمین کی گاڑیوں کی مرمت پر 30 لاکھ روپے سے زائد خرچہ ہوا۔ یاد رہے کہ گورنر ہاؤس خیبرپختونخوا کے ملازمین کی تعداد 265 سے زائد ہے، جن میں سے صرف 22 کے قریب نئے مالی بھرتی کئے گئے ہیں، پہلے گورنر ہاؤس میں 8 مالی کام کرتے تھے اور اب ان کی تعداد 30 ہو گئی ہے۔ گورنر کے پی کے ذاتی عملے میں ایک آیا، امام مسجد، مؤذن، ایک ہیڈ خدمت گار، 2 خدمت گار، 13 ڈرائیور، 17 نائب قاصد، ایک اسٹیورڈ، 14 بیئرر، 4 دھوبی، ایک براس مین، واشر مین، 2 تندورچی، 3 مالشی بھی شامل ہیں۔ گورنر ہاؤس کے لئے تقریباً 69 لاکھ روپے کے نئے پودے خریدے گئے۔

Rana Asim · Dec 23, 2021

روزنامہ جنگ کے مطابق وزیر جیل خانہ جات پنجاب فیاض الحسن چوہان نے بینظیر بھٹو کی جائے شہادت کی ٹوٹ پھوٹ پر ایکشن لے لیا۔ فیاض الحسن چوہان بےنظیر بھٹو کی جائے شہادت پر پہنچے اور وہاں ٹوٹ پھوٹ دیکھ کر بلدیہ راولپنڈی کے افسران کو موقع پر طلب کرلیا۔ مرمت میں تاخیر پر افسران کی سرزنش کی اور فوری مرمت اور بحالی کےاحکامات جاری کیے۔ فیاض الحسن چوہان نے اس موقع پر کہا کہ بینظیر بھٹو شہید بطور سابق وزیراعظم ہمارے لیے بہت قابلِ احترام ہیں، محترمہ بی بی شہید صرف پیپلزپارٹی ہی کی نہیں، تمام پاکستانیوں کی نمائندہ تھیں۔ انہوں نے کہا کہ پنجابی ہونےکے ناطےفرض ہے ہم اپنے سندھی بھائیوں سے اظہار یکجہتی کریں۔ موقع پر موجود پیپلزپارٹی ورکرز نے وزیرِ جیل خانہ جات فیاض چوہان کا شکریہ ادا کیا۔ یاد رہے کہ بے نظیر بھٹو کی جائے شہادت پر بننے والی یادگار ٹرک کی ٹکر کے باعث ٹوٹ پھوٹ کا شکار تھی۔

Rana Asim · Dec 23, 2021

بھنگ کی پہلی قانونی فصل تیار، افتتاح کردیا گیا، آج کٹائی بھی شروع کی جائے گی۔ بھنگ کی فصل روات میں کاشت کی گئی تھی جو کہ اب پک کر تیار ہوگئی ہے۔ بھنگ کی پہلی قانونی فصل کی کٹائی کیلئے آج باقاعدہ پروقار تقریب میں منعقد کی گئی جس میں میڈیا کو بھی مدعو کیا گیا، یہ منصوبہ وزارت سائنس اینڈ ٹیکنالوجی کا ہے۔ پاکستان میں کاشت کی گئی پہلی بھنگ کی قانونی فصل تیار ہوگئی، روات میں فصل کی کٹائی کا باقاعدہ افتتاح ہوا تو اس موقع پر وفاقی وزیر شبلی فراز نے کہا کہ بھنگ کی کاشت کے خلاف منفی باتیں ہوتی رہتی ہیں ہم نے ان پر توجہ نہیں دینی۔ بھنگ کی کٹائی کے آغاز پر میڈیا سے بات کرتے ہوئے وزیر سائنس و ٹیکنالوجی شبلی فراز کا کہنا تھا کہ اگست میں بھنگ کو کاشت کیا تھا، بھنگ کا سب سے مہنگا حصہ اس کا بیج ہے، اس کے بیج کے پی، بلوچستان اور گلگت سے لئے تھے، 1 ایکڑ پر بھنگ کی کاشت تین ماہ میں تیار کی گئی ہے۔ وفاقی وزیر نے کہا کہ بھنگ پر یہ تاثر ہے کہ یہ غلط استعمال ہوتی ہے، جب کہ یہ دوائیوں میں بھی کام آتی ہے، انڈسٹری میں اس کی فائبر کام آتی ہے، درآمد برآمد دونوں میں یکساں موزوں ہے، جو بھنگ سے پروڈیکٹس نکلتے ہیں وہ ڈرگ سے زیادہ منافع بخش ہیں، جب 10 گناہ منافع ہوگا تو ڈرگ میں کمی آئے گی۔ انہوں نے یہ بھی کہا کہ وزیراعظم نے زیتون کی مہم چلائی تھی اور اب اس کی پروڈکشن بھی شروع ہوگئی ہے، پہلے زیتون کا تیل ہم دیکھتے تھے کہ امپورٹ ہوتا ہے، ہماری حکومت اس قسم کے پروجیکٹس کی سرپرستی کرنا چاہتی ہے، پالیسی نہیں بنے گی قانون نہیں بنے گا تو انڈسٹری آگے نہیں جا سکتی۔ وفاقی وزیر نے یہ بھی کہا کہ وزارت ایگریکلچر ، ایف بی آر، وزارت صحت اور دیگر سٹیک ہولڈرز سے مل کر پالیسی بنائی ہے، ہم نے اپنے ملک کی ترقی دیکھنی ہے، معاشی طور پر مضبوط ہونا ہے، بھنگ کا ٹرن اوور بھی بہت تیز ہے، ہم بھنگ کی لائسنسنگ این او سی کی مدد سے کریں گے۔ انکا کہنا تھا کہ منفی باتیں ہوتی رہتی ہیں ہم نے ان پر توجہ نہیں دینی، بھنگ کی کاشت سے لوگوں کی فصلوں میں اب ورائٹی آئے گی۔ جو بھنگ کو برا سمجھتے ہیں وہ چھوٹے لیول کے لوگ ہیں۔

