موجودہ حکومتی اتحاد اداروں اور سٹیبلشمنٹ پر الزامات بھی لگاتا ہے اور آرمی چیف سے مدد بھی مانگتا ہے۔
سابق وزیراعظم عمران خان اور آرمی چیف جنرل قمر جاوید باجوہ کا ایک پیج پر ہونا موجودہ اتحادی حکومت کو کھٹکتا تھا اور ہمیشہ یہ کہتے تھے کہ عمران خان سلیکٹڈ ہے اور اسے سلیکٹر لے کر آئے۔ آج سٹیبلشمنٹ سے مدد کیوں مانگ رہی ہے۔
تفصیلات کے مطابق نجی ٹی وی چینل جیو نیوز کے پروگرام رپورٹ کارڈ میں سینئر صحافی، تجزیہ کار اطہر کاظمی نے آرمی چیف کی امریکہ کو قرض کی رقم جلد جاری کرنے کیلئے آئی ایم ایف پر دبائو ڈالنے کی درخواست کے حوالے سے گفتگو کرتے ہوئے کہا کہ سابق وزیراعظم عمران خان اور آرمی چیف جنرل قمر جاوید باجوہ کا ایک پیج پر ہونا موجودہ اتحادی حکومت کو کھٹکتا تھا اور ہمیشہ یہ کہتے تھے کہ عمران خان سلیکٹڈ ہے اور اسے سلیکٹر لے کر آئے۔ آج سٹیبلشمنٹ سے مدد کیوں مانگ رہی ہے۔
ان کا کہنا تھا کہ موجودہ حکومتی اتحاد کو اعتراضات تھے تو اب وہ آرمی چیف کو اس مسئلے میں کیوں شامل کر رہی ہے اور اگر ایسا نہیں ہے اور آرمی چیف جنرل قمر جاوید باجوہ نے یہ فیصلہ خود کیا ہے تو پوچھیں کہ ایسا کیوں کیا؟ کیا موجودہ حکومت نے ان سے پوچھا؟ انہوں نے سوال اٹھایا کہ جنرل قمر جاوید باجوہ کے فون کرنے کی نوبت کیوں آئی، عمران خان کی حکومت کیسے ختم کی گئی اور کس نے کردار ادا کیا؟ یہ ساری چیزیں سامنے رکھیں تو سمجھ آ جائے گی کہ ہم اس نہج پر پہنچے کیسے۔
انہوں نے مزید بتایا کہ ابھی چند دن پہلے ڈان لیکس کے مرکزی کردار طارق فاطمی کو بھی امریکہ بھیجا گیا تھا اور وہ امریکی سفارتکار وینڈی شرمین سے مل کر آئے تھے اور وزارت خارجہ کا اس حوالے سے کہنا تھا کہ ان کا نجی دورہ ہے، ان کا کہنا تھا کہ امریکہ میں پاکستانی سفارتخانے کے سرکاری ٹویٹر اکائونٹ سے بتایا گیا تھا کہ طارق فاطمی امریکہ آئے ہیں اور ان کی وینڈی شرمین سے ملاقات بھی ہوئی۔
انہوں نے سوال اٹھایا کہ کیا ادارے اور موجودہ اتحادی حکومت ایک پیج پر ہیں؟ موجودہ اتحادی حکومت ایک طرف تو اداروں اور سٹیبلشمنٹ پر الزامات لگاتی ہے، دوسری طرف انہیں کہہ رہے ہیں کہ ہماری مدد بھی کریں۔
اس موقع پر سینئر صحافی وتجزیہ کار ارشاد بھٹی نے سوال اٹھایا کہ اطہر کاظمی یہ بھی بتائیں کہ عمران خان کو اقتدار میں لایا کیسے گیا تھا؟ اور عمران خان حکومت کا کوئی ایسا بحران بتائیں جس میں سے آرمی چیف نے انہیں نہ نکالا ہو؟
اطہر کاظمی نے جواب میں کہا کہ کیا یہ سارا کچھ ہونے کے بعد عمران خان نے فوج کے خلاف الزامات لگائے تھے؟ جس طرح یہ موجودہ حکومتی اتحاد کر رہا ہے؟ ان کا کہنا تھا کہ موجودہ حکومتی اتحاد کے دعوے کے مطابق سابق وزیراعظم عمران خان کو فوج ہی چلا رہی تھی، سب کچھ فوج کر رہی تھی، تو سٹیبلشمنٹ اور موجودہ اتحادی حکومت اگر اتنی ہی اہلیت رکھتی ہے تو نظام چلا لے، اعتراض کس بات پر ہے۔
