اسلام آباد: 9 مئی کے مقدمات میں بانی پاکستان تحریک انصاف (پی ٹی آئی) عمران خان کا پولی گرافک اور فوٹو گرافک ٹیسٹ کرانے کا فیصلہ کیا گیا ہے۔ پولیس نے اس حوالے سے پراسیکیوشن کے ذریعے انسداد دہشتگردی عدالت سے درخواست کی، جس میں کہا گیا کہ عمران خان سے ان ٹیسٹس کے ذریعے اہم معلومات حاصل کی جائیں۔
پراسیکیوشن نے عدالت میں موقف اختیار کیا کہ بانی پی ٹی آئی کے خلاف جاری تحقیقات میں پولی گرافک اور فوٹو گرافک ٹیسٹس کی ضرورت ہے تاکہ اس سے متعلق کیسز کی درست تحقیق کی جا سکے۔ انسداد دہشتگردی عدالت نے بیرسٹر سلمان صفدر کو ہدایات لے کر عمران خان کی پیشی کے لیے عدالت میں پیش ہونے کی ہدایت کی۔
بانی پی ٹی آئی کے وکیل، بیرسٹر سلمان صفدر نے ابتدائی دلائل میں اس درخواست کی مخالفت کی اور کہا کہ دو سال بعد ایسی درخواست دائر کرنا بدنیتی پر مبنی ہے۔ ان کا کہنا تھا کہ یہ درخواست سیاسی وجوہات کی بنا پر کی گئی ہے اور اس کا مقصد صرف عمران خان کو دباؤ میں لانا ہے۔
عدالت نے اس کیس کی کارروائی 14 مئی تک ملتوی کر دی، جب کہ اس دوران بانی پی ٹی آئی کے پولی گرافک اور فوٹو گرافک ٹیسٹ کرانے کے بارے میں فیصلہ کیا جائے گا۔