Rana Asim · Dec 23, 2021

اقوام متحدہ کی سلامتی کونسل نے افغانستان کیلئے قرار داد منظور کر لی ہے۔افغان عوام کیلئے پاکستانی خدمات کا اعتراف، اوآئی سی اجلاس میں دعوت پر امریکا پاکستان کا شکرگزار امریکا میں پاکستان کے مستقل مندوب منیر اکرم نے کہا کہ قرار داد کی منظوری سے افغانستان کو فوری امداد رقم فراہم کی جا سکے گی۔ افغانستان کو امداد کی فراہمی عالمی قوانین کی خلاف ورزی نہیں ہے۔ جب کہ امریکا نے افغانستان کیلئے پاکستان کی خدمات کا اعتراف کر لیا ہے۔ منیر اکرم نے کہا کہ وزیراعظم عمران خان کا ویژن اس قرارداد کیلئے اہم ثابت ہوا ہے۔ سلامتی کونسل میں یہ قرارداد امریکہ نے پیش کی تھی۔ ادھر امریکہ نے پاکستان کی کوششوں کا اعتراف کرتے ہوئے او آئی سی اجلاس میں افغانستان کے مسئلے کے حل کیلئے دیگر غیر اسلامی ممالک کو مشترکہ تعاون کی دعوت دینے پر امریکا نے پاکستان کا شکریہ ادا کیا۔ امریکی وزیر خارجہ انٹونی بلنکن نے اپنے ٹویٹ میں کہا کہ بحرانوں سے دوچار ممالک کی امداد کے حوالے سے او آئی سی کا یہ غیر معمولی اجلاس ہمارے مشترکہ مقصد اور اس پر عملدرآمد کی واضح مثال ہے۔ وزیر خارجہ بلنکن نے یہ بھی کہا کہ ہم پاکستان کا شکریہ ادا کرتے ہیں کہ اس نے افغانستان مسئلے کے حل کیلئے عالمی سطح پر امداد کی اپیل کی اور افغان عوام کیلئے اپنے تعاون کی یقین دہانی کرائی۔ دوسری جانب ترجمان دفتر خارجہ افتخار عاصم کا کہنا ہے کہ او آئی سی اجلاس کے نتائج سامنے آنا شروع ہو گئے ہیں۔ سلامتی کونسل میں متفقہ قرارداد بڑی پیش رفت ہے۔ انسانی ہمدردی کی بنیاد پر امریکا بھی مدد کیلئے آگے آ گیا ہے۔ انہوں نے کہا کہ اس اجلاس کے بعد امریکا کی پابندیوں میں دیگر ممالک اور انسانی حقوق کیلئے کام کرنے والی تنظیموں نے بھی نرمی کیلئے پیشرفت دیکھی ہے۔

