تجزیہ کاروں کا کہنا ہے کہ صرف کراچی نہیں پورے پاکستان میں مائنس عمران فارمولے پر کام ہو رہا ہے۔
نجی چینل کے پروگرام ”رپورٹ کارڈ“ میں تجزیہ کاروں ارشاد بھٹی، مظہر عباس، حفیظ اللہ نیازی اور بینظیر شاہ نے موجودہ سیاسی صورتحال کے تناظر میں عمران خان کی پوزیشن سے متعلق اپنی رائے کا اظہار کیا۔
تجزیہ کاروں کا کہنا تھا کہ عمران خان پاکستان کے مقبول سیاسی لیڈر ہیں اسٹیبلشمنٹ پی ٹی آئی کو روکنے کے لیے کراچی میں اپنی پارٹی لانا چاہتی ہے اور ایم کیوا یم کے دھڑوں کوا کٹھا کرکے مائنس الطاف والا فارمولا اپلائی ہو رہا ہے۔
تجزیہ کار بینظیر شاہ نے کہا کہ پی ٹی آئی سیاسی جماعت ہے اور سیاسی جماعت کو سڑکوں پر نہیں پارلیمنٹ میں ہونا چاہیے، تحریک انصاف پچھلے آٹھ مہینوں سے سڑکوں پر ہے، 2023 الیکشن کا سال ہے، پی ٹی آئی سڑکوں پر ہے تو کوئی حرج نہیں ہے۔
سینئر تجزیہ کاروں کا یہ بھی کہنا تھا پی ڈی ایم کے لیے کل تک جو پارلیمنٹ حرام تھی اقتدار ملتے ہی حلال ہوگئی ہے، پارلیمنٹ ایک ایلیٹ کلب ہے جہاں صرف ذاتی مفادات پورے کیے جا رہے ہیں۔
