دہشت گردی ایک بین الاقوامی خطرہ ہے جس کے خلاف مربوط ردعمل دینے کی ضرورت ہے۔ دہشت گردی سے خطے کا امن غیرمستحکم ہو سکتا ہے۔
تفصیلات کے مطابق آرمی چیف جنرل قمر جاوید باجوہ سے عراقی بحریہ کے کمانڈر لیفٹیننٹ جنرل احمد جاسم معارج عبداللہ نے ملاقات کی جس میں علاقائی سلامتی ، باہمی دلچسپی کے امور اور دوطرفہ دفاعی تعاون کو بڑھانے پر تبادلہ خیال کیا گیا۔ آرمی چیف جنرل قمر جاوید باجوہ نے کہا کہ دہشت گردی ایک بین الاقوامی خطرہ ہے جس کے خلاف مربوط ردعمل دینے کی ضرورت ہے۔ دہشت گردی سے خطے کا امن غیرمستحکم ہو سکتا ہے۔
آئی ایس پی آر کے مطابق آرمی چیف نے عراقی بحریہ کے کمانڈر سے گفتگو کرتے ہوئے کہا مزید کہا کہ پاکستان عراق کے ساتھ برادرانہ تعلقات کو قدر کی نگاہ سے دیکھتا ہے، دہشت گردی کے خلاف جنگ میں عراقی قوم کی قربانیوں قابل قدر ہیں، پاکستان ان قربانیوں کا اعتراف کرتا ہے۔
اس موقع پر عراقی کمانڈر نے پاکستان کی مسلح افواج کی پیشہ وارانہ مہارتوں کا اعتراف کرتے ہوئے کہا کہ بلوچستان میں ہیلی کاپٹر حادثے میں قیمتی جانوں کے ضیاع پر تعزیت کا اظہار کیا، عراقی کمانڈر نے پاکستان کے کردار کو علاقائی استحکام میں سراہا اور دونوں افواج کے مابین فوجی تعاون بڑھانے کا بھی عزم دہرایا۔
دریں اثنا قومی اسمبلی اجلاس کے بعد سپیکر راجہ پرویز اشرف کی زیر صدارت اجلاس میں وزیر ستان میں شہید ہونے والے فوجیوں کو خراج عقیدت پیش کیا گیا۔ وزیرستان کے فوجی شہداء کو خراج عقیدت پیش کرتے ہوئے سپیکر قومی اسمبلی نے کہاکہ پارلیمنٹ شہدا کے ساتھ ہے اور ان پر حملہ خود پر حملہ سمجھتی ہے۔
انہوںنے کہاکہ وزیرستان میں افواج پاکستان کے شہدا ہمارے سپوت ہیں، شہادت کا سن کر دلی افسوس ہوا۔ ہم اس عزم کا اظہار کرتے ہیں کہ پاک فوج کے جوانوں کو اکیلا نہیں چھوڑیں گے۔ بعدازاں شہداء کیلئے مغفرت اور زخمیوں کیلئے جلد صحتیابی کیلئے دعا کی گئی۔