pyare bhai saud sb, aap ne deen v mazhab ki baat chhed di hai.
ghamdi sb aur deegar molvi hazraat ke lihaaz se islam aik mazhab hai jab keh asal islam deen hai mazhab nahin hai. jab log islam ko batore mazhab qabool karte hen to is ki tamaam ki tamaam istlahen badalni pad jaati hen aur un ka aqlo feham se kuchh bhi wasta nahin rehta.
is ki misaal aap ko lafze mojiza men mile gi. mullah ke khayal main mojize ka matlab hai khudaa ki taraf se kisi nabi ko diya gayaa kharqe aadat kamaal, aisa ke jo aqal ko herat main daal de. yeh lafz kahin bhi quran main is maani main istemaal hi nahin huwa.
Quran main ijz ke maani aajiz kar dene ke to hen aur yeh ijz aqli aur amli ijz hai. yani koi kisi ka naataqa band kar de kisi lihaaz se kisi maqsad ke liye. jaise adaalat main aik wakeel doosre ki daleel ka aisa rad karta hai ke doosre ke paas us ka jawaab hi nahin hota aur yun muqadame ka faisla ho jaata hai. yaa aik wakeel koi aisi aqli daleel pesh kar deta hai apne dawe ke saboot main keh us ka tod hi mumkin nahin hota aur yun muqadame ka faisla dayee ke haq main ho jaat hai.
deene Islam main aise mojzaat ki qatan gunjesh hi nahin hai jo mullah ne kahaniya ghad ghad kar banaaye huwe hen aur is main qurano hadith ke ghalat tarjame bhi shaamil hen.
lafze mojiza ka asal maani aqlan kisi ko behs main daleel se maghloob kar dene ke hen. yani aik aisi baat kar di jaaye dawe ki daleel main jis ka mukhaalif ke paas jawaab hi no ho sake. quran aisi hi daleel hai. is ke maqaable main koi bade se bada filaasfar, sainsdaan, mahire siasat, imraniayaat, maashiyaat, mahire dastoor yaa qanoon daan tik hi nahin sakta. isi wajah se yeh kitaab mojiza hai keh har aqalmand ko aajiz kar ke rakh deti hai.
isi tarah deegar ilfaaz jo batore istalahaat istemaal kiye jaate hen un main mullah ne awaam ko bahot bewaqoof banaaya hai aise mataalib bayaan kar ke jin ka asal zindagi se door ka bhi waasta nahin hai. isi liye jab quran ki ilfaaz ko bemaani banaa diya gayaa mazhabi istalahun se to hadith kia cheez hai.
itaat ka lafzi maani kisi ki ghulaami karna har giz nahin hen balkeh kisi maqsad ke saath zehni aur zabaani tor par ahamahang hone ke hen. quran apni baatun se zehnu par asar andaaz hota hai jis se zehn is ki mazboot daleelun ki wajah se khud ko ahamahang paate hen aur beikhtayaar un ki zabaan bhi is baat ka iqrar karne par majboor ho jaati hai.
jab zehn aik maqsad ko tasleem kar len aur us ka iqrar bi kar len to agla qadam amli ahamahangi hota hai ta keh maqsad ko haasil karne ke liye amli qadam uthaaya jaaye. isi ko itaba kehte hen.
is ke saath lafze taqleed ko bhi le len. yani mil kar amli aqdaam karna ta keh jis maqsad par sab log jama huwe hen woh un ko haasil ho jaaye.
aisa karne ke liye soch wichaar ki zaroorat hai isi liye ijtahaad ki zaroorat pesh aati hai ta keh sab log apni apni soch ke mutaabiq raaye den ke laaye amal kia hona chahiye. is ke baad shoora mil kar aik plan of actions tayaar karen jis par poora jatha mil kar iqdaam kar ke apna maqsad haasil kare.
yeh hai deene islam ka maqsad in istahaun se jin ka mazhabi batun se kuchh bhi taaluq nahin hai jo un logoon ne apni taraf se banaa li hen jin logoon ne mazhabun ko khud ghada tha. yeh log mullah the jo baadshahun ne apne apne maqaasid ke liye in kaamun par lagayee the. aajkal ke secular aur mazhabi leaderun ko sarmayadarun ki pushtpanahi haasil hai aur isse maqsad aaj bhi wohee hai jo shuru main tha yaani deen ko apne raaste se hataaye rakhna.
