توشہ خانہ سے سابق حکومتوں نے کب کونسے تحائف لیے اس متعلق تفصیلات دینے سے وفاق کے انکار پر صحافی ثاقب بشیر نے حیرانگی کا اظہار کرتے ہوئے کہا ہے کہ یہ تو حیران کن ہے کیونکہ حکومت اپنے بیانئے پر آگے بڑھ رہی تھی۔
تفصیلات کے مطابق وفاق نے توشہ خانہ سے خریدنے والے تحائف کی تفصیلات عدالت میں پیش کرنے سے انکار کر دیا ہے، لاہور ہائیکورٹ نے توشہ خانہ سے تحائف خریداری کی تفصیلات 16 جنوری کو پیش کرنے کا حکم دیا تھا۔
وکیل اظہر صدیق کی درخواست پر سماعت کے دوران وفاق کے وکیل نے کہا کہ تفصیلات کو خفیہ رکھا جاتا ہے، عدالت نے ریمارکس دئیے تحائف کی خرید و فروخت کے بعد خفیہ کا لفظ استعمال نہیں ہو سکتا۔ جسٹس عاصم نے ریمارکس میں کہا تھا کہ توشہ خانہ سے تحفہ خریدنے کے بعد اسے ٹیکس ریٹرنز میں ظاہر کرنا پڑتا ہے پھر یہ خفیہ کیسے رہ سکتا ہے؟
اس کیس کی سماعت میں سامنے آنے والے ریمارکس پر ثاقب بشیر نے کہا تھا کہ توشہ خانہ تحائف متعلق موجودہ حکومت نے جو معیار بنایا اسی بنیاد پر بیانیہ آگے بڑھا رہی ہے ان کا دیگر ادوار کے تحائف کی تفصیلات فراہم کرنے سے انکار بہت ہی حیران کن ہے ان کو تو چاہیے تھا فوری معلومات دے دیتے یا پھر ان ادوار میں بھی دال میں کچھ کالا ہے جس کو خفیہ رکھنے کی کوشش ہے؟
