اسپیکر پنجاب اسمبلی چوہدری پرویز الہیٰ نے گزشتہ روز ماڈل ٹاؤن میں پولیس اہلکار کی موت پر تبصرہ کرتے کہا کہ پولیس اہلکار شہید کیسے ہے؟ پنجاب پولیس کے ترجمان نے چوہدری پرویز الہیٰ کے اس بیان پر شدید ردعمل کا اظہار کیا ہے۔
تفصیلات کے مطابق چوہدری پرویز الہیٰ نے یہ بیان لاہور میں میڈیا نمائندوں سے گفتگو کرتے ہوئے کی اور کہا کہ پولیس اہلکار کس بات کا شہید ہے؟ کیا وہ کوئی ڈاکو پکڑنے گئے تھے؟
انہوں نے مزید کہا کہ گھر میں رہنے والوں کو کیا پتا کہ اس کے گھر میں گھسنے والا چور ڈاکو ہے یاکوئی اور، گھر میں ماں بہن بیٹی موجود ہوتو گھر میں گھسنےوالے کو کوئی کچھ بھی سمجھ سکتا ہے اور پھر اس کے ساتھ وہی سلوک ہوگا جو ڈاکوؤں کے ساتھ ہوتا ہے۔
پنجاب پولیس نے چوہدری پرویز الہیٰ کے بیان کا ویڈیو کلپ شیئر کرتے ہوئے ردعمل دیا کہ پولیس کے جوان دن رات فرائض کی انجام دہی میں قربانیاں دیتے ہیں،اپنے کم سن بچوں اور اہلِ خانہ کو چھوڑ کر جامِ شہادت نوش کرتے ہیں۔
ترجمان پنجاب پولیس کے مطابق شہید کے 5 کم سن بچوں کے سر پر شفقت کا ہاتھ رکھنے کی بجائے انکی توہین اور شہید کو شہید ماننے سے ہی انکار کسی طور پر مناسب نہیں ہے۔
یادرہے کہ گزشتہ رات لاہور کے علاقے ماڈل ٹاؤن میں پولیس پارٹی کی جانب سے سیاسی کارروائی کے دوران پی ٹی آئی کارکن کے گھر پر چھاپہ مارا گیا جس کے بعد چھت سے ہونےوالی فائرنگ سے پولیس اہلکار کمال احمد شہید ہوگئے تھے۔