رہنما تحریک انصاف کے رہنما فواد چوہدری نے وزیر قانون اعظم نذیر تارڑ پرطنز کرتے ہوئے کہا ہے کہ انہیں چاہیے ہمارے خلاف روز ایک نیا پرچہ دینے کیلئے ایک ایف آئی آر ڈیپارٹمنٹ کھول لیں۔
تفصیلات کے مطابق فواد چوہدری نے ایکسپریس نیوز کے پروگرام "کل تک" میں میزبان جاوید چوہدری کے ساتھ خصوصی گفتگو کرتےہوئے کہا کہ اعظم تارڑ تو ہر بات کے اوپر ہی پرچہ دینے کیلئے تیار ہوجاتےہیں،پاکستان کی تاریخ میں کبھی توہین مذہب کے قوانین اس طرح استعمال نہیں ہوئے جس طرح یہ استعمال کررہےہیں،یہ پہلی حکومت ہے جنہوں نے سیاسی مقاصد کیلئے توہین مذہب کےقوانین کا سہارا لیا ہے۔
انہوں نے مزید کہا کہ اس حکومت نے اپنا کوئی مخالف بندا ایسا نہیں چھوڑا جس پر مقدمہ نا کیا گیا ہو،انسداد دہشت گردی کا قانون بھی ماضی میں کبھی اس طرح سیاسی طورپر استعمال نہیں ہوا جس طرح اس حکومت نے اپنے مخالف صحافیوں کو دہشت گردی کے مقدمات میں پھنسا کر اٹھالیا۔
فواد چوہدری نے کہا کہ اس حکومت نے میڈیا اداروں کو دباؤ میں لانے کیلئے دہشت گردی کے مقدمات درج کیے، عمران خان ، پی ٹی آئی لیڈرز کے خلاف دہشت گردی کے مقدمات درج کیے، روز ایک نیا پرچہ ہوتا ہے،مجھے یہ بھی یاد نہیں کہ کتنے پرچےہوچکےہیں۔