M A Malik · Dec 22, 2021

زرعی ترقیاتی بینک کے برانچ مینجر طارق محمود پر خاتون کو ہراساں کرنے کا الزام ثابت ہوگیا ہے جس کے بعد انہیں نوکری سے برطرف کرنے اور 5 لاکھ روپے جرمانے کی سزا سنادی گئی ہے۔ تفصیلات کے مطابق وفاقی محتسب برائے انسداد ہراسیت(فوسپا) نے زرعی ترقیاتی بینک کی تتلے عالی گوجرانوالہ برانچ کے مینجر طارق محمود کے خلاف شازیہ منیر کو جنسی طور پر ہراساں کرنے کے الزام سے متعلق کیس کا فیصلہ سنادیا ہے۔ فوسپا کی جانب سے جاری فیصلے کے مطابق ملزم طارق محمود ہراسمنٹ کیس میں قصوروار پائے گئے ہیں لہذا انہیں وفاقی محتسب ایکٹ کے تحت سزا سنائی جاتی ہے۔ فیصلے میں طارق محمود کو نوکری سے برطرف کرنے اور شازیہ منیر کو ان کی پرانی پوزیشن پر بحال کرنے اور کا حکم دیا گیا ہے ، فیصلے میں مزید کہا گیا ہے کہ نوکری سے فارغ ہونے کے بعد سے بحالی تک شازیہ منیر کو اب تک کی تمام مراعات ادا کی جائیں۔ فوسپا کے فیصلے کے مطابق ملزم طارق محمود کو پانچ لاکھ روپے کے جرمانے کی سزا بھی سنائی گئی ہے، جرمانے کی رقم متاثرہ خاتون شازیہ منیر کو دیدی جائے گی۔ وفاقی محتسب برائے انسداد ہراسیت نے زرعی ترقیاتی بینک کی انتظامیہ کو بھی فیصلے میں ہدایات دیتے ہوئے کہا ہے کہ بینک کی تمام برانچز میں سی سی ٹی کیمروں کی انسٹالیشن کو یقینی بنایا جائے تاکہ مستقبل میں ایسے واقعات سے بچا جاسکے۔

M A Malik · Dec 22, 2021

حکومت نے سیاسی مقابلے کیلئے پنجاب میں ن لیگ کے گڑھ سمجھے جانے والے علاقوں میں ترقیاتی منصوبے متعارف کروانے کا فیصلہ کرلیا ہے۔ خبررساں ادارے اے آر وائی نیوز کی رپورٹ کے مطابق حکومت نے ایک بڑا منصوبہ تشکیل دیا ہے جس میں پنجاب کے ان علاقوں میں میگاپراجیکٹس شروع کیے جائیں گے جو علاقے مسلم لیگ ن کا گڑھ سمجھے جاتے ہیں اور ان علاقوں کیلئے حکومت ایک بڑے ترقیاتی پیکج کا بھی اعلان کرے گی۔ رپورٹ کے مطابق ان علاقوں میں شروع کیے جانے والے منصوبوں کی باقاعدہ منظوری13 دسمبر کو لاہور میں وزیراعظم عمران خان کی زیر صدارت ہونے والے ایک اعلی سطحی اجلاس میں دی گئی تھی اور ان منصوبوں میں سے متعدد کو 2023 کے انتخابات سے قبل اور چند کو آئندہ سالوں میں مکمل کرنے کا ہدف بھی طے کیا گیا ہے۔ رپورٹ میں دعویٰ کیا گیا ہے کہ وزیراعظم نے مجموعی طور پر 76 منصوبوں کی منظوری دی جن میں گوجرانوالہ، گجرات، سیالکوٹ، نارروال، اور منڈی بہاؤ الدین سمیت ن لیگ کے مضبوط حلقوں کیلئے سڑکیں، فلائی اوورز، یونیورسٹیز سمیت دیگر اہم ترقیاتی منصوبے شامل ہیں۔ رپورٹ میں کہاگیا ہے کہ سب سے بڑا ترقیاتی پیکج گوجرانوالہ ڈویژن کیلئے دیا گیا ہے جس میں 125 ارب روپے کے ترقیاتی منصوبے شامل ہیں جبکہ اس پیکج میں 71 ارب روپے سڑکوں اور فلائی اوورز کی تعمیر پر خرچ کیے جائیں گے ، 26 ارب روپے کی لاگت سے گوجرانوالہ، حافظ آباد، منڈی بہاؤالدین اور سمبڑیال میں میں چار یونیورسٹیاں تعمیر کی جائیں گی۔ خبررساں ادارے کے مطابق وزیراعظم عمران خا ن نے گجرات میں نیو انڈسٹریل اسٹیٹ کی تعمیر کیلئے1 ارب 30 کروڑ ، سرجیکل سٹی سیالکوٹ کیلئے1 ارب 70 کروڑ، ہائی پرفارمنس کرکٹ اکیڈمی سیالکوٹ کیلئے 50 کروڑ اور مختلف شہروں میں گندم اور چاول کی پیداوار بڑھانے کیلئے2 ارب99 کروڑ روپے مختص کرنے کی بھی منظوری دی ہے۔

