محکمہ ایکسائز پنجاب کی طرف سے آئندہ ہفتے سے وینیٹی نمبر پلیٹس کی سکیم شروع کرنے کا اعلان کیا گیا ہے جس کیلئے مفتی قوی کو سفیر مقرر کرنے کا اعلان کیا گیا ہے تاہم پنجاب کی وزیراطلاعات عظمی بخاری کی طرف سے خبر کی تردید کی گئی ہے۔
نجی ٹی وی چینل جیو نیوز کی ایک رپورٹ کے مطابق محکمہ ایکسائز پنجاب نے آئندہ ہفتے سے وینیٹی نمبر پلیٹس کی سکیم شروع کرنے کا اعلان کر دیا ہے جس کے لیے 3 کیٹیگریز رکھی گئی ہیں۔
رپورٹ کے مطابق ڈائریکٹر ایکسائز محمد آصف کی طرف سے وینیٹی نمبر پلیٹس کی سکیم آئندہ ہفتے سے شروع کی جا رہی ہے جس کے لیے ایک متنازع شخصیت مفتی قوی کو سفیر مقرر کیا گیا ہے۔ سکیم کے تحت شہری اپنی گاڑیوں کے لیے مرضی کے نام اور نمبر والی نمبرپلیٹس بنوا سکیں گے جس کے لیے 3 کیٹیگریز متعارف کروائی گئی ہیں۔
ڈائریکٹر ایکسائز کا کہنا تھا کہ گولڈ کیٹگری نمبر پلیٹ 5 لاکھ روپے، پلاٹینم کیٹگری کی نمبرپلیٹ 50 لاکھ روپے اور کارپوریٹ نمبر پلیٹس 1 کروڑ روپے میں بنوائی جا سکیں گے جو گاڑی کے مالک کی ملکیت ہوں گی۔ وینیٹی نمبرپلیٹس کے حامل شہریوں کا ڈیٹا محکمے کے پاس موجود ہو گا اور جعلی نمبرپلیٹس پکڑنے کے لیے بھی مربوط حکمت عملی تیار کر لی گئی ہے۔
دوسری طرف حکومت پنجاب کی وزیر اطلاعات عظمی زاہد بخاری نے سماجی رابطوں کی ویب سائٹ ایکس (ٹوئٹر) پر اپنے پیغام میں خبر کی تردید کرتے ہوئے لکھا: پنجاب حکومت کی طرف سے ایسی کوئی تقرری نہیں کی گئی۔
انہوں نے مزید کہا کہ محکمے میں موجود کسی شخص نے بغیر حکومتی اجازت اس طرح کی حرکت کی ہے تو اس کے خلاف ایکشن لیا جائے گا، وزیراعلیٰ پنجاب نے اس معاملے کا سخت نوٹس لیا ہے!
عظمی بخاری کا بیان سامنے آنے کے تھوڑی دیر بعد ڈائریکٹر ایکسائز محمد آصف کو عہدے سے ہٹانے کا نوٹی فکیشن جاری کردیا گیا۔
