ملکی سیاست کا اونٹ کس کروٹ بیٹھے گا کسی کو نہیں پتا، ان دنوں پرویز خٹک کے چرچے عام ہیں، ان کی نئی پارٹی کے اعلان اور پھر وزرا کے لاتعلی کے بیان نے ہلچل مچائی ہوئی ہے، ایسے میں جمعیت علما اسلام ف کے رہنما حافظ حمداللہ نے پرویز خٹک پر کؑی تنقید کردی، انہوں نے کہا پرویزخٹک کی سربراہی میں بننے والی پارٹی کے ضمیر کا تعلق مفادات سے ہے ایسے لوگوں کو جہاں بھی مفاد نظر آتا ہے ان کا ضمیر جاگ جاتا ہے۔
اے آر وائی نیوز کے پروگرام الیونتھ آور میں گفتگو کرتے ہوئے انہوں نے کہا کہا پرویزخٹک جیسی پارٹیوں سے اتحاد کرنا پاؤں پر کلہاڑی مارنے کے مترادف ہے،پرویزخٹک جیسے لوگ چلے ہوئے کارتوس ہیں الیکشن میں لگ پتہ جائے گا چیئرمین پی ٹی آئی جن لوگوں کولوٹےکہتےہیں آج وہی سامنے آرہے ہیں۔
حافظ حمداللہ نے مزید کہا پرویزخٹک کی سربراہی میں بنائی گئی پارٹی’’پارٹی‘‘ہی نہیں ہے پرویزخٹک کی سربراہی میں بنائی گئی پارٹی پی ٹی آئی کاہی ہجوم ہے یہ وہ لوگ ہیں جو ذاتی مفاد کے تحت چلتےہیں اورالگ ہو جاتے ہیں یہ وزارت کے حصول کیلئے حکومت کا حصہ بنتے ہیں پھر الگ ہو جاتے ہیں۔
انہوں نے کہا نگراں حکومت کسی پارٹی کی نہیں ہوتی یہ بات بالکل درست ہے نگراں وزیراعلیٰ یا کابینہ الیکشن کیلئے ہوتی ہے، بات اگرمگر کی ہےتو انتظار کرنا چاہیے الزامات حقیقت کا روپ دھارتے ہیں تو ہمارا بھی مؤقف آئے گا۔
دوسری جانب رہنما اے این پی کے صوبائی صدر ایمل ولی خان نے سوشل میڈیا اکاؤنٹ پر کہا نہ پی ٹی آئی کو مانتے ہے اور نہ پی ٹی آئی پی کو، گند تھا، گند ہے اور گند رہے گا،مکمل ٹھکانے لگاؤ۔
پاکستان تحریک انصاف کے سابق رہنما اور سابق وزیراعلیٰ خیبرپختونخوا پرویز خٹک نے پی ٹی آئی پارلیمنٹیرین بنانے کا اعلان کیا، پی ٹی آئی پارلیمنٹیرین میں سابق وزیراعلیٰ محمود خان سمیت57 ارکان اسمبلی شامل ہو گئے۔
پارٹی اعلامیے کہا گیاتھا نئی پارٹی کا قیام سانحہ 9 مئی پر پی ٹی آئی میں اختلافات اور احتجاج کی صورت سامنے آیا، نئی پارٹی میں شامل سیاسی رہنما سابق وزیراعظم عمران خان کو سانحہ 9مئی کا ذمہ دارقرار دے رہے ہیں۔
پرویز خٹک کا کہنا ہے کہ سوچنا چاہئے تحریک انصاف نے تین چار بار الیکشن کے مواقع کیوں ضائع کئے، یہ بہت بڑا راز ہے جو سب کی آنکھیں کھول دیگا کہ پی ٹی آئی کا پروگرام کیا تھا؟ پی ٹی آئی پارلیمنٹیرینز بنانے والےسابق وزیراعلیٰ اور وزیر دفاع پرویز خٹک نے کہا ہے کہ سانحہ 9 مئی جیسے واقعات کی بھرپور مذمت کرتے ہوئے کہا کہ پاکستان کے وجود سے ہی ہم سب کا وجود ہے۔