Syeda Siddrah · Dec 22, 2021

سینئر صحافی اور تجزیہ کار عارف حمید بھٹی نے بڑا انکشاف کر دیا، کہتے ہیں کہ سابق صدر آصف علی زرداری نے دعویٰ کیا ہے کہ ان سے آفر کے لئے رابطے کئے جارہے ہیں مگر ان کے پاس ایسی کوئی آفر نہیں آئی۔ نجی نیوز چینل کے پروگرام "خبر ہے" میں گفتگو کرتے ہوئے سینئر تجزیہ کار عارف حمید بھٹی نے انکشاف کیا کہ پیپلز پارٹی کے شریک چیئرمین آصف علی زرداری کا کہنا ہے کہ انہیں آفر کی جارہی ہے، اب کوئی ان سے یہ پوچھے کہ کبھی یہ کہتے ہیں کہ اسٹیبلشمنٹ بری ہے، ہر معاملے میں مداخلت کرتی ہے، کبھی یہ ایسے دعوے کر رہے ہیں کہ ان کو آفر دی جارہی ہے، ان کی منتیں کی جارہی ہیں، اور یہ آگے سے شرط رکھ رہے کہ پہلے منتخب وزیراعظم کو ہٹایا جائے پھر دیکھیں گے۔ عارف حمید بھٹی نے اپنی بات جاری رکھتے ہوئے کہا کہ جیسے بھی ہیں وہ منتخب وزیراعظم ہیں، 5 سال کا مینڈیٹ ہے وہ کیسے ان کو گھر بھیج سکتے ہیں۔ سینئر صحافی نے آصف زرداری پر شدید تنقید کرتے ہوئے سوال کیا کہ ان سے کوئی پوچھے کہ آخر ان کو کون آفر دے رہا ہے، اب وہ کس منہ سے کہہ رہے ہیں کہ میرے پاس ملنے آرہے ہیں، جہاں تک میری معلومات ہیں ان کے پاس ایسی کوئی آفر نہیں آئی، یہی تھے جنہوں نے اس ملک کی اینٹ سے اینٹ بجانی تھی، تم تین سال کے لئے آئے اور پھر بھاگ گئے، میری معلومات کے مطابق آصف علی زرداری کو وفاقی حکومت کی کوئی آفر نہیں ہے اور اگر مسلم لیگ ن کو ہوئی بھی تو شہباز شریف کو ہوگی۔ انہوں نے مزید کہا کہ پیپلز پارٹی پنجاب میں کتنے ووٹ لے سکے گی، کے پی میں کتنی سیٹیں جیتی ہیں، اس پر پروگرام کے اینکر سعید قاضی نے کہا کہ 133 اور خانیوال میں ووٹ بینک تو دیکھا ہی ہے تو پیپلز پارٹی کو کم نہ سمجھیں۔ پی ڈی ایم حوالے سے بات کرتے ہوئے تجزیہ کار طاہر ملک کا کہنا تھا کہ مولانا کہ پیپلز پارٹی اور ن لیگ دونوں سے ایک ہی ڈیمانڈ ہے کہ آپ لوگ مارچ کریں عمران خان ابھی سیاسی طور پر کمزور ہیں، انہوں نے نئے فارمولے کے تحت بھی شہباز شریف اور آصف زرداری سے یہی کہا ہے کہ عمران خان تین سالوں میں اس سے زیادہ کمزور پوزیشن میں کبھی نہیں ہوئے، مولانا نے مزید کہا ہے کہ اگر آئندہ مارچ تک مارچ نکالی جائے تو اس گیس کی لوڈشیڈنگ اور مہنگائی کی وجہ سے فائدہ حاصل ہو گا۔

Syeda Siddrah · Dec 22, 2021

اسلام آباد میں خواتین کو ویڈیو بنا کر ہراساں کرنے والا شخص سینیٹ کا گریڈ 18 کا سرکاری افسر نکلا، افسر کو معطل کردیا گیا۔ تفصیلات کے مطابق خواتین کو ویڈیو بنا کر ہراساں کرنے والا شخص رانا اظہر سینیٹ کی قانون سازی برانچ کا گریڈ 18 کا ملازم ہے، یہ واقعہ اسلام آباد میں پیش آیا تھا اور سوشل میڈیا پر ویڈیو وائرل ہونے کے بعد وفاقی دارالحکومت کی پولیس نے بھی نوٹس لے لیا، پولیس نے خواتین سے رابطہ کیا اور ہراسگی کی دفعات کے تحت مقدمہ درج کر لیا۔ خاتون نے ایف آئی آر میں مؤقف اپنایا کہ وہ اے ٹی ایم پر آئی تو ملزم نے ویڈیو بنانا شروع کردی، جب انہوں نے ویڈیو بنانے والے شخص سے پوچھا کہ وہ ویڈیو کیوں بنا رہا ہے تو اس شخص نے سوری کہہ کر ویڈیو بنانے کا اعتراف کیا اور دوڑ لگا دی۔ دوسری جانب چیئرمین سینیٹ صادق سنجرانی نے سینیٹ کی قانون سازی برانچ کے گریڈ 18 کے افسر رانا اظہر کو معطل کر دیا۔ علاوہ ازیں چیئرمین سینیٹ نے رانا اظہر کیخلاف مزید تحقیقات کا حکم بھی دے دیا۔ واضح رہے کہ گزشتہ روز سوشل میڈیا پر ایک خاتون نے ایک 14 سیکنڈز کی ویڈیو پوسٹ کی تھی جس میں ایک شخص کو اے ٹی ایم کے باہر دکھایا گیا تھا۔ ویڈیو میں خاتون ایک شخص سے پوچھتی ہیں کہ وہ ان کی ویڈیو کیوں بنا رہا ہے جس کے بعد وہ شخص موقع سے فرار ہوجاتا ہے۔

