آئی سی سی نے چیمپئنز ٹرافی 2025 کی میزبانی پاکستان کو دینے کا اعلان کیا ہے جس پر چیئرمین پی سی بی نے خوشی کااظہار کیا ہے۔
خبررساں ادارے کی رپورٹ کے مطابق انٹرنیشنل کرکٹ کونسل (آئی سی سی) نے مستقبل کے 8 ایونٹس کا اعلان کردیا ہے جس کے مطابق 2025 میں ہونے والی چیمپئنز ٹرافی کی میزبانی پاکستان کو دی جائے گی۔
پاکستان کرکٹ بورڈ کے چیئرمین رمیز راجہ نے آئی سی سی کے اس فیصلے کا خیر مقدم کرتے ہوئے کہا ہے کہ یہ ایک بہت ہی خوشی اور فخر کی بات ہے کہ پاکستان آئی سی سی چیمپئنز ٹرافی 2025 کی میزبانی کرے گا، اس خوش کی خبر سے پاکستان کے کروڑوں شائقین کرکٹ کے دل جھوم اٹھیں گے۔
انہوں نے کہا کہ ایونٹ کے کامیاب انعقاد اور پاکستان میں کھلاڑیوں کو ایکشن میں دیکھ کر دنیا ہماری کرکٹ سے محبت اور میزبانی دیکھیں گے، ہمیں آئی سی سی کی توقعات اور معیار کے مطابق اس ایونٹ کا انعقاد یقینی بنانے کی منصوبہ بندی کرنی ہے۔
رمیز راجہ نے ایونٹ کی تفصیلات شیئر کرتے ہوئے بتایا کہ ٹورنامنٹ میں پاکستان اپنے ٹائٹل کا دفاع کرے گا اور ایونٹ میں 8 ٹیمیں شریک ہوں گی جن کے درمیان 15 میچز کھیلے جائیں گے۔
چیئرمین پی سی بی نے کہا کہ ایونٹ کے تمام میچز پاکستان میں تین مقامات پر کھیلے جائیں گے جن میں کراچی، لاہور اور راولپنڈی شامل ہیں تاہم حتمی شیڈول موسم کی صورتحال کو دیکھتے ہوئے جاری کیا جائے گا۔
- Featured Thumbs
- https://www.siasat.pk/data/files/s3/5rajaiccct.jpg
