چیئرمین سینیٹ اور اسپیکر قومی اسمبلی کی تنخواہوں میں یکایک کئی گنا اضافہ اور 50 فیصد زائد الاؤنس ناقابل فہم اقدام ہے،
اس سے پیشتر اراکین اسمبلی کے مشاہرے بھی بیک جنبشِ قلم کئی گنا بڑھائے گئے ہیں۔
اعلیٰ عدلیہ کے ججز اور جنرل صاحبان کے مشاہرے اور مراعات پہلے ہی عوامی تنقید کی زد میں ہیں۔
تنخواہوں میں اضافہ کر لیں لیکن اس کا کوئی طریقۂ کار طے ہونا چاہیے۔
اسمبلی کے پاس اپنی مرضی سے آنکھیں بند کر کے اپنی تنخواہوں یا کسی مخصوص طبقے کی تنخواہوں یا مراعات میں اضافہ کرنے کا اخلاقی جواز نہیں ہے۔
تنخواہوں میں اضافہ ہر طبقے کے لیے برابری کی بنیاد پر ہونا چاہیے، اس ضمن میں لانگ جمپ یا ہائی جمپ اسٹائل نامناسب ہے۔
بہتر ہوتا کہ پارلیمنٹیرینز یا دیگر ریاستی اداروں کی تنخواہوں میں اضافہ سالانہ بجٹ میں سرکاری ملازمین کی تنخواہوں میں اضافے کے ساتھ منسلک کر لیا جاتا۔