M A Malik · Dec 22, 2021

سنگ دل انسان کی جانب سے سخت سردی کے موسم میں کھیتوں میں بے آسرا چھوڑی جانے والے نوزائیدہ بچی کو کتیا اور اس کے چھوٹے بچوں نے بچالیا۔ انسان کی سنگ دلی اور جانور کی رحم دلی سے بھرپور یہ واقعہ بھارتی ریاست چھتیس گڑھ کے ایک گاؤں سریستال میں پیش آیا جہاں کسی سنگ دل انسان نے کچھ گھنٹوں کی بچی کو برہنہ حالت اور سخت سردی کے موسم میں ایک کھیت کے بیچ و بیچ بے یارومدگار مرنے کیلئے چھوڑ دیا تھا۔ تاہم اس بچی کو پیدا کرنے والے اس کی زندگی منظور تھی اور اسی پاک ذات نے اس بچی کی حفاظت کیلئے ایک کتیا کو بھیجا جس نے نہ صرف بچی کی حفاظت کی بلکہ اس انسان کی بچی کو اپنے بچوں کے ساتھ لٹا کر اس کے جسم کو ضروری حرارت بھی مہیا کی۔ بھارتی میڈیا رپورٹس کے مطابق چند گھنٹو ں کی اس بچی جس کے تن سے آنول نال کا ٹکڑا بھی جڑا ہوا تھا جسے رات کی تاریکی میں کسی نے اپنی جان چھڑوانے کیلئے بنا کپڑوں اور بنا کسی حفاظت کے کھیتوں میں پھینک دیا کہ موسم کی سختی یا کوئی جنگلی جانور رات میں ہی اس معصوم ننھی جان کا خاتمہ کردے گا۔ مگر خونخوار کتوں نے بجائے اس بچی کی جان لینے کے اسے بچایا اور کتے کے چھوٹے چھوٹے بچوں نے ساری رات بچی کےجسم سے جڑ کر اسے سردی سے بھی محفوظ رکھا یہاں تک کہ صبح ایک کسان اس بچی کے رونے کی آواز سن کر متوجہ ہوگیا اور اس نے بچی کو صحیح سلامت حالت میں اٹھا کر پولیس کو اطلاع دی۔ پولیس نے فوری طور پر بچی کو اپنی تحویل میں لے کر اسے قریبی اسپتال منتقل کیا جہاں سے ضروری طبی امداد کے بعد اکنکشا میں رکھا گیا، پولیس بچی کے لواحقین کی تلاش اور اسے کھیتوں میں پھینکنے والےکو ڈھونڈنے کیلئے تفتیش کررہی ہے۔

Rana Asim · Dec 22, 2021

خیبرپختونخوا کے ضلع لوئر دیر میں تیمر گرہ کے سابق سینئر سول جج پر کچھ عرصہ قبل جنسی زیادتی اور رشوت طلب کرنے کے الزامات لگانے والی خاتون کو پولیس نے الزامات ثابت نہ ہونے پر گرفتار کر لیا۔ تفصیلات کے مطابق خاتون کی جانب سے لگائے گئے الزامات کسی طرح بھی ثابت نہ ہوئے تو جج جمشید کنڈی کی درخواست پر مدعی خاتون کو گرفتار کر لیا گیا۔ یاد رہے کہ لڑکی ڈینٹل سرجری کی طالبہ ہے جس نے جج جمشید کنڈی پر مبینہ زیادتی کا الزام لگایا تھا جو کہ ثابت نہ ہو سکا۔ اس کیس سے متعلق ڈی پی او لوئر دیر عرفان اللہ نے کہا تھا کہ لڑکی چترال کی رہائشی ہے اس نے جج پر الزام لگایا تھا کہ جج نے نوکری دلوانے کیلئے رشوت طلب کی تھی۔ لڑکی نے کہا تھا کہ جج جمشید کنڈی نے ملازمت کا جھانسہ دیکر لاکھوں روپے کے زیورات لیے تھے، زیورات واپس کرنے کے بہانے اپنے ساتھ گھر لے گیا، ملزم نے کہا کہ میرے ساتھ چلو اور سامان واپس لے لو، جمشید کنڈی مجھے سرکاری بنگلہ میں لے گیا اور مجھے کہا کہ میری جنسی خواہش پوری کرو، انکار کیا تو میرے ساتھ زنا بالجبر کیا ،زیورات اور رقم بھی واپس نہیں کی۔ ہائیکورٹ نے سول جج کو معطل کر کے او ایس ڈی بنا دیا تھا جبکہ پولیس کے مطابق الزام ثابت نہ ہونے پر سیشن کورٹ نے سابق سول جج کو رہا کر دیا ہے۔

