وفاقی حکومت نے بندرگاہوں پر پھنسے کنٹینرز کی وجہ سے عائد جرمانوں کی رقوم معاف کرنے اور ٹرمینلز کے جرمانوں میں کمی کا فیصلہ کرلیا ہے۔
تفصیلات کے مطابق وفاقی وزیر برائے بحری امور فیصل سبزواری نے مائیکروبلاگنگ ویب سائٹ پر اس حکومتی فیصلےکا اعلان کرتے ہوئے کہا کہ ہمیں گزشتہ کئی ہفتوں سے بندرگاہوں پر پھنسے کنٹینرز سےکاروباری طبقےکو درپیش مشکلات کا بخوبی ادراک ہے۔
انہوں نے مزید کہا کہ اس صورتحال کو مدنظر رکھتے ہوئے وزارت بحری امور نے فیصلہ کیا ہے کہ اس ضمن میں بندرگاہوں کو ملنے والی جرمانوں کی رقوم کو معاف کردیا جائے اور ساتھ ہی ساتھ ٹرمینلزکی جانب سےعائد جرمانوں میں خاطر خواہ کمی کی کوشش کی جائے۔
انہوں نے مزید کہا کہ اس مشکل وقت میں کاروباری طبقے کیلئے آسانیاں پیدا کرکےہی معیشت میں استحکام کی کوشش کی جاسکتی ہے، اس ضمن میں حکام کاروباری برادری کے نمائندگان سے ملاقات کرکے مزید اقدامات پر مشاورت بھی کریں گے۔
خیال رہے کہ وفاقی حکومت کی جانب سے امپورٹس کیلئے ایل سیز کھولنے پر عائد پابندیوں کے باعث بیرون ملک سے امپورٹ کی گئی کنسائنمنٹس گزشتہ کئی ہفتوں سے بندرگاہوں پر موجود ہیں، اس ضمن میں سینکڑوں کی تعداد میں کنٹینرز بندرگاہوں پر پھنسے ہوئےہیں جنہیں یومیہ بھاری جرمانوں کا بھی سامنا کرنا پڑرہا ہے۔
- Featured Thumbs
- https://www.siasat.pk/data/files/s3/containen11121.jpg
