پاکستان کے نامور نجی ٹی وی اے آر وائی نیوز پر پابندی لگادی گئی، جس کی گونج امریکا تک جاپہنچی ہے، امریکی محکمہ خارجہ کی جانب سے اے آر وائی کی بندش کی شدید الفاظ میں مذمت کردی گئی، امریکی محکمہ خارجہ نے چینل پر پابندی لگانے پر تشویش کا اظہار بھی کیا ہے۔
ترجمان امریکی محکمہ نے تشویش کا اظہار کرتے ہوئے کہا کہ پاکستان میں میڈیا آؤٹ لیٹس ، سول سوسائٹی پر پابندیوں کی خبروں سےآگاہ ہیں،متحرک پریس اور باخبر شہری کسی بھی آزاد قوم کیلئے کلیدی حیثیت رکھتے ہیں جبکہ میڈیا پرپابندی اظہار رائے کی آزادی کو نقصان پہنچاتی ہے،پاکستان میں صحافیوں کے خلاف حملوں کیلئے جوابدہی کی کمی باعث تشویش ہے،
آزادی صحافت کی دعویدار حکومت نے گذشتہ روز 4 ہزار صحافیوں کا معاشی قتل کر ڈالا،رانا ثنا اللہ کی وزارت داخلہ نے اے آر وائی نیوز کا این او سی منسوخ کردیا،شوکاز دیئے بغیر اے آر وائی نیوز کی این او سی کینسل کی گئی۔
دوسری جانب عالمی میڈیا میں بھی بندش کی مذمت کی جارہی ہے، واشنگٹن پوسٹ نے لکھا کہ پاکستان میں صحافیوں اور حزب اختلاف نے حکومتی اقدام کی مذمت کی، عوام میں مقبول ٹی وی چینل کی بندش پر صحافی سراپا احتجاج ہیں،عرب نیوز نے این اوسی منسوخی کےحکومتی اقدام کو پاکستانی صحافیوں نےمسترد کردیا،وائس آف امریکا نے بھی تشویش کا اظہار کیا۔