M A Malik · Dec 22, 2021

پنجاب اسمبلی میں پاکستان مسلم لیگ ن کے رکن کی جانب سے سرکاری افسران کی عالیشان رہائش گاہوں کو پارکس میں تبدیل کرنے کی تجویز سامنےآ ئی ہے۔ نجی خبررساں ادارے کی رپورٹ کے مطابق پنجاب اسمبلی کے اجلاس کے دوران مسلم لیگ ن کے رکن میاں طاہر کی جانب سے یہ تجویز سامنے آئی اور انہوں نے اس تجویز کو سامنے رکھتے ہوئے صوبے میں سرکاری افسران کی بڑی بڑی عالیشان رہائش گاہوں کی نشاندہی بھی کی۔ ایوان میں تقریر کرتے ہوئے میاں طاہر نے کہا کہ سرکاری افسران 12، 12 ایکڑ کی رہائش گاہوں میں رہتے ہیں ان رہائش گاہوں کو عوام کیلئے مختص کیاجانا چاہیے، ان رہائش گاہوں کو پبلک پارکس میں تبدیل کیا جاسکتا ہے جہاں عوام سیر و تفریح کرسکیں اور یہ بڑی بڑی رہائش گاہیں عوام کی سہولت بن سکیں۔ رکن پنجاب اسمبلی نے مزید کہا کہ ان رہائش گاہوں کے بجائے سرکاری افسران کو ایک کنال کے رقبے پر کوٹھیاں بناکر دی جانی چاہیے۔ میاں طاہر کی تجویز پر پارلیمانی سیکرٹری نے ایوان میں کھڑے ہوکر اعتراف کیا کہ واقعی ایسا ہے کہ سرکاری افسران بڑی بڑی رہائش گاہوں میں رہتے ہیں، میاں طاہر نے ایک اچھے معاملے کی جانب نشاندہی کی ہے۔ انہوں نے کہا کہ افسران کو چھوٹی رہائش گاہوں میں منتقلی کیلئے قانون میں ترمیم کرنا ہوگی، ایوان کو یقین دلاتے ہیں کہ حکومت اس معاملے پر ضرور غور کرے گی۔ معاملے پر ڈپٹی سیکرٹری پنجاب اسمبلی نے پارلیمانی سیکرٹری کو ہدایات دیں کہ اگر یہ تجویز اچھی ہے تو سسٹم کو بدلنے کیلئے قانون میں ترمیم کریں۔

