وفاقی وزیر دفاع خواجہ محمد آصف نے کہا ہے کہ عمران خان چاہتے ہیں انہیں دوبارہ اقتدار ملے اور وہ اپنے خاندان سمیت دوبارہ کرپشن کا موقع حاصل کرسکیں۔
تفصیلات کے مطابق وفاقی وزیر دفا ع خواجہ محمد آصف نے جیو نیوز سے خصوصی گفتگو کرتے ہوئے سابق وزیراعظم عمران خان اور پی ٹی آئی کی حکومت پر تنقید کرتے ہوئے کہا تھا کہ ہمیں تباہ حال معیشت ملی جسے بہتر کرنے میں وقت درکار ہے، پوری کوشش کررہے ہیں کہ ملکی معیشت کو اپنے پیروں پر کھڑا کرسکیں۔
انہوں نے مزید کہا کہ کرپشن سے سیلاب کی طرح سارا ملک ڈوبا ہوا ہے، یہ وہ مافیا ہے جس نے چار سال ملک کو لوٹا ہے اور اب یہ احتساب سے بچنا چاہتے ہیں، پی ڈی ایم جب سے بنی ہے تب سے ہم نے آئین کے خلاف کوئی بات نہیں کی ہے۔
خواجہ آصف نے مزید کہا کہ سازش کا سفر امریکہ سے شروع ہوکر محسن نقوی، آئی جی پنجاب اور آئی جی اسلام آباد تک آگیا ہے، عمران خان کا بیانیہ اب نہیں چلتا، یہ چاہتا ہے دوبارہ اقتدار میں آئے تاکہ خاندان سمیت کرپشن کا موقع مل سکے۔
میاں نواز شریف کی وطن واپسی سے متعلق سوال کے جواب میں خواجہ آصف کا کہنا تھا کہ نواز شریف کی وطن واپسی کے بعد بہت بہتری آئے گی، نواز شریف جلد واپس آئیں گے تاہم میں تاریخ کا اعلان نہیں کرسکتا۔
