وزیراعظم شہباز شریف نے کہا ہے کہ پاکستان کیلئے امریکہ سے دشمنی کسی بھی صورت وارے میں نہیں ہے۔
تفصیلات کے مطابق انہوں نے یہ بیان صحافیوں سے ملاقات کے دوران گفتگو کرتے ہوئے کی اور کہا کہ افغانستان میں امن ہوگا توپاکستان میں امن ہوگا، ملکی معیشت اس وقت کس گھمبیر صورتحال سے گزررہی ہے بیان نہیں کیاجاسکتا، ملک تاریخ کے بدترین دور سے گزررہا ہے۔
وزیراعظم شہباز شریف نے کہا کہ پاک فوج کے نئے سپہ سالار(آرمی چیف) کی تعیناتی قوائد وضوابط کے مطابق ہوگی، وزیراعظم ہاؤس اب جمہوری ہاؤس بن گیا ہے، سعودی عرب دورے کے دوران سعودی قیادت سے ملاقات ہوگی۔
انہوں نے مزید کہا کہ ہماری خواہش تھی کہ تحریک انصاف کے ارکان اسمبلی سے استعفیٰ نہ دیتے ، مگر انہوں نے ایسا کرلیا ہے، اب فیصلہ قوائد و ضوابط کے مطابق ہوگا، عمران خان ملک کو دیوالیہ کرکے گیا ہے، اب وہ جو کررہے ہیں اس پر اتنا کہنا چاہوں گا کہ کوئی بھی قانون ہاتھ میں لینے کی کوشش کرے گا تو قانون اپنا راستہ اپنائے گا۔
وزیراعظم شہبازشریف نے کہا کہ قومی سلامتی کمیٹی کا اعلامیہ واضح ہے کہ ملک کے خلاف کسی بیرونی سازش کا سوال ہی پیدا نہیں ہوتا، انتقام کا لفظ ہماری لغت میں نہیں ہے مگر قانون اپنا راستہ ضرور اختیار کرے گا، گزشتہ حکومت کام بھی کرسکتی تھی مگر انہوں نے صرف شور مچایا۔
شہباز شریف نے ملک میں مہنگائی کی صورتحال پر بات کرتے ہوئے کہا کہ آج ہم نے دس کلو آٹے کا تھیلا 4سو روپے میں مہیا کیا ہے، رمضان بازاروں اور یوٹیلٹی اسٹور ز پر اس وقت چینی 70 روپے فی کلو میں مل رہی ہے، گزشتہ حکومت کی جانب سے وقت پر ایندھن نہ منگوانے کی وجہ سے ملک میں بدترین لوڈشیڈنگ کا سامنا ہے۔