پاکستان تحریک انصاف کی منحرف ہونے والی رکن قومی اسمبلی وجیہہ قمر نے قرآن پاک پر حلف اٹھاتے ہوئے وضاحت کر دی کہ پیسے لینے کا الزام جھوٹا اور بہتان ہے۔
تفصیلات کے مطابق نجی نیوز چینل کے پروگرام ’کیپٹل ٹاک‘ میں گفتگو کرتے ہوئے وجیہہ قمر کا کہنا تھاکہ چند دنوں سے صبرو تحمل کا مظاہرہ کررہی ہوں، انہوں نے حالیہ سندھ ہاؤس پر حملے کے حوالے سے بات کرتے ہوئے کہا کہ جو ہم آج کل اپنی اخلاقیات کا نمونہ پیش کررہے ہیں، کیا ریاست مدینہ یہ درس دیتی ہے؟
انہوں نے اپنی بات جاری رکھتے ہوئے کہا کہ کیا صرف تقریریں کرنے اور ہاتھ میں تسبیح پکڑنے سے ریاست مدینہ بن جاتی ہے، عوام کو پاگل بنانے کیلئے ایک ڈھونگ رچایا گیا تھا۔
انہوں نے مزید کہا کہ ارکان کے گھروں پر حملے کیے گئے اور باپ دادا تک بات کی گئی، صرف سلیکٹڈ احتساب کیا گیا اور مخالفین کو نشانہ بنایا گیا۔
رکن قومی اسمبلی نے قرآن پاک پر ہاتھ رکھ کر حلف اٹھاتے ہوئے کہا کہ مجھے کسی نے پیسے دینے کا وعدہ نہیں کیا اور پیسے لینے کا الزام جھوٹا اور بہتان ہے۔
انہوں نے وزیراعظم عمران خان کو مخاطب کرتے ہوئے کہا کہ ’میں قرآن پر ہاتھ رکھ کر اپنے متعلق بات کرسکتی ہوں تو کیا عمران خان کرسکتے ہیں؟ ان کے ارد گرد لوگ کرپشن میں ملوث نہیں؟ یہ کہہ سکتے ہیں جو گھڑی سعودیہ سے تحفہ ملی وہ انہوں نے بازار میں نہیں بیچ دی؟‘
رکن قومی اسمبلی نے پارٹی سے علیحدگی کے حوالے سے وضاحت دیتے ہوئے کہا کہ ابھی تو میں نے پارٹی چھوڑی نہیں، پارٹی کا حصہ ہوں اور یہ حالات ہیں، امید ہے عدلیہ ہمارے حق میں فیصلہ دے گی، ڈی سیٹ کرنے کی دھمکی سے ہماری آواز نہیں دبائی جاسکتی۔
وجیہہ قمر نے اپنی بات کے اختتام میں کہا کہ اپنے حلقے کیلئے کام کررہی تھی تو کہا گیا یہاں سے الیکٹیبل کو ٹکٹ دیں گے، مخصوص نشست دے کر مجھ پر کوئی احسان نہیں کیا گیا، وزیراعظم کو دو مرتبہ اپنے تحفظات کا بتایا تھا۔
ان کا مزید کہنا تھا کہ مخصوص نشست دے کر مجھ پر کوئی احسان نہیں کیا ، میں نے اپنے حلقے میں بہت کام کیا ہے۔
- Featured Thumbs
- https://www.siasat.pk/data/files/s3/wajiha111i12.jpg