kia aap ne kabhi socha deen main ghalat rawaayat aayee kahan se hen? yeh do jaanib se aayee hen, aik un logoon ki jaanib se jo mazhabi zehn rakhte the jab musalmaan huwe aur un ki taleem na ho saki aur woh apne aqeede par hi qaayam rehe aur yun un ki rawayaat islam main phel gayeen aur doosra hukmaraan tabqa jo deen ko sire se chahta hi nahin hai kyunkeh deen aise logoon ki rah main rukaawat hai jo logoon par apni hukmarani qaayam karna chahte hen. jab tak in ka apna zor chal saka baadshah bane baithe rehe aur jab baat haath se nikalti nazar aayee mullah peda kar liye aur un ke zariye logoon ko bewafqoof banaaye rakha. jab mullah ko khayaal aaya keh ham khud kyun nah baadshah ban jaayen to unhune siasi aur mazhabi dono taaqten apne haath main le lin aur yun baadshah bhi mullah ke ghulaam ban gaye.
phir aik dor aaya keh in ki aapas ki kashmakash se aik teesri quwat wajood main aa gayee jis ko sarmaayadariyat kehte hen. aaj tak is ka hi bol baala hai. isi liye har mullah aur har siasi leader ke peechhe inhi ka haath hai. lakin ab awaam kuchh kuchh asal baat ko samajhne lag gayee hai. is ke bawjood keh har media par deene islam ke khilaaf har taraf se hamla kiya jaa raha hai. balkeh har jaga yeh koshish ho rahee hai yaa to islam ko khatam kar dena chahiye yaa phir is ko mazhabi rang hi main rakhne ki koshish karni chahiye.
isi liye woh log jinhune islam ko deen jaana woh hamesha ashrafia aur mullah ki zad main rehe aur aaj bhi hen magar ab awaam jaagne ki koshish kar rahee hai is liye in ke din ab ziyaada nahin hen.
sir syed ka sab se bada kaarnama yahee tha keh us ne quran ko aqli tareeq se samajhne ki dawat aam ki. isi baat ko farahi ne bhi aage badaaya is baat ko bunyaad banaa kar ke quran ka sayaqo sabaaq yaqeenen hai jis ka mullah inkaar karte chale aa rehe the.
iqbal ke paighaam ko aghar ghor se dekha jaaye to is ne ummat ko do baaten saaf saaf keh din. islam deen hai mazhab nahin hai. aur yeh keh shariah woh nahin hai jo mullah ne banayee hai balkeh shariah woh hai jo ummat mil kar banaati hai quran ki hudood aur haqeeqi duniya ke haqaaiqe ko saamne rakh kar apne waqt aur halaat ki roshni main.
bas deen aur mazhab ka farq yun zabardast tareeqe se waazeh ho gayaa.
meri apni samajh main islam ke deen hone main shak hi nahin hai aur isi tarah is ke mazhab na hone main bhi shak ki gunjesh hi nahin hai. yahee wajah hai jab ham islam ko mazhab kehte hen to phir uljhanun main pad jaate hen jin ka hamare paas kuch bhi jawaab nahin hota.
sir syed
http://archive.org/details/TaasubSirSyedAhmadKhanServer555
http://archive.org/details/SamajhSirSyedAhmadKhanServer555.mp3
http://www.youtube.com/watch?v=QgOa8fb93m4&feature=related
iqbal
http://www.youtube.com/watch?v=6RA5XAdbJ04&feature=related
javed iqbal on iqbal
http://www.youtube.com/watch?v=46UsNv9dBA4
jinnah
http://www.youtube.com/watch?v=8Okxc4OVeY4&feature=related
iqbal, jinnah v mullaism by parwez
http://www.youtube.com/watch?v=ny5vNkh5U-M&feature=related
http://www.youtube.com/watch?v=EUTDL5oJEJw&feature=related
http://www.youtube.com/watch?v=YAfUNGTS800&feature=related
http://www.youtube.com/watch?v=IK7k2_NFQzY&feature=related
http://www.youtube.com/watch?v=AB5ynJ4oCtE&feature=related
http://www.youtube.com/watch?v=0vhX_VbrQmw&feature=related
http://www.youtube.com/watch?v=a8J_wXT7oEM&feature=related
http://www.youtube.com/watch?v=0vUoWYauEvU&feature=related
http://www.youtube.com/watch?v=C_IWJmRz5No&feature=related
http://www.youtube.com/watch?v=vYgpSUMldrg&feature=related
http://www.youtube.com/watch?v=b_2DztEKl2c&feature=related
regards and all the best.