اسلام آباد: مسلم لیگ (ن) کے ناراض رہنما چوہدری نثار علی خان سے وزیر اعظم شہباز شریف کی حالیہ ملاقات کے بعد پارٹی کے سینئر رہنما اور رکن قومی اسمبلی قمر الاسلام راجا نے شدید ردعمل کا اظہار کرتے ہوئے واضح کیا ہے کہ اگر ن لیگ اور چوہدری نثار کے درمیان معاملات طے پاتے ہیں تو وہ پارٹی کے اندر احتجاج کریں گے اور اس فیصلے کی کھل کر مخالفت کریں گے۔
نجی ٹی وی چینل ’اے آر وائی‘ کو دیے گئے ایک انٹرویو میں قمر الاسلام راجا نے کہا کہ چوہدری نثار نے ماضی میں متعدد پریس کانفرنسز کے دوران پارٹی صدر نواز شریف اور مریم نواز کے خلاف برملا بیان بازی کی۔
انہوں نے انکشاف کیا کہ 2018 کے انتخابات کے دوران انہیں جھوٹے مقدمے میں گرفتار کر کے دباؤ ڈالنے کی کوشش کی گئی کہ وہ شہباز شریف کے خلاف وعدہ معاف گواہ بن جائیں۔ “اس وقت اتنا خوف تھا کہ کسی نے ن لیگ کا ٹکٹ لینے کی جرات تک نہیں کی۔ میرے بچے انتخابی مہم چلاتے تھے اور ان کی والدہ کو دھمکایا جاتا تھا کہ اگر وہ گئے تو واپس نہیں آئیں گے۔”
قمر الاسلام راجا نے الزام لگایا کہ یہ تمام صورتحال چوہدری نثار کے لیے سازگار بنانے کی کوششوں کا حصہ تھی۔ انہوں نے مزید کہا کہ چوہدری نثار سیاست میں اصولوں کی بات کرتے ہیں لیکن ان کے عمل ان دعوؤں کے برعکس ہیں۔
مریم نواز کے بارے میں سابق وزیر داخلہ کے اعتراضات کا جواب دیتے ہوئے قمر الاسلام راجا نے کہا کہ "وہ کہتے تھے بچوں کے نیچے سیاست نہیں کرتے، تو اب میں چوہدری نثار سے کہتا ہوں کہ اپنے بیٹے کو میری شاگردی میں دے دیں۔”
Last edited by a moderator:
