ایم کیو ایم پاکستان نے عدم اعتماد کی تحریک میں اپوزیشن کا ساتھ دینے پر اتفاق کرلیا ہے، یہ دعویٰ مولانا فضل الرحمان نے خالد مقبول صدیقی سے ملاقات کے بعد کیا ہے۔
تفصیلات کےمطابق اپوزیشن اتحاد پاکستان ڈیموکریٹک موومنٹ کے سربراہ مولانا فضل الرحمان نے کراچی میں ایم کیو ایم پاکستان کے مرکز بہادرآباد کا دورہ کیا اور کنوینئر خالد مقبول صدیقی سمیت دیگر رہنماؤں سے ملاقات کی۔
اس موقع پرمولانا فضل الرحمان نے ایم کیو ایم کی قیاد ت کو اپوزیشن اتحاد میں شمولیت کی دعوت دی، ملاقات کے بعد میڈیا نمائندوں سے بات کرتے ہوئے مولانا فضل الرحمان نے کہا کہ ایم کیو ایم سے ملاقات کے بعد مطمئن ہوکر جارہا ہوں ، عمران خان اب تنہا ہوچکے ہیں، موجودہ سیاسی حالات میں اپوزیشن اور ایم کیو ایم میں مکمل ہم آہنگی پائی جاتی ہے۔
انہوں نےمزید کہا کہ عمران خان سمیت پوری پی ٹی آئی کو امر بالمعروف ٹھیک سے بولنا بھی نہیں آتا ،یہ تو سرتاپا منکر ہیں،عمران خان اور ان کی پارٹی کے ارکان نامناسب تقاریر کررہےہیں۔
اس موقع پر میڈیا نمائندوں سے گفتگو کرتے ہوئےایم کیو ایم کے کنوینئر خالد مقبول صدیقی نے کہا کہ ملک میں کسی بھی سیاسی جماعت کے دفتر بند نہیں کیے گئے، مگر ہمارےدفتر بند ہیں ، ہمیں وفاقی حکومت سے امید تھی کہ وہ کم از کم ہمیں حکومت میں رہنے کا جواز تو فراہم کرتی۔
خالد مقبول صدیقی نے کہا کہ مگر اب ہمیں معلوم ہوا کہ بہت سارے معاملات میں وزیراعظم کے پاس اختیارات ہی نہیں ہیں تو پھر ایسی جمہورت میں رہنے کا کیا فائدہ،ہمیں امید ہے کہ مولانا فضل الرحمان کے تجربے سے فائدہ اٹھائیں گے، ملک کو مشکلات سے نکالنے کیلئے یہ ہمارا اور ہم ان کا ساتھ دینے کیلئے تیار ہیں۔
