بہت افسوس ہوتا ہے جب ایسے با ہنر لوگوں کو ایسے مکالمے کرتے دیکھتا ہوں۔ انشا پردازی میں جو ابن انشا کا قد رکھتے ہوں، لیکن افکار میں شائد ارشد چائے والا بھی ان کے آگے دیو ہیکل نظر آئے۔
میرے بھایئوں، کہاں مسلک کو نشانہ بناتے ہو؟ اس سے کیا فیض پاتے ہو اور کیا فیض دیتے ہو؟
اور جو تنقید کرتے ہو، تو کیوں تضحیک کرتے ہو؟ تنقید برائے تنقید یا تنقید برائے اصلاح؟ کیا سودا کرتے ہو؟ کیا ثمرات پاتے ہو؟
مذہب کی اصل حقیقت بس اتنی ہی ہے کہ ہم میں سے ۹۹ فیصد لوگ اپنے ماں باپ کے مذہب پر ہی خود بھی انتقال پاتے ہیں۔
اور جس مذہب کی چھاوٗں تم لوگوں کو نصیب ہوئی ہے، اسکو اس پاک ذات نے کسی نیزے یا تلوار کی نوک پر نہیں اتارا تھا،
وہ تو ایک بہت شفاف دل پر اترا تھا، اس پر جو کسی یہودی کے جنازے کی تعظیم میں کھڑا ہوجاتا تھا۔
مذہبی اعتقادات ہی سب کچھ ہوتے، تو کیوں نجاشی وہ پہلا شخص ہوتا، جو مرا تو عیسایئت پر تھا لیکن تاریخ اسلام میں سب سے پہلی غائبانہ نماز جنازہ کا مستحق ہوا، وہ، جسکی نماز جنازہ خود اس نے پڑھائی جس کے نام سے ہی رحمت برستی ہے۔
تو اور کیا ڈھونڈھتے ہو مذھب میں سے؟ تفریق؟ تضحیک؟ اور کیا سوچتے ہو کہ سر گنگا رام ہسپتال میں کتنے ہی لوگ کسی کافر اور مشرک کی کاوشوں سے زندگی پا جاتے ہیں، کیا وہ بھی کافر اور مشرک ہو گئے؟ یا اس نیکی کا
کوئی صلہ گنگا رام کو جہنم کی آگ سے نہ بچا سکے گا؟
٦٢) إنَّ الَّذِينَ آمَنُواْ وَالَّذِينَ هَادُواْ وَالنَّصَارَى وَالصَّابِئِينَ مَنْ آمَنَ بِاللَّهِ وَالْيَوْمِ الآخِرِ وَعَمِلَ صَالِحاً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ
Surely those who believe, and those who are Jews, and the Christians, and the Sabaeans, whoever believes in Allah and the Last Day and does good, they shall have their reward from their Lord, and there is no fear for them, nor shall they grieve (Al-Baqarah, Verse 62).
ہم کون ہوتے ہیں کسی کی منزل اس کے مذہبی اعتقادات پر متعین کرنے والے؟ اور جسکے ہاتھ میں میزان ہے، اسکی رحمت بھی اتنی وسیع کہ ساری دنیا کی برائی کو آن کی آن میں دھو ڈالے، وہ رحمت جو کسی طوائف کو ایک کتے کو پانی پلانے کے عوض جنت دے دے، اس سے کیا بعید کہ وہ کسی کے غلط اعتقادات کو اسکی اخلاقیات کے وزن میں ہوا سے بھی ہلکا کر دے؟ ہم کیا جانیں؟ کچھ نہیں، سوائے اسکے کہ جو اللہ کے معاملات ہیں وہ اسی پر چھوڑ دیں، ہاں جو بندے ہیں ان سے سلوک اچھا روا رکھیں، اس مسئلے میں تو رحمت خداوندی بھی آڑے نہیں آنی، میزان اسکو برابر تولے گا، اصل وزن کے حساب سے تولے گا۔
روشنی تو روشنی ہے، اگر کندھے کے پیچھے سے آئے تو راہ نمایاں کرے، اگر منہ پر پڑے تو چوندھیا دے، جو دکھتا ہو اسکو بھی کہیں اوجھل کر دے۔
اور تنقید کے گھوڑے کو بھی دیکھ کر دوڑانا پڑتا ہے۔ کبھی یہ منہ زور گھوڑا اپنی ترنگ میں ایسی سرحدوں کے پار لے جاتا ہے کہ منزل تو عقب میں ہی رہ جاتی ہے اور سوار کو بھی راستہ بھول جاتا ہے، کہ کہاں کو نکلے تھے اور کہاں کو پہنچ گئے؟ تنقید برائے اصلاح اور تنقید برائے تنقید میں یہی فرق ہے جسے اقبال کہتا تھا ’کہ اک جنوں جو با شعور ہے، اور ایک جنوں جو باشعور نہیں‘۔ ہم تنقید کے لیئے نشتر نما الفاظ کو تہذیب کے ململ میں تو لپیٹ لیتے ہیں، لیکن یہ وہی منہ زور گھوڑے بن جاتے ہیں جو کسی طرف بھی سرپٹ دوڑ پڑتے ہیں، بس اپنی منزل ہی نہیں پاتے۔ اگر ہم پہلے منزل کا تعین کر لیں تو یہی الفاظ نشتر کے بجائے چاشنی بن جاتے ہیں، روح تک اتر جاتے ہیں، بھلے آہستہ سے ہی سہی، لیکن منزل تک ضرور لے جاتے ہیں۔
اب لکھنے کو میں بھی لکھ دیتا ہوں کہ یہ ایک مزاحیہ تحریر ہے۔ اب یہ آپکا وصف و ظرف ہی ہے جو اسے سمجھے
