رہنما پیپلزپارٹی سعید غنی نے کہا ہے کہ آرمی چیف کی تعیناتی سے متعلق عمران خان کا بیان اسی بیانیہ کا حصہ ہےجس کےذریعے وہ آرمی کے اندر نفاق اور تقسیم پیدا کرنے کی کوشش کررہے تھے۔
کراچی میں پریس کانفرنس سے خطاب کرتے ہوئے سعید غنی کا کہنا تھا کہ آرمی چیف کی تعیناتی اپنے وقت پر ہونی چاہیے، اور یہ تعیناتی حکومت وقت کو ہی کرنی چاہیے، عمران خان کے پاس آئینی یا قانون طور پر ایسا کوئی جواز نہیں ہے کہ اس معاملے میں ان کا مشورہ بھی شامل کیا جائے۔
سعید غنی نے کہا کہ عمران خان کا یہ بیان انتہائی قابل مذمت ہے اور یہ اسی بیانیہ کا حصہ ہے جس کے ذریعے وہ پاک فوج کے اندر ایک نفاق اور تقسیم پیدا کرنے کی کوشش کررہے تھے۔
سیلاب زدگان کے حوالے سے بات کرتے ہوئے سعید غنی کا کہنا تھاکہ سیلاب سے متاثر ہونےو الوں کی تعداد بے حد زیادہ ہے، یہ بھی ممکن نہیں ہے کہ سیلاب سے متاثرہ ایک کروڑ لوگوں کو آپ کراچی میں آباد کردیں، یہ ممکن نہیں ہے۔
واضح رہے کہ گزشتہ روز سابق وزیراعظم عمران خان نے ایک انٹرویو کے دوران کہا تھا کہ نئے آرمی چیف کی تعیناتی کےمعاملے کو انتخابات تک موخر کردینا چاہیے اور انتخابات کےبعد بننے والی حکومت کو یہ اختیار ملنا چاہیے کہ وہ نیا آرمی چیف تعینات کرے، تب تک موجودہ آرمی چیف کو ہی عہدےپربرقرار رکھا جانا چاہیے۔
- Featured Thumbs
- https://www.siasat.pk/data/files/s3/17saeedghani.jpg