Syeda Siddrah · Dec 22, 2021

معروف صحافی اور تجزیہ کار عارف حمید بھٹی نے کہا کہ خیبرپختونخوا میں بلدیاتی انتخابات میں پاکستان تحریک انصاف کو بڑی شکست سے دوچار ہونے کے باوجود وزیراعظم عمران خان نے سبق نہیں سیکھا، اب وہ عثمان بزدار سے مشاورت کریں گے۔ تفصیلات کے مطابق نجی نیوز چینل کے پروگرام 'خبر ہے' میں بات کرتے ہوئے سینئر تجزیہ کار عارف حمید بھٹی کا کہنا تھا کہ پرسوں رات میں اپنے کچھ پی ٹی آئی سے منسلک دوستوں کے ساتھ بیٹھا تھا تو میرا خیال تھا کہ وزیراعظم عمران خان نے کے پی میں بدترین شکست ک سے کچھ سیکھیں گے لیکن انہوں نے کچھ نہیں سیکھا۔ سینئر صحافی نےوزیراعظم عمران خان کو شدید تنقید کا نشانہ بناتے ہوئے کہا کہ اب ملک کا وزیراعظم یہ فیصلے کرے گا کہ کونسلر کس کو رکھنا ہے، پی ٹی آئی حکومت اسی لئے تو ڈوب رہی ہے کیونکہ وزیراعظم صاحب سارا کمانڈ اپنے ہاتھ میں لینا چاہ رہے، بجائے اس کے کہ آپ اپنی غلطی سے اصلاح کریں اور سمجھ جائیں کہ مہنگائی کی وجہ سے آپ کی شکست ہوئی ہے، جہاں اور بہت سی وجوہات ہیں وہاں مہنگائی بھی ایک بڑی وجہ ہے۔ عارف حمید بھٹی نے مزید کہا کہ وزیراعظم صاحب کو کیا پتا کہ یونین ناظم کون ہے، کونسلر کون ہے، اب وہ یہ کہہ رہے ہیں کہ جمعرات کو آؤں گا اور وزیراعلی پنجاب سے مشاورت کروں گا کہ کونسے ناظم لانے ہیں۔ دوسری جانب اسی موضوع پر گفتگو کرتے ہوئے تجزیہ کار طاہر ملک کا کہنا تھا کہ میرا خیال ہے کہ عمران خان صاحب کا اسٹیبلشمنٹ سے ہڈن یعنی پوشیدہ معاہدہ یہ ہوا تھا کہ اکنامی آپ ہی دیکھیں گے اور میں بس احتاسب کا کام کروں گا جو وہ کر رہے ہیں،انہوں نے اقتدار میں آتے ہی کہا تھا کہ میں ایک کمیشن بناؤں گا جو بتائے گی کہ نواز شریف اور آصف زرداری نے ملک کا کتنا پیسہ کھایا، آج تین سال ہو گئے ہیں بالکل خاموشی ہے، دیکھ لیں کہ اب تک جتنے بھی بحران آئے عمران خان صاحب کو خود آ کر فیصلے لینے پڑے جیسے رنگ روڈ والا مسئلہ، چینی کا بحران، پیٹرول کا بحران۔ انہوں نے مزید کہا کہ اب تک آپ تین وزیرخزانہ بدل چکے ہیں، آپ کو بس یہی آتا ہے جو آپ کر رہے ہیں۔ واضح رہے کہ وزیراعظم عمران خان نے خیبرپختونخوا کے بلدیاتی انتخابات میں شکست کی وجہ غلط امیدواروں کا انتخاب قرار دیا تھا ۔ ٹوئٹر پر جاری بیان میں وزیراعظم عمران خان نے کہا کہ تحریک انصاف نے پختونخوا بلدیاتی انتخابات کے پہلے مرحلے میں غلطیاں کیں اور خمیازہ بھگتا۔ انہوں نے کہا کہ غلط امیدواروں کا انتخاب ایک کلیدی سبب تھا، اب سے میں پختونخوا کے دوسرے مرحلے سمیت ملک بھر میں بلدیاتی انتخابات کےحوالے سے تحریکی حکمت عملی کی بذات خود نگرانی کروں گا۔

Rana Asim · Dec 21, 2021

لاہور ہائیکورٹ میں سانحہ ساہیوال میں ملزمان کی بریت کے خلاف دائر اپیل پر سماعت ہوئی، عدالت نے سانحہ ساہیوال کے متاثرہ بچوں کو ذاتی حیثیت میں طلب کرلیا۔ عدالت نے مقتول کے بھائی جلیل پر اظہار برہمی کیا۔ عدالت نے کہا کہ آپ نے سانحہ ساہیوال کے بعد میڈیا پر بڑا شور مچایا، عدالتوں پر کیسز کا بوجھ ڈال دیتے ہوئے ملزمان کے ساتھ صلح کرلی گئی، لاہور ہائیکورٹ نے کیس کی سماعت 17 جنوری تک ملتوی کردی۔ واضح رہے کہ دہشت گردی عدالت کے فیصلے کے خلاف پنجاب حکومت نے اپیل دائر کر رکھی ہیں۔ یاد رہے کہ سی ٹی ڈی نے ساہیوال میں کارسواروں کو فائرنگ کا نشانہ بنایا تھا جس میں ایک فیملی سوار تھی، کمسن بچوں کے سامنے ان کے والدین کو گولیاں ماری گئی تھیں۔ سپریم کورٹ میں دائر درخواست میں کہا گیا کہ جے آئی ٹی تحقیقات نے کیس کی شکل بدل دی، سانحہ ساہیوال کی تفتیش حقائق کو مدنظر رکھ کی نہیں کی گئی۔ جے آئی ٹی نے ویڈیوز سمیت دیگر شواہد ملحوظ خاطر نہیں رکھا، اہم گواہوں کو بھی زیر غور نہیں لایا گیا۔ سپریم کورٹ میں مقتول کے بھائی کی جانب سے دائر درخواست میں مزید کہا گیا کہ جائے وقوعہ سے شواہد اور گولیوں کے خول قبضے میں نہیں لیے گئے۔ درخواست میں استدعا کی گئی کہ سپریم کورٹ واقعے کی تحقیقات کے لئے جوڈیشل کمیشن قائم کرے۔ جب کہ سانحہ ساہیوال اور انسداد دہشت گردی عدالت لاہور نے تمام ملزمان کو بری کرنے کا حکم دے دیا تھا،عدالت نے تمام ملزمان کو شک کا فائدہ دیتے ہوئے بری کرنے کا حکم دیا، ملزمان کے وکلا کی سرکاری گواہوں کے بیانات پر جرح مکمل کی گئی تھی۔

