پاکستان کو سی این این نے کرپشن اور موروثی سیاست سے اجاگر کیا،ارشد شریف برہم
چیئرمین پیپلزپارٹی بلاول بھٹو زرداری کے سی این این کو دیئے گئے انٹرویو میں اینکر بیکی اینڈرس نے پاکستان کا تعارف کروایا کرپشن زدہ اور موروثی سیاست میں گھرے ہوئے ملک سے، جس پر صحافی ارشد شریف نے کڑی تنقید کردی۔
ارشد شریف نے ٹویٹ کیا کہ میرے پیارے پاکستان کی شناخت سی این این پر دوبارہ کرپشن اور موروثی سیاست کے حوالے سے کروائی گئی اور نئی حکومت کو سیلیکٹرز کی سپر سیلکٹڈ حکومت کہا گیا،پاکستانی قوم غیرت مند ہے مگر شرم تم کو نہیں آتی۔
سی این این کی اینکر نے بلاول بھٹو کا انٹرویو شروع کرنے سے قبل پاکستان کی سیاست پر تبصرہ کیا، اور کہا کہ آج تک کسی وزیراعظم نے پاکستان میں آئینی مدت پوری نہیں کی، پھر سابق وزیراعظم نواز شریف کے حکومت سے جانے ان پر لگے کرپشن کے الزامات کا تذکرہ کیا۔
اینکر بیکی اینڈرس نے سابق وزیر اعظم بے نظیر بھٹو کا ذکر کیا تو موروثی سیاست پر شدید تنقید کی اور پھر چیئرمین پیپلز پارٹی بلاول بھٹو زرداری سے اس حوالے سے سوال بھی کیا، جس پر بلاول بھٹو نے کہا کہ امریکا چاہے کتنا ہی موروثی سیاست اور اقربا پروری پر تنقید کیوں نہ کرے، حقیقت یہ ہے کہ آخر میں اہمیت اسی بات کی ہے کہ پاکستانی عوام کسے منتخب کرتے ہیں۔
بلاول بھٹو کا کہنا تھا کہ عمران خان پاکستانی عوام کے عمومی امریکا مخالف جذبات کا فائدہ اُٹھاتے ہوئے ملک کے 70 فیصد سیاسی نمائندوں کو غدار قرار دے کر خطرناک کھیل کھیل رہے ہیں،ان کا کہنا تھا کہ میں نے خود سیاسی زندگی کا انتخاب نہیں کیا، میرے نانا اور والدہ کے قتل کے بعد مجھے کم عمری میں سیاست میں آنا پڑا،پیپلز پارٹی حکومتی اتحاد کی دوسری بڑی جماعت ہیں، لیکن میرا وزیر خارجہ بننا میری پارٹی کے لیے ہضم کرنا مشکل ہوگا۔
