کراچی میں ڈی ایس پی کو تھپڑ مارنے والی خاتون نے8 فروری تک عبوری ضمانت کروالی ہے۔
تفصیلات کے مطابق کراچی کی مقامی عدالت میں ڈی ایس پی کو تھپڑمارنے والی خاتون ڈاکٹر انعم کی جانب سے دائر عبوری ضمانت کی درخواست پر سماعت ہوئی۔
عدالت نے ملزم کی عبوری ضمانت کی درخواست منظور کرتے ہوئے پولیس کو 8 فروری تک گرفتاری سے روک دیا ہے، عدالت نے خاتون کو پولیس کے سامنے شامل تفتیش ہونے کی ہدایت جاری کی ہیں،ملزمہ نے پولیس کی تفتیشی ٹیم کو ضمانت کی کاپی بھجوادی ہے، پولیس نے حفاظتی ضمانت کی کاپی موصول ہونے کےبعد ملزمہ کی گرفتاری کا عمل روک دیا ہے۔
عدالت نے ملزمہ کو 4 فروری کو 1لاکھ روپے کئے ضمانتی مچلکوں کے عوض 8فروری تک ضمانت دیتے ہوئے پبلک پراسیکیوٹر اور تفتیشی افسر کو نوٹس جاری کردیے ہیں اور اگلی سماعت پر کیس کی فائل سمیت پیش ہونے کی ہدایات کردی ہیں۔
خیال رہے کہ گزشتہ دنوں کراچی میں ایک خاتون کی جانب سے ٹریفک پولیس کے ڈی ایس پی کو تھپڑ مارا اور بدتمیزی کی تھی جس کے بعد ڈی ایس پی کی مدعیت میں کراچی کے تھانے سول لائنز میں مقدمہ درج کرلیا گیا تھا۔