وفاقی دارالحکومت اسلام آباد میں رہنے والے افراد کو عید کی چھٹیوں پر گھروں کو جانے سے قبل پولیس کی پیشگی اطلاع دینے کی ہدایات دیدی گئی ہیں۔
تفصیلات کے مطابق ڈی آئی جی آپریشنز اسلام آباد سید شہزاد ندیم بخاری نے وفاقی دارالحکومت اسلام آباد میں سیکیورٹی کے حوالے سے شہریوں کیلئے ایک ویڈیو بیان جاری کیا ہےجس میں ان کا کہنا تھا کہ عید کی چھٹیوں پر اپنےآبائی علاقوں کو جانے والے شہری اپنے گھروں کو مناسب سیکیورٹی انتظامات کے ساتھ بند کریں، گھر بند کرنے سے پہلے اپنے اخبار والے کو یہ اطلاع دیں کہ وہ گھر میں اخبار نا پھینکے۔
انہوں نے مزید کہا کہ شہری گھروں کو مکمل طریقے سے لاکھ کریں اور مکمل تسلی کے بعد گھروں سے نکلیں، گھر چھوڑنے سے پہلے متعلقہ تھانہ میں اطلاع دیں۔
خیال رہے کہ عید الفطر کیلئے حکومت نے ملک بھر میں عام تعطیلات کے حوالے سے نوٹیفکیشن جاری کردیا ہےجس کے مطابق ہفتے میں 6 دن کام کرنے والے دفاتر میں عید کی چھٹیاں 10 سے 13 اپریل تک ہوں گی جبکہ ہفتے میں 5 روز کام کرنے والے دفاتر میں 10 سے 12 اپریل تک چھٹیاں ہوں گی۔