حکومتی اتحادی جماعتوں نے شہباز شریف کو 2023 تک مکمل حمایت کی یقین دہانی کرواتے ہوئے کہا ہے کہ حکومت اپنی آئینی مدت پوری کرے۔
خبررساں ادارے کی رپورٹ کے مطابق وزیراعظم شہباز شریف کی زیر صدارت اتحادی جماعتوں کا اہم اجلاس ہوا جس میں پیپلزپارٹی، جے یو آئی ف، ایم کیو ایم سمیت دیگر اتحادی جماعتوں کے سربراہان اور قائدین نےشرکت کی۔
اجلاس میں حکومت کی مدت اور عام انتخابات کے انعقاد کیلئے وقت کے تعین کے علاوہ ملک کو معاشی بحران سے نکالنے کیلئے مشکل فیصلوں کے حوالے سے مشاورت کی گئی۔
اس موقع پر تمام اتحادی جماعتوں نے اگست 2023 تک اسمبلیوں کی آئینی مدت پوری ہونے تک حکومت کا ساتھ دینے کی مکمل یقین دہانی کرواتے ہوئے کہا کہ حکومت کے تمام مشکل فیصلوں کو مکمل سپورٹ کیاجائے گا۔
اتحادی جماعتوں کے اجلاس میں فیصلہ ہوا کہ جلد انتخابی اصلاحات کا عمل جلد از جلد شروع کیا جائے گا، اجلاس میں سپریم کورٹ کی جانب سے آئین کے آرٹیکل 63 اے کی تشریح کے حوالے سے فیصلے پر بھی مشاورت کی گئی۔
اجلاس میں فیصلہ ہوا کہ سپریم کورٹ کے فیصلے پر فوری طور پر قانونی ماہرین سے رائے لی جائے گی اور عدالتی فیصلے کے بعد پیدا ہونے والے ممکنہ آئینی و سیاسی بحران سے نمٹا جائے گا۔