Rana Asim · Dec 21, 2021

وزارت خزانہ کے ترجمان مزمل اسلم نے کہا کہ پروپیگنڈا کیا جا رہا ہے کہ روپے کی قدر میں امریکی ڈالر کے مقابلے میں کمی ہوئی ہے۔ انہوں نے موجودہ سال میں روپے کا ڈالر سمیت دیگر کرنسیوں سے موازنہ کرتے ہوئے ایک گراف بھی شیئر کیا۔ ترجمان وزارت خزانہ مزمل اسلم نے سماجی رابطے کی ویب سائٹ ٹوئٹر پر کہا کہ رواں سال میں دنیا کی صف اول کی گرتی ہوئی کرنسیوں کی آج تک کی صورتحال پیش کی گئی ہے اس گراف میں دکھایا گیا ہے کہ پاکستانی روپیہ تھائی بھٹ، سویڈش کرونا، برازیل رئیل، جاپانی ین، جنوبی کورین وون اور یورو کے ساتھ مثاوی شرح سے گر رہا ہے۔ مگر واضح رہے کہ انہوں نے اس گراف کا کوئی مصدقہ لنک یا کوئی سورس نہیں دیا جہاں سے اس کو دیکھا جا سکے کہ یہ کس تناظر میں روپے کے گرنے سے متعلق کہا جا رہا ہے۔ جس پر صارفین نے ان سے اس سے متعلق سوال بھی کیا مگر اس پر انہوں نےکوئی جواب نہیں دیا۔ اس گراف کو غور سے دیکھا جائے تو پتہ چلتا ہے کہ آج تک کی تاریخ میں کیوبا پیسو ڈالر کے مقابلے میں 96 فیصد تک گرا، جب کہ اس کے بعد لیبیا کا دینار آتا ہے جس میں 71 فیصد گراوٹ ہے۔ تیسرے نمبر پر ترکی کا لیرا ہے جو کہ 45 فیصد تک گرا ہے۔ اس گراف میں پاکستانی روپے میں 10 فیصد گراوٹ دکھائی گئی ہے اور اس شرح پر تھائی بھٹ، پروویئن سول، سویڈش کرونا، برازیل ریئل و دیگر موجود ہیں۔

RashidAhmed · Dec 21, 2021

اسلام آباد ہائی کورٹ نے وزیرِ اعظم عمران خان کی 2018ء میں دائر نا اہلی کی پٹیشن واپس لینے کی متفرق درخواست منظور کرتے ہوئے پٹیشن خارج کر دی۔ اسلام آباد ہائی کورٹ میں چیف جسٹس اطہر من اللّٰہ اور جسٹس ارباب محمد طاہر پر مشتمل بنچ نے وزیرِ اعظم عمران خان کی نا اہلی کے لیے 2018ء میں دائر کی گئی پٹیشن اور متفرق درخواست پر سماعت کی تھی اور پٹیشن خارج کرنے فیصلہ سنا دیا۔ واضح رہے کہ پٹیشنر عبدالوہاب بلوچ نے عمران خان کی نا اہلی کے لیے ہائی کورٹ سے رجوع کیا تھا۔ جس میں انہوں نے کیلیفورنیا کے ایک فیصلے کا حوالہ دیتے ہوئے دعویٰ کیاتھا کہ وزیراعظم عمران خان صادق اور امین نہیں رہے درخواست میں استدعا کی گئی تھی کہ عمران خان کو صادق اور امین نہ ہونے کے باعث نا اہل قرار دیا جائے۔ پٹیشنر عبدالوہاب بلوچ گزشتہ عام انتخابات میں سابق چیف جسٹس افتخار چوہدری کی جماعت پاکستان جسٹس اینڈ ڈیمو کریٹک پارٹی کے امیدوار تھے اور افتخارچوہدری کے قریبی ساتھیوں میں شمار ہوتے تھے۔ بعدازاں وہ تحریک انصاف کا حصہ بن گئے تھے اور تحریک انصاف میں شمولیت اختیار کرنے کے بعد انہوں نے پٹیشن واپس لینے کی متفرق درخواست دائر کی تھی